Husi livru hotu iha mundu tomak, Bíblia mak livru neʼebé ema barak liu gosta atu lee. Tanbasá? Razaun ida mak kuandu ita lee Bíblia, ita bele haree oinsá mak ida-neʼe kona ita rasik nia moris. Bíblia fó sai istória sira neʼebé hanorin ita iha dalan neʼebé simples no klaru. Bíblia mak livru neʼebé tradús ba língua atus ba atus, no ema husi jerasaun no fatin naran deʼit bele lee no halo tuir. Tuir loloos, ninia matadalan sempre lori diʼak mai ita hotu.

Buat neʼebé importante liu mak Bíblia laʼós deʼit livru kona-ba Maromak maibé livru husi Maromak. Liuhusi Bíblia, ita bele hatene Maromak nia naran, hahalok, no kona-ba ninia planu neʼebé metin ba rai no mós ba ema. Bíblia mós konta istória kona-ba oinsá mak buat aat mosu, oinsá mak ida-neʼe kontra hasoru buat neʼebé diʼak, no ikusmai buat furak saida mak sei akontese iha futuru. Hodi lee Bíblia, ita bele haburas ita-nia fiar no esperansa.

Bíblia fó sai informasaun neʼebé ita la bele hetan husi livru sira seluk. Porezemplu, Bíblia esplika ho klaru kona-ba pergunta sira tuirmai neʼe:

• Tansá mak ita moris no hetan terus?

• Saida mak Maromak halo ona atu salva ema?

• Saida mak Jesus halo ona mai ita?

• Saida mak sei akontese ba mundu no ema?

Mai ita lee pájina sira tuirmai hodi buka-hatene saida mak Bíblia nia mensajen.