Liutiha maizumenus tinan 700 husi tempu profeta Miquéias, buat neʼebé nia fó-hatene nanis ona kona-ba Mesias sai loos. Jesus moris iha Belein. No iha tinan 29, kuandu Jesus tinan 30 ona, parte primeiru husi Daniel nia profesia kona-ba Mesias sai loos. Jesus hetan batizmu no Maromak haraik espíritu santu ba nia. Afinál, Mesias ka “Bei-Oan” neʼebé ema hein kleur ona mosu mai!

Jesus hahú kedas ninia serbisu atu “haklaken lia-foun diʼak kona-ba Maromak nia reinu”. (Lucas 8:1) Hanesan profeta sira fó-hatene nanis ona, Jesus hatudu laran-diʼak no laran-maus, no nia hanoin ema. Nia hanorin ho domin hodi ajuda ema atu troka sira-nia moris, no liuhusi Maromak nia kbiit, nia mós “fó isin-diʼak” ba ema moras sira. (Mateus 4:23) Maski idade kiʼik ka boot, ema hotu gosta atu hakbesik ba Jesus, hodi dehan: “Ami hetan ona Mesias!”—João 1:41.

Jesus fó-hatene nanis katak antes nia komesa ukun mundu tomak, susar oioin sei mosu, hanesan funu no rai-nakdoko. Tan neʼe, nia haruka ema hotu atu “matan-moris” nafatin.—Marcos 13:37.

Jesus nuʼudar ema perfeitu, nia sempre halo tuir Maromak. Maski nuneʼe, ema balu odi nia no ikusmai oho nia. Maibé Jesus nia mate nuʼudar ema neʼebé perfeitu bele selu buat neʼebé Adão ho Eva halakon ona, neʼe mak oportunidade atu moris rohan-laek iha mundu neʼebé hanesan jardín Eden.

Liutiha loron tolu depois Jesus mate, Maromak halo nia moris hiʼas fali, no buat hirak-neʼe hotu kumpre liafuan neʼebé profeta sira hakerek nanis ona. Depois neʼe, Jesus mosu fali ba dixípulu naʼin-500 liu. Antes nia saʼe ba lalehan, nia haruka ema neʼebé halo tuir nia atu haklaken liafuan diʼak kona-ba nia no ninia Ukun ba “nasaun hotu-hotu”. (Mateus 28:19) Entaun, dixípulu sira halaʼo serbisu haklaken toʼo iha neʼebé?

—Informasaun husi Mateus, Marcos, Lucas, João, 1 Korinto.