Ita fiar promete kona-ba moris-hiʼas neʼebé hakerek iha Bíblia ka lae? Hodi bele hamutuk fali ho ita-nia família ka belun neʼebé mate ona, neʼe halo ita kontente tebes, loos ka lae? Maibé, moris-hiʼas sei akontese duni ka lae? Atu ajuda ita hatán pergunta neʼe, mai ita hanoin filafali ezemplu husi Jesus Kristu nia apóstolu sira.

Jesus nia apóstolu sira fiar duni katak ema mate sira sei moris hiʼas. Tanbasá? Tanba razaun rua. Primeiru, sira-nia esperansa neʼe iha hun: Jesus rasik hetan moris-hiʼas husi mate. Apóstolu sira, no mós “maun-alin naʼin-500 liu iha tempu ida”, haree Jesus neʼebé hetan ona moris-hiʼas. (1 Korinto 15:6) Liután neʼe, hanesan Evanjellu haat hatudu, ema barak fiar duni katak Jesus hetan moris-hiʼas.—Mateus 27:62–28:20; Marcos 16:1-8; Lucas 24:1-53; João 20:1–21:25.

Segundu, apóstolu sira haree Jesus fó moris-hiʼas ba ema naʼin-tolu. Ulukliu iha Naim, tuirmai iha Kafarnaum, no ikusliu iha Betánia. (Lucas 7:11-17; 8:49-56; João 11:1-44) Ema ikus neʼebé Jesus fó moris-hiʼas husi ezemplu tolu neʼe mak husi família ida neʼebé belun diʼak ho nia. Mai ita haree tan saida mak akontese.

Marta nia alin, Lázaro, mate ona ba loron haat. Jesus hatete ba Marta: “Ó-nia alin sei moris fali.” Foufoun, Marta ladún komprende Jesus nia liafuan neʼe katak sá, no nia hatete: “Haʼu hatene katak nia sei moris fali”, maibé Marta hanoin katak ninia alin sei hetan moris-hiʼas iha futuru. Hanoin toʼok, kuandu rona Jesus hatete: “Haʼu mak moris-hiʼas no moris”, Marta hakfodak tebes hodi haree Jesus fó moris-hiʼas ba ninia alin neʼebé mate ona!—João 11:23-25.

Durante loron haat neʼebé Lázaro mate, nia iha neʼebé? Lázaro la konta katak durante loron haat neʼe nia moris iha fatin seluk. Lázaro la iha klamar ida neʼebé bá lalehan. Hodi halo Lázaro moris hiʼas, Jesus la foti Lázaro husi lalehan no lori fali nia mai iha rai, hodi obriga nia atu husik ninia moris kontente iha lalehan besik ho Maromak. Se nuneʼe, durante loron haat neʼebé Lázaro mate, nia iha neʼebé? Tuir loloos, nia hanesan toba deʼit iha rate.—Eclesiastes (Pengkhotbah) 9:5, 10.

Hanoin-hetan, Jesus kompara mate ho toba neʼebé bele fanu liuhusi moris-hiʼas. Jesus hatete: “‘Lázaro, ita-nia belun toba ona, maibé haʼu sei bá  hodi fanu nia.’ Tan neʼe dixípulu sira dehan ba nia: ‘Naʼi, se nia toba hela, nia sei sai diʼak fali.’ Tuir loloos, Jesus koʼalia kona-ba Lázaro nia mate. Maibé sira hanoin katak nia koʼalia kona-ba Lázaro toba hanesan baibain. Ho ida-neʼe, Jesus koʼalia nakloke ba sira dehan: ‘Lázaro mate ona.’” (João 11:11-14) Jesus halo Lázaro moris hiʼas hodi nia bele hamutuk fali ho ninia família. Jesus fó duni prezente folin-boot ba Lázaro nia família, loos ka lae?

Jesus fó moris-hiʼas ba ema naʼin-tolu. Tuir loloos, sira-neʼe mak ezemplu deʼit husi buat neʼebé Jesus sei halo iha futuru nuʼudar Liurai ba Maromak nia Ukun. a Kuandu Liurai Jesus ukun mundu tomak, nia sei fó moris-hiʼas ba ema neʼebé mate ona. Tan neʼe mak nia hatete: “Haʼu mak moris-hiʼas.” Hanoin toʼok, ita sei sente kontente tebes hodi hasoru fali ita-nia família no belun sira neʼebé mate ona! Nuneʼe mós, ita-nia família no belun sira neʼebé sei moris hiʼas, kontente tebes atu hasoru malu fali ho ita!—Lucas 8:56.

Jesus hatete ba Marta: “Ema neʼebé hatudu fiar mai haʼu, maski nia mate, nia sei moris fali; no ema naran deʼit neʼebé moris no hatudu fiar mai haʼu, nia sei nunka mate.” (João 11:25, 26) Ema sira neʼebé Jesus fó moris-hiʼas durante ninia ukun ba tinan 1.000 sei iha oportunidade atu moris ba nafatin se sira hatudu fiar ba Jesus.

Depois Jesus hatete tiha liafuan neʼe, Jesus husu ba Marta: “‘Ó fiar ida-neʼe ka lae?’ Nia dehan ba Jesus: ‘Loos Naʼi, haʼu fiar ona katak Ita mak Kristu, Maromak nia Oan-Mane.’” (João 11:26, 27) Oinsá ho Ita? Ita hakarak haburas fiar neʼebé hanesan ho Marta nian kona-ba esperansa moris-hiʼas ka lae? Se nuneʼe, hakat primeiru neʼebé Ita bele halo mak estuda kona-ba Maromak nia hakarak ba ema. (João 17:3; 1 Timóteo 2:4) Kuandu halo nuneʼe, Ita-nia fiar sei sai metin liu. Ita mós bele husu Testemuña ba Jeová atu hatudu ba Ita saida mak Bíblia hanorin kona-ba moris-hiʼas. Sira sei kontente atu esplika ba Ita kona-ba esperansa furak neʼe.