Haʼu moris mai iha sidade kiʼik naran Texcoco. Iha tempu neʼebá, estrada sira la iha alkatraun no rai-rahun barak. Baibain iha neʼebá, ema mai husi suku seluk no uza kuda-burru atu lori sira-nia sasán neʼebé sira hakarak faʼan. Haʼu iha maun-alin naʼin-ualu no haʼu mak númeru hitu. Ami-nia família kiak tebes. Haʼu-nia aman serbisu hodi hadiʼa guaraches (sandálias) atu tau matan ba ami. Maibé kuandu haʼu tinan hitu, nia mate. Husi tempu neʼebá, haʼu-nia inan hetan susar hodi tau matan ba família.

Haʼu-nia avó-mane toka violinu no nia mak dirije orkestra neʼebé toka múzika igreja nian. Besik ema hotu iha haʼu-nia família hatene toka instrumentu ida. Haʼu-nia inan kanta iha igreja nuʼudar koru no haʼu-nia tiu mós kantadór no hatene toka pianu. Ami laran-metin ba Igreja Katólika. Iha tempu neʼebá, haʼu serbí nuʼudar akólitu no haʼu nia mehi mak atu sai misionáriu. Maibé, haʼu mós gosta tebes filme kona-ba arte marsiais. Tanba haʼu nonton beibeik, haʼu komesa sai ema neʼebé siʼak.

Iha sidade Puebla, haʼu tama eskola ida hanesan semináriu. Haʼu-nia hakarak mak atu sai padre. Maibé kuandu haʼu besik atu ramata haʼu-nia estuda, haʼu sai konfuzaun ho Igreja Katólika. Loron ida, madre ida intenta haʼu. Maski haʼu la husik ida-neʼe akontese, maibé neʼe book haʼu-nia laran atu hakarak kaben. Haʼu mós haree katak padre balu la moris tuir buat neʼebé sira hanorin. Ikusmai, haʼu deside katak haʼu lakohi ona atu sai padre.

 Haʼu deside atu estuda múzika iha eskola ida (National Conservatory of Music) iha sidade Méxiku. Kuandu haʼu hetan tiha graduasaun, haʼu kaben, no depois neʼe haʼu iha oan naʼin-haat. Osan neʼebé haʼu hetan kuandu haʼu kanta iha misa ajuda haʼu atu tau matan ba haʼu-nia família.

Husi tempu neʼebé haʼu kaben, haʼu-nia moris kaben nian laʼo la diʼak. Haʼu no haʼu-nia feen trata aat malu beibeik, liuliu tanba ami deskonfia malu. Foufoun, ami istori malu, maibé depois neʼe ami mós baku malu. Ikusmai, kuandu ami kaben ba tinan 13 ona, ami deside atu soe malu.

Haʼu hasoru Testemuña ba Jeová ba dala primeiru antes haʼu fahe malu ho haʼu-nia feen. Iha tempu neʼebá, Testemuña naʼin-rua vizita ami atu koʼalia kona-ba Bíblia. Haʼu hanoin katak haʼu hatene buat barak kona-ba relijiaun, no haʼu hakarak hatudu katak sira-nia hanorin mak sala. Haʼu husu pergunta difisil ba sira neʼebé haʼu hanoin la iha resposta. Maibé haʼu hakfodak tanba sira sempre hatán haʼu-nia pergunta sira husi Bíblia. Haʼu komesa atu haree katak tuir loloos, haʼu ladún iha koñesimentu barak kona-ba Bíblia. Maibé, haʼu-nia feen la hatudu respeitu ba Testemuña sira, no tanba haʼu mós okupadu tebes, sira la vizita tan haʼu.

Tinan lima liutiha neʼe, haʼu hela hamutuk fali ho feto ida naran Elvira, no iha tempu neʼe mak haʼu foin hasoru fali Testemuña ba Jeová. Tanba Elvira la kontra Testemuña sira, haʼu livre atu estuda Bíblia semana-semana ho sira. Maski nuneʼe, haʼu presiza tinan barak atu troka haʼu-nia hahalok.

Haʼu hatene katak, atu adora Maromak Jeová ho laran tomak, haʼu presiza halo mudansa boot iha haʼu-nia moris. Primeiru, haʼu tenke para serbisu atu kanta iha misa, maibé ida-neʼe katak haʼu presiza atu buka serbisu seluk. (Apokalipse 18:4) Haʼu ho Elvira mós presiza atu kaben tuir lei.

Buat neʼebé susar liu mai haʼu mak kontrola haʼu-nia hirus. Eskritura rua husi Bíblia mak ajuda haʼu. Ida mak Salmo (Mazmur) 11:5 neʼebé hatudu katak Maromak Jeová odi violénsia. No mós 1 Pedro 3:7 neʼebé hanorin haʼu katak haʼu presiza hatudu respeitu ba haʼu-nia feen atu nuneʼe Jeová bele rona haʼu-nia orasaun. Nuʼudar haʼu hanoin kleʼan kona-ba eskritura sira-neʼe no halo orasaun atu Jeová bele ajuda haʼu, neineik-neineik haʼu konsege atu kontrola haʼu-nia hirus.

Agora haʼu iha moris família nian neʼebé kontente. Haʼu hakaʼas an daudaun atu hadiʼa haʼu-nia relasaun ho haʼu-nia oan-mane sira husi haʼu-nia feen primeiru, no atu ajuda haʼu-nia família foun atu laran-metin hodi serbí Maromak.

Uluk, kuandu haʼu sei labarik, haʼu-nia hakarak mak atu sai padre no atu ajuda ema. Agora, haʼu sente katak haʼu-nia moris iha folin duni. Haʼu tau matan ba haʼu-nia família hodi halo serbisu atu hanorin múzika. Haʼu agradese tebes tanba Maromak Jeová hatudu pasiénsia, hodi fó oportunidade mai haʼu atu troka haʼu-nia hahalok no sai ema neʼebé diʼak liu!