Bíblia iha matadalan kona-ba oinsá atu bele kontente iha moris kaben nian. Kuandu ema halo tuir, sira bele hetan susesu. Tanbasá? Tanba matadalan neʼe mai husi Maromak Jeová, Ida neʼebé Hun ba moris kaben. Bíblia nia matadalan bele ajuda ita atu haburas hahalok sira neʼebé halo ita-nia moris kaben nian kontente. Konsellu neʼe mós hatudu sai hahalok sira neʼebé bele estraga moris kaben nian. Bíblia mós hanorin ema oinsá atu koʼalia ba malu hodi moris kaben nian bele kontente.—Lee Koloso 3:8-10, 12-14.

Laʼen no feen sira presiza hamtaʼuk no hatudu respeitu ba malu. Kuandu sira halo tuir knaar neʼebé Maromak fó ba sira naʼin-rua, sira bele sai kontente.—Lee Koloso 3:18, 19.

Se kaben-naʼin sira hadomi malu, sira bele iha relasaun neʼebé metin ba nafatin. Maromak hanorin ita oinsá atu hatudu domin. Maromak no ninia Oan, Jesus, hatudu ezemplu diʼak tebes kona-ba hatudu domin neʼebé la buka an deʼit.—Lee 1 Joao 4:7, 8, 19.

Kuandu kaben-naʼin sira haree moris kaben nian nuʼudar Maromak nia arranju, sira sei la husik malu. Maromak hakarak laʼen no feen atu hela hamutuk ba nafatin hodi família bele sente seguru no metin. Kaben-naʼin sira bele hamutuk ba nafatin tanba Maromak halo mane no feto iha dalan neʼebé sira bele ajuda malu se ida falta buat ruma. Maromak mós kria sira tuir ninia ilas, hodi nuneʼe sira bele banati-tuir domin neʼebé nia hatudu.—Lee Gênesis (Kejadian) 1:27; 2:18, 24.