Haʼu moris iha família neʼebé simples iha sidade Bilbao, parte norte iha rai-España. Ami hamutuk naʼin-haat no haʼu mak oan segundu. Ami-nia família mak katóliku no ami laran-manas ba relijiaun neʼe. Ami tuir misa loron-loron. Kuandu haʼu tinan 23, haʼu sai mestra ida, haʼu gosta tebes serbisu neʼe no haʼu hanorin ba tinan 40. Haʼu hanorin matéria oioin, neʼe inklui mós matéria relijiaun nian. Haʼu gosta tebes hanorin matéria neʼe, no iha kalan haʼu halo serbisu nuʼudar katekista hodi hanorin feto sira antes sira halo primeira komuñaun.

Depois haʼu kaben tiha ba tinan 12, haʼu-nia laʼen mate no haʼu tenke tau matan ba haʼu-nia oan-feto naʼin-haat. Iha tempu neʼe haʼu tinan 33 deʼit! Haʼu koko atu hetan kmaan liuhusi haʼu-nia fiar, maibé sempre iha pergunta neʼebé mosu iha haʼu-nia neon. Haʼu hanoin: ‘Tansá mak ema kontinua mate se Kristu salva ona ita? Tansá mak ita halo orasaun atu husu Maromak nia Ukun toʼo mai se ema diʼak bá lalehan?’ No haʼu mós hanoin: ‘Se Maromak tesi lia ba ita kuandu ita mate, tansá mak ikusmai ita presiza sai husi lalehan, purgatóriu, ka infernu hodi simu tesi-lia ikus nian?’

Haʼu husu pergunta sira-neʼe ba padre balu. Padre ida hatán dehan: “Haʼu la hatene. Bá husu bispu. Tansá ó tenke husu ida-neʼe? Ó fiar ona Maromak, loos ka lae? Haluha deʼit pergunta sira-neʼe!” Maski nuneʼe, haʼu kontinua buka resposta. Ikusmai, haʼu tuir reuniaun sira husi ema Jezuíta, Pentekostál, no Gnostika. Maibé, haʼu la hetan resposta neʼebé loos ba haʼu-nia pergunta sira.

Kuandu haʼu tinan 60 liu, haʼu-nia estudante neʼebé tinan hitu deʼit konvida haʼu atu tuir reuniaun husi Testemuña ba Jeová. Haʼu gosta buat neʼebé haʼu haree no rona iha neʼebá, maibé tanba haʼu okupadu loos, haʼu lakon kontaktu ho Testemuña sira iha tempu neʼebá. No tinan rua depois neʼe, kaben-naʼin ida neʼebé Testemuña, naran Juan no Maite, vizita haʼu-nia uma. Durante fulan tolu nia laran haʼu husu pergunta barak ba sira, no ikusmai ami estuda Bíblia.

Haʼu gosta tebes tempu ida-idak neʼebé ami estuda hamutuk!  Haʼu uza tradusaun Bíblia nian tolu atu buka-hatene didiʼak se buat neʼebé Testemuña ba Jeová hanorin mak lia-loos ka lae. Lakleur haʼu komprende katak ba tinan barak ona haʼu la hatene loloos kona-ba Maromak. Haʼu hanoin barak tebes tanba hanorin neʼebé haʼu foin aprende husi Bíblia la hanesan duni ho haʼu-nia fiar uluk nian. Haʼu sente katak haʼu tenke troka haʼu-nia fiar, hanesan fokit ai neʼebé iha abut naruk.

Tuirmai, haʼu-nia laʼen segundu hetan moras boot no mate. No maizumenus iha tempu hanesan, haʼu mós para ona serbisu tanba idade boot no haʼu husik sidade Bilbao ba tempu uitoan. Juan no Maite mós muda ba fatin seluk. Buat neʼebé triste mak haʼu la kontinua tan atu estuda Bíblia. Maski nuneʼe, iha haʼu-nia laran haʼu hatene katak haʼu hetan ona rikusoin ida. Haʼu nunka haluha ida-neʼe.

Maibé liutiha tinan 20, kuandu haʼu tinan 82, Juan no Maite fila fali ba Bilbao no sira mai vizita haʼu. Haʼu kontente tebes atu hasoru fali sira! Haʼu hatene katak Jeová la haluha haʼu, no haʼu kontinua fali atu estuda Bíblia. Juan no Maite hatudu pasiénsia neʼebé boot tanba haʼu sempre husu pergunta neʼebé hanesan. Haʼu presiza rona beibeik resposta husi Bíblia kona-ba haʼu-nia pergunta sira, hodi haʼu bele husik haʼu-nia fiar uluk nian. Haʼu mós hakarak sai matenek atu esplika lia-loos husi Bíblia ba haʼu-nia kolega no família sira.

Ikusmai haʼu hetan batizmu kuandu haʼu tinan 87. No loron neʼebé haʼu hetan batizmu mak loron neʼebé halo haʼu kontente tebes. Haʼu hetan batizmu iha reuniaun boot ida husi Testemuña ba Jeová. Katuas kristaun ida hatoʼo diskursu batizmu nian ba ami neʼebé atu hetan batizmu. Diskursu Bíblia nian neʼe book haʼu toʼo haʼu-nia matan-been tun. Haʼu rona ba diskursu neʼe hanesan Jeová rasik mak koʼalia mai haʼu. Depois haʼu hetan batizmu, Testemuña barak fó parabéns ba haʼu, maski sira barak haʼu seidauk koñese!

Antes haʼu komesa estuda Bíblia haʼu hatene ona katak Jesus Kristu mak “dalan”. (João 14:6) Maibé hodi estuda Bíblia, ida-neʼe ajuda haʼu atu hatene didiʼak Maromak Jeová, ida neʼebé Jesus haruka ita atu adora. Agora haʼu bele halo orasaun ba Maromak nuʼudar haʼu-nia Aman no Belun. Kuandu haʼu lee livru Mendekatlah kepada Yehuwa, a ida-neʼe book tebes haʼu-nia laran hodi troka haʼu-nia moris. Kuandu haʼu simu livru neʼe, haʼu lee hotu kedas iha kalan ida! Husi livru neʼe, haʼu aprende katak Jeová mak Maromak neʼebé prontu atu fó perdua, no ida-neʼe book tebes haʼu-nia laran.

Kuandu haʼu hanoin fali kona-ba tempu kleur neʼebé haʼu uza atu buka lia-loos, ida-neʼe halo haʼu hanoin kona-ba Jesus nia liafuan neʼebé dehan: “Kontinua husu, no imi sei simu. Kontinua buka, no imi sei hetan. Kontinua tuku odamatan, no odamatan sei loke ba imi.” (Mateus 7:7) No tanba agora haʼu hetan ona resposta ba haʼu-nia pergunta sira, haʼu kontente tebes atu fahe fali ida-neʼe ba ema seluk.

Maski haʼu tinan 90 ona, maibé sei iha buat barak tan neʼebé haʼu presiza aprende kona-ba Jeová. Reuniaun ida-idak neʼebé haʼu tuir iha Reuniaun-Fatin mak tempu neʼebé espesiál, haʼu hafolin tebes lia-loos neʼebé haʼu simu, no mós haʼu kontente atu ransu malu ho haʼu-nia irmaun-irmán sira. Haʼu hein namanas atu sai fali mestra ida iha mundu foun. (Apokalipse 21:3, 4) Haʼu mós hein namanas atu hasoru fali ema sira neʼebé haʼu hadomi kuandu sira moris hiʼas no tuirmai haʼu iha oportunidade atu hanorin sira lia-loos husi Bíblia. (Apóstolu 24:15) Haʼu hakarak tebes atu fó-hatene sira kona-ba prezente furak neʼebé Jeová fó ba haʼu kuandu haʼu idade ona!