Haʼu sai boot iha sidade naran Santiagu, sidade kapitál iha rai-Xile. Haʼu hela iha bairru neʼebé ema barak uza droga, halo krime no iha joven grupu aat sira. Kuandu haʼu tinan lima, ema oho haʼu-nia aman. Depois neʼe haʼu-nia inan hela hamutuk ho mane ida neʼebé laran-aat tebes. Nia baku ami beibeik. Husi tempu neʼebá toʼo agora haʼu sei sente laran-kanek kona-ba neʼe.

Nuʼudar haʼu sai boot, haʼu mós sai toman atu halo violénsia. Haʼu rona múzika rock makaʼas, hemu-lanu no dala ruma uza droga. Haʼu baku malu beibeik ho ema neʼebé faʼan droga, no dala barak sira koko atu oho haʼu. Tempu ida, joven grupu aat ida selu osan ba mane ida atu oho haʼu. Maski nia sona haʼu, maibé haʼu konsege halai ho kanek ida deʼit. Tempu seluk, grupu neʼebé faʼan droga tau pistola ba haʼu-nia ulun no koko atu tara haʼu.

Iha tinan 1996, haʼu-nia laran monu ba feto ida naran Carolina, no iha tinan 1998 ami kaben. Depois kuandu ami-nia oan-mane primeiru moris mai, haʼu taʼuk katak haʼu sei trata aat haʼu-nia família hanesan haʼu-nia aman-kiʼik. Tan neʼe, haʼu buka ajuda husi doutór sira. Maski sira fó tratamentu, maibé neʼe saugati deʼit. Haʼu nafatin siʼak kona-ba buat neʼebé kiʼik deʼit. Haʼu la bele kontrola an. Tanba haʼu lakohi atu hakanek tan haʼu-nia família, haʼu koko atu oho an, maibé la konsege.

Ba tinan barak haʼu la fiar katak Maromak iha, maibé tuir loloos haʼu hakarak atu fiar ba nia. Tan neʼe haʼu tama relijiaun protestante ba tempu uitoan. Durante tempu neʼe, haʼu-nia feen komesa estuda Bíblia ho Testemuña ba Jeová. Haʼu odi loos sira no haʼu tolok sira beibeik. Maibé sira sempre hatudu hahalok diʼak no ida-neʼe halo haʼu hakfodak.

Loron ida, Carolina husu haʼu atu lee Salmo (Mazmur) 83:18 husi haʼu-nia Bíblia rasik. Versíkulu neʼe hatudu ho klaru katak Maromak nia naran mak Jeová. Haʼu hakfodak atu haree katak maski haʼu-nia relijiaun hanorin kona-ba maromak, maibé haʼu la aprende kona-ba Jeová. Iha tinan 2000, haʼu mós komesa estuda Bíblia ho Testemuña ba Jeová.

Nuʼudar haʼu laʼo ba oin, haʼu hetan laran-kmaan hodi aprende katak Jeová mak Maromak neʼebé hatudu domin no prontu atu fó perdua. Porezemplu, iha Êxodo (Keluaran) 34:6, 7, Bíblia hatete Jeová mak “Maromak neʼebé laran-sadiʼa no laran-luak, neineik atu hirus no nakonu ho laran-diʼak no lia-loos, Nia hatudu domin laran-metin ba jerasaun rihun ba rihun, no fó perdua ba ema nia sala”.

Maski nuneʼe, susar ba haʼu atu halo tuir buat neʼebé haʼu aprende husi Bíblia. Haʼu sente katak haʼu nunka bele kontrola haʼu-nia hirus. Maibé kuandu haʼu-nia tensaun saʼe makaʼas, Carolina ho domin fó ajuda mai haʼu. Nia sempre fó-hanoin haʼu katak Jeová haree haʼu-nia hakaʼas-an. Ninia apoia fó laran-manas mai haʼu atu koko nafatin halo Jeová kontente, maski haʼu sente katak haʼu mak ema neʼebé nia sei nunka simu.

Loron ida, irmaun neʼebé estuda Bíblia ho haʼu naran Alejandro husu haʼu atu lee Galásia 5:22, 23. Versíkulu sira-neʼe dehan katak hahalok neʼebé Maromak nia espíritu lori mai mak “domin, ksolok, dame, pasiénsia, laran-diʼak, laran-luak, fiar malu, laran-kmaus no ukun an”. Alejandro esplika katak hodi haburas hahalok sira-neʼe la depende ba haʼu-nia kbiit rasik, maibé ba Maromak nia espíritu santu. Hanorin neʼebé loos neʼe troka duni haʼu-nia hanoin.

Liutiha tempu uitoan, haʼu asiste reuniaun boot husi Testemuña ba Jeová. Kuandu haʼu haree katak fatin neʼe moos, la runguranga no sira hotu haree malu diʼak, haʼu fiar duni katak haʼu hetan ona relijiaun neʼebé loos. (João 13:34, 35) Iha fulan-Fevereiru tinan 2001 haʼu hetan batizmu.

Jeová halo haʼu nakfila an husi mane ida neʼebé halo violénsia makaʼas sai fali mane neʼebé hakmatek. Haʼu sente katak nia hasai haʼu husi hahalok aat neʼebé kesi metin haʼu. Haʼu komprende tanbasá mak uluk ema barak odi haʼu. Maibé agora haʼu hetan hakmatek no haksolok hodi serbí Jeová hamutuk ho haʼu-nia feen no oan-mane naʼin-rua.

Haʼu-nia família no kolega uluk nian la bele fiar oinsá mak haʼu halo mudansa neʼe. Tan neʼe, sira balu hakarak aprende lia-loos husi Bíblia. Haʼu iha knaar furak hodi ajuda ema seluk atu hakbesik ba Jeová. Kuandu haʼu haree lia-loos husi Bíblia troka mós sira-nia moris, ida-neʼe halo haʼu sente kontente!