Haʼu moris iha sidade naran Moundsville, besik Mota Ohio iha Virjínia, Estadus Unidus. Haʼu mak oan segundu husi oan naʼin-haat, mane tolu no feto ida. Ami-nia moris família nian sempre kontente. Haʼu-nia inan-aman mak ema neʼebé badinas no laran-moos no sira sempre hatudu domin ba ema seluk. Maski ami laʼós ema riku, maibé buat neʼebé ami iha, sempre natoon ba ami-nia presiza. Nuʼudar Testemuña ba Jeová, haʼu-nia inan-aman hakaʼas an atu hanorin Bíblia nia matadalan ba ami husi tempu neʼebé ami sei kiʼik.

Maibé kuandu haʼu sai joven, haʼu komesa ona atu hadook an husi buat neʼebé haʼu aprende tiha ona. Haʼu sente katak, se haʼu iha liberdade atu halo buat naran deʼit neʼebé haʼu hakarak, neʼe mak sei halo haʼu kontente, laʼós hodi halo tuir Bíblia nia matadalan. Lakleur, haʼu para atu tuir reuniaun kristaun nian. Haʼu-nia maun ida no alin-feto mós lakohi tuir tan ona. Ami-nia inan-aman hakaʼas an atu ajuda ami, maibé ami lakohi simu.

Iha tempu neʼebá, haʼu la hatene katak liberdade neʼebé haʼu hakarak hetan sei halo haʼu sai atan ba toman aat oioin. Loron ida, kuandu haʼu sai eskola no atu fila ba uma, kolega ida fó haʼu sigarru, haʼu simu no fuma. Husi tempu neʼebá mak haʼu komesa atu iha toman aat seluk tan. Lakleur, haʼu komesa uza droga, hemu tua demais no halo sala-foʼer. Durante tinan balu depois neʼe, haʼu mós komesa atu uza beibeik droga neʼebé forte liu. Tanba haʼu sai atan ona ba toman aat sira-neʼe, haʼu mós komesa atu faʼan droga hodi hetan osan atu apoia haʼu-nia moris hanesan neʼe.

Haʼu-nia laran halo haʼu sente katak haʼu moris iha dalan neʼebé la loos. Maski nuneʼe, haʼu lakohi rekoñese ida-neʼe. Haʼu sente katak tarde liu ona atu troka haʼu-nia moris. No kuandu haʼu tuir konsertu no festa oioin, haʼu nafatin sente mesamesak no laran-tun maski haʼu hamutuk ho ema barak. Dala ruma, haʼu hanoin kona-ba haʼu-nia inan-aman sira-nia hahalok neʼebé  diʼak no haʼu la hatene tansá mak haʼu tenke hili moris hanesan neʼe.

Maski haʼu la iha esperansa tan katak haʼu bele hadiʼa fali haʼu-nia moris, maibé ema seluk nia hanoin la hanesan neʼe. Iha tinan 2000, haʼu-nia inan-aman konvida haʼu atu tuir Testemuña ba Jeová nia reuniaun boot ba loron tolu. Maski haʼu ladún iha hakarak atu tuir, maibé haʼu tuir deʼit. No haʼu hakfodak tanba haʼu-nia maun no alin-feto mós tuir reuniaun neʼe.

Kuandu haʼu tuur iha reuniaun-fatin, haʼu foin hatene katak tinan ida liubá, haʼu mai tiha ona iha fatin neʼe atu tuir konsertu múzika rock. Maibé buat neʼebé haʼu haree iha reuniaun boot neʼe book duni haʼu-nia laran. Kuandu haʼu tuir konsertu, fatin neʼe ema soe foʼer barak no ema barak fuma. Ema barak neʼebé tuir konsertu la hatudu laran-diʼak no múzika neʼebé ema toka, halo haʼu estrese no laran-tun. Maibé iha reuniaun boot neʼe, iha ema barak neʼebé kontente no sira simu haʼu ho diʼak, maski haʼu la hasoru sira ba tinan barak ona. Reuniaun-fatin mós la iha foʼer, no diskursu sira neʼebé hatoʼo mak fó esperansa ba ema. Kuandu haʼu haree oinsá lia-loos husi Bíblia bele halo buat diʼak sira-neʼe hotu, haʼu la hatene tanbasá mak uluk haʼu lakohi simu lia-loos.—Isaías (Yesaya) 48:17, 18.

Kuandu reuniaun boot neʼe ramata, haʼu deside kedas atu fila fali ba kongregasaun kristaun. Haʼu-nia maun no alin-feto mós deside atu halo hanesan, tanba reuniaun boot neʼe mós book sira-nia laran. Ami naʼin-tolu komesa atu estuda fali Bíblia.

Eskritura iha Bíblia neʼebé book duni haʼu-nia laran mak Tiago 4:8 neʼebé hatete: “Hakbesik ba Maromak, no nia sei hakbesik imi.” Haʼu rekoñese katak, se haʼu hakarak atu hakbesik ba Maromak, haʼu presiza duni hadiʼa haʼu-nia moris. Iha buat barak neʼebé haʼu presiza troka, inklui para fuma no uza droga, no mós la hemu tan tua demais.—2 Korinto 7:1.

Haʼu la ransu tan ona ho haʼu-nia kolega sira uluk no komesa ransu ho ema neʼebé adora Maromak Jeová. Katuas kristaun nian neʼebé estuda Bíblia ho haʼu ajuda duni haʼu. Nia telefone no vizita haʼu beibeik. Toʼo ohin loron, nia mak haʼu-nia belun neʼebé diʼak.

Iha tinan 2001, haʼu dedika haʼu-nia moris ba Maromak hodi hetan batizmu iha bee laran. Haʼu-nia maun no alin-feto mós halo hanesan. Haʼu-nia inan-aman no alin-mane sente kontente tebes kuandu ikusmai ami-nia família hamutuk serbí fali Maromak Jeová.

Uluk haʼu hanoin katak moris tuir Bíblia nia matadalan la fó liberdade mai haʼu, maibé agora haʼu sente katak ida-neʼe bele proteje haʼu. Bíblia ajuda haʼu atu la faʼan no la uza tan droga no sai ema neʼebé diʼak liu iha komunidade nia leet.

Agora haʼu sai parte husi Maromak Jeová nia povu iha mundu tomak. Ema sira-neʼe hadomi malu, no sira adora Maromak ho unidade. (Joao 13:34, 35) Haʼu mós hetan bensaun espesiál, neʼe mak haʼu-nia feen Adrianne, neʼebé haʼu hadomi tebes. Ami haksolok tebes atu hamutuk serbí ami-nia Kriadór.

Agora haʼu la moris tuir haʼu-nia hakarak deʼit, maibé haʼu uza haʼu-nia moris hodi serbí Maromak tempu-tomak, hodi hanorin ema oinsá mak Bíblia bele ajuda sira. Serbisu neʼe lori duni haksolok ba haʼu. Haʼu bele hatete katak Bíblia troka duni haʼu-nia moris. Agora haʼu hetan ona liberdade neʼebé loos.