Hanesan ohin temi tiha ona, Naoko konsege husik ninia toman atu fuma sigarru. Kona-ba neʼe nia hatete: “Haʼu bele halo mudansa iha haʼu-nia moris tanba haʼu aprende lia-loos kona-ba Maromak nia hahalok sira no ninia hakarak.” Nia aprende buat sira-neʼe husi Bíblia. Maski Bíblia la temi kona-ba tabaku, maibé Bíblia ajuda ita atu komprende tansá Maromak la gosta haree ema fuma. a Tanba sira hatene ona Maromak nia hanorin, neʼe book ema barak atu husik sira-nia toman aat. (2 Timóteo 3:16, 17) Mai ita koʼalia kona-ba razaun tolu tansá fuma ladiʼak no buka-hatene saida mak Bíblia hanorin.

Iha tabaku laran iha droga ida naran nikotina. Droga ida-neʼe mak halo ema sai toman atu fuma no susar atu para. Nikotina bele halo ema matan-moris maibé mós bele halo ema sente kole. Kuandu ema fuma, neʼe halo nikotina tama lalais ba kakutak. Kuandu ema dada dala ida, neʼe hanesan simu nikotina doze ida. Se ema fuma sigarru masu ida, neʼe hanesan simu nikotina doze 200 iha loron ida deʼit, no ida-neʼe mak makaʼas liu fali droga seluk. Ema sai toman atu fuma tanba sira kona nikotina barak. Kuandu ema ida toman ona atu fuma, nia sente atu mate deʼit se nia la hetan nikotina.

Hodi haloos ita-nia hanoin no hadiʼa ita-nia toman, Bíblia hatete: “Imi hatene ka lae katak se imi sempre halo tuir ema ida, imi mak ninia atan?” (Roma 6:16) Se ema ida kaan tebes tabaku no ida-neʼe domina ninia hanoin no hahalok, nia sai hanesan atan ba toman aat neʼe. Maibé Maromak, neʼebé naran Jeová, nia hakarak ita atu sai livre, livre husi toman sira neʼebé estraga isin, no mós livre husi toman sira neʼebé estraga hanoin. (Salmo [Mazmur] 83:18; 2 Korinto 7:1) Nuneʼe, bainhira ema hafolin no respeitu liután Maromak Jeová, nia hatene katak nia tenke fó nia an tomak hodi serbí Maromak. Maibé nia la bele halo nuneʼe se nia sei sai atan ba toman aat neʼe. Hodi hatene ida-neʼe, neʼe sei book ema atu husik hakarak aat.

Olaf hela iha rai-Alemaña. Nia komesa fuma bainhira nia sei tinan 12. Nia fuma ba tinan 16 maibé ikusmai nia konsege husik ninia toman. Nia hatete katak sigarru primeiru mak hanesan fatuk kiʼik deʼit, maibé ikusmai toman neʼe sai hanesan rai monu neʼebé hanehan nia. Nia hatete: “Dala ida, haʼu-nia sigarru hotu ona, no tanba haʼu estrese tebes haʼu hili fali sigarru rohan hotu husi asbak, tau hamutuk tabaku no lulun ho jornál rohan ida. Agora kuandu haʼu hanoin fali kona-ba tempu neʼe haʼu moe tebes.” Oinsá mak Olaf bele husik toman aat neʼe? Nia hatete: “Importante liu mak haʼu hakarak halo kontente Maromak Jeová. Jeová hadomi ema hotu no fó esperansa  ba futuru. Neʼe kona loos haʼu-nia laran no halo haʼu forsa atubele husik toman neʼe no la monu fali.”

Livru ida kona-ba tabaku (The Tobacco Atlas) hatete: “Iha ona prova neʼebé hatudu katak fuma sigarru bele estraga ita-nia isin-lolon tomak no halo isin fraku hodi kona moras oioin no bele mate saugati deʼit.” Ema barak hatene ona katak fuma bele hamosu moras oioin hanesan kankru, moras iha fuan no pulmaun. Organização Mundial da Saúde (OMS) fó sai katak fuma mós bele halo ema kona moras hanesan TBC, neʼebé bele daʼet ba ema seluk.

Maromak Jeová hanorin ita liuhusi ninia Liafuan Bíblia, atu hanoin loloos kona-ba ita-nia moris, isin-lolon no ita-nia neon. Ninia Oan Jesus hanorin ita hodi dehan: “Ó tenke hadomi Jeová ó-nia Maromak ho ó-nia laran tomak, ho ó-nia moris tomak, no ho ó-nia neon tomak.” (Mateus 22:37) Maromak hakarak ita respeitu ita-nia isin no hafolin ita-nia moris. Bainhira ita aprende kona-ba Jeová no ninia promesa sira, ita agradese ba buat hotu neʼebé nia halo mai ita. Neʼe book ita atu sees an husi buat naran deʼit neʼebé hafoʼer ita-nia isin.

Jayavanth mak doutór ida iha rai-Índia neʼebé fuma ba tinan 38. Nia hatete: “Husi livru médiku nian haʼu aprende katak fuma mak perigu tebes. Haʼu hatene neʼe mak ladiʼak, no haʼu fó konsellu ba haʼu-nia pasiente sira atu tenkesér para. Maibé haʼu fali, maski haʼu koko dala lima ka neen atu para, haʼu la bele.” Saida mak ajuda Jayavanth husik toman neʼe? Nia hatete: “Tanba haʼu estuda Bíblia, neʼe ajuda haʼu atu la fuma tan. Haʼu hakarak tebes atu halo Jeová kontente no ida-neʼe halo haʼu husik kedas toman neʼe.”

Suar neʼebé ema hasai no suar husi tabaku neʼebé lakan hela mak hanesan venenu. Se ema horon beibeik suar neʼe, bele hamosu kankru no moras seluk. Tinan-tinan, ema naʼin-600.000 mate tanba dada suar sigarru nian, barak liu mak feto no labarik sira. Relatóriu ida husi OMS fó avizu katak: “Horon suar husi sigarru mak perigu tebes, maski uitoan deʼit.”

 Jesus dehan katak ukun-fuan primeiru mak ita tenke hadomi Maromak. Entaun ukun-fuan segundu mak saida? Neʼe mak ita tenke hadomi ema, hanesan ita-nia família, kolega sira no ema seluk. Nia hatete: “Ó tenke hadomi ó-nia maluk hanesan ó-nia an rasik.” (Mateus 22:39) Se ita iha toman neʼebé bele halo aat ba ema seluk, ita la iha domin ba ita-nia maluk. Domin neʼebé loos book ita atu halo tuir Bíblia nia matadalan: “Ema ida-idak tenke kontinua buka uluk ema seluk nia diʼak, laʼós nia rasik nia diʼak.”—1 Korinto 10:24.

Armen neʼebé hela iha Arménia hanoin fali uluk hodi hatete: “Haʼu-nia família sente ladiʼak tanba haʼu fuma, no sira obriga haʼu atu para. Maibé haʼu lakohi rekoñese katak haʼu-nia toman bele kona mós sira.” Nia esplika saida mak halo nia troka ninia hanoin: “Hanorin husi Bíblia no domin ba Jeová book haʼu atu husik haʼu-nia toman, no book haʼu atu rekoñese katak fuma neʼe lori perigu mai haʼu, no mós lori perigu ba sira neʼebé besik haʼu.”

Hanorin husi Bíblia mak ajuda Olaf, Jayavanth no Armen sai livre husi toman neʼebé estraga sira-nia an no mós ema seluk. Sira manán tiha ona toman aat neʼe, laʼós tan deʼit hatene fuma neʼe ladiʼak ba saúde, maibé tanba sira hadomi Maromak Jeová, no husi sira-nia laran rasik sira hakarak halo nia kontente. Eskritura iha 1 João 5:3 hatudu katak domin mak importante tebes hodi dehan: “Basá domin ba Maromak katak ita halo tuir ninia ukun-fuan sira; no ninia ukun-fuan sira la todan.” Maski la fasil atu sempre halo tuir Bíblia nia matadalan, maibé se ema ida hadomi tebes Maromak, la susar demais ba nia atu halo tuir.

Liuhusi programa edukasaun nian neʼebé halaʼo daudauk iha mundu tomak, Maromak Jeová ajuda ona ema rihun ba rihun sai livre husi tabaku. (1 Timóteo 2:3, 4) Lakleur tan, liuhusi ninia oan-mane Jesus nia Ukun, Maromak Jeová sei halakon kontratu-naʼin kaan-teen sira neʼebé halo ema barak sai atan ba tabaku. Problema boot kona-ba fuma, Maromak sei halakon ba nafatin. Ba ema neʼebé halo tuir nia, nia sei halo sira-nia isin no neon sai perfeitu.—Isaías (Yesaya) 33:24; Apokalipse 19:11, 15.

Se Ita agora daudauk luta hasoru hela toman neʼe, keta rende an. Hodi halo kleʼan Ita-nia domin ba Maromak Jeová no komprende tansá nia hakribi fuma, ida-neʼe bele book Ita atu manán hasoru fuma. Testemuña ba Jeová hakarak ajuda Ita atu aprende no halo tuir Bíblia nia matadalan. No Ita bele fiar katak, se Ita-nia laran hakarak tebes Maromak Jeová ajuda Ita, nia sei fó forsa duni ba Ita atu la sai atan tan ba tabaku.—Filipe 4:13.