Ita hakarak hatene lia-loos kona-ba Maromak ka lae? Ita hakarak hatene nia mak sé loos, saida mak nia hadomi no odi, no saida mak ninia hakarak? Iha Bíblia laran, Maromak Jeová fó sai lia-loos hotu kona-ba nia an. Maibé laʼós ema hotu mak bele lee Bíblia hodi komprende didiʼak lia-loos neʼe. Tanbasá? Tanba hodi hatene lia-loos kona-ba Maromak, neʼe mak oportunidade espesiál, no laʼós ema hotu bele hetan oportunidade furak neʼe. Mai ita koʼalia kona-ba saida mak Jesus hatete kona-ba neʼe.—Lee Mateus 11:25.

Eskritura neʼe komesa ho liafuan: “Iha oras neʼebá Jesus dehan.” Karik buat neʼebé Jesus atu dehan mak atu hatán ba buat neʼebé foin akontese. Jesus foin koʼalia hasoru ema sira iha sidade tolu husi rai-Galileia, tanba maski sira haree Jesus halo milagre, maibé sira nafatin lakohi fiar ba nia. (Mateus 11:20-24) Karik Ita hanoin: “Oinsá mak ema lakohi fiar ba Jesus maski sira rasik foin haree ninia milagre sira?” Ema sira-neʼe lakohi simu Jesus tanba sira laran-toos.—Mateus 13:10-15.

Jesus hatene katak, atu ita bele komprende lia-loos kona-ba Maromak, ita presiza buat rua. Ita presiza Maromak nia ajuda no mós iha laran neʼebé loos. Jesus esplika: “Aman, Naʼi lalehan no rai nian, haʼu hahiʼi Ita tan Ita subar tiha buat hirak-neʼe ba ema matenek no neon-naʼin sira hodi hatudu ba kiʼikoan sira.” Husi eskritura neʼe, Ita haree ona ka lae, tanbasá mak ema hotu la bele komprende lia-loos husi Bíblia? Tanba Maromak Jeová mak “Naʼi lalehan no rai nian”, nia iha direitu atu deside hodi fó sai lia-loos ba ema naran deʼit tuir ninia hakarak. Maski nuneʼe, ema hotu iha oportunidade atu aprende kona-ba lia-loos. Jeová la fihir ema. Se nuneʼe, Maromak Jeová fó sai lia-loos ba sé deʼit?

Maromak Jeová gosta ema neʼebé haraik-an, laʼós foti-an. (Tiago 4:6) Nia subar lia-loos husi “ema matenek no neon-naʼin sira”, neʼebé foti-an no sente katak sira la presiza Maromak nia ajuda. (1 Korinto1:19-21) Maibé Maromak fó sai lia-loos ba “kiʼikoan sira”, sira neʼebé hakbesik ba Maromak ho laran neʼebé loos no haraik-an. (Mateus 18:1-4; 1 Korinto 1:26-28) Porezemplu, iha Jesus nia tempu, ulun-naʼin relijiaun barak neʼebé foti-an la komprende Jesus nia liafuan, maibé peskadór sira neʼebé haraik-an mak komprende. (Mateus 4:18-22; 23:1-5; Apóstolu 4:13) Maski nuneʼe, iha mós ema balu neʼebé riku no matenek neʼebé sai Jesus nia dixípulu sira tanba sira hatudu haraik-an husi laran.—Lucas 19:1, 2, 8; Apóstolu 22:1-3.

Agora ita koʼalia fali kona-ba pergunta neʼebé temi ona iha leten: Ita hakarak hatene lia-loos kona-ba Maromak ka lae? Tuir loloos, Maromak gosta ema neʼebé haraik-an, no nia la gosta ema sira neʼebé foti-an. Hodi hatene kona-ba ida-neʼe, neʼe halo ita sente kmaan, loos ka lae? Se Ita estuda Bíblia ho haraik-an, Maromak Jeová bele fó ba Ita prezente neʼebé kapás, neʼe mak Ita bele komprende lia-loos kona-ba nia. Se Ita komprende didiʼak lia-loos kona-ba Maromak, neʼe bele halo Ita-nia moris kontente liután. No Ita mós bele hetan “moris neʼebé mesak mak loloos”, neʼe mak moris rohan-laek iha mundu foun neʼebé Maromak promete atu mai. a—1 Timoteo 6:12, 19; 2 Pedro 3:13.