Livru neʼebé Ita lee daudauk neʼe komesa halo husi fulan-Jullu tinan 1879. Husi tempu neʼebá toʼo agora, buat barak iha mundu neʼe la hanesan ona. Nuneʼe mós ho livru ida-neʼe. (Haree foto iha leten.) Komesa ho Livru Haklaken neʼe, Ita sei haree katak ami troka liután buat balu ho livru ida-neʼe. Saida mak la hanesan?

Ohin loron, ema barak liu mak buka informasaun oioin husi internét. Iha internét fasil tebes atu hetan informasaun neʼebé Ita hakarak. Ema mós bele lee livru barak no jornál sira iha internét.

Tan neʼe mak fulan balu liubá ami hafoun ona ami-nia sítiu www.pr418.com, hodi halo furak liu no fasil liu atu uza. Ema neʼebé loke sítiu neʼe bele lee livru sira iha língua hamutuk 430 liu. Maibé komesa iha fulan neʼe, sira neʼebé loke ami-nia sítiu bele mós lee informasaun balu neʼebé uluk fó sai beibeik iha livru ida-neʼe. Komesa iha fulan neʼe, informasaun balu neʼe bele lee deʼit husi internét. a

Tanba ami sei fó sai informasaun barak iha internét deʼit, komesa ho edisaun neʼe Livru Haklaken ba públiku sei hamenus husi pájina 32 ba pájina 16 deʼit. Toʼo agora, Livru Haklaken halo ona ba língua hamutuk 204. Maibé tanba agora iha pájina 16 deʼit, neʼe sei loke dalan liután atu bele tradús livru neʼe ba língua barak tan.

Ami hein katak mudansa neʼe sei ajuda ami atu habelar liután mensajen husi Bíblia neʼebé bele salva ema nia moris. Ami hakarak duni atu kontinua fó sai informasaun barak liuhusi livru sira neʼebé ami fahe ba ema ka liuhusi internét. Informasaun hotu neʼebé ami fó sai sei ajuda duni ema sira neʼebé hafolin Bíblia no hakarak hatene saida mak Bíblia loloos hanorin.

Editora sira