Haʼu boot iha sidade Montreál, iha bairru ida neʼebé iha krime barak. Bainhira haʼu fulan neen deʼit, haʼu-nia aman mate. Tan neʼe, haʼu-nia inan mesak mak tenke tau matan ba ami oan naʼin-ualu, no haʼu mak oan-ikun.

Bainhira haʼu sei labarik, haʼu aprende ona uza droga, taru osan, halo violénsia, no ransu ho ema kriminozu sira. Haʼu foin tinan sanulu deʼit, haʼu mós komesa ona serbisu ba feto-aat sira no ba ema sira neʼebé fó debe osan atu manán fali osan-funan boot. Haʼu toman bosok ema, no gosta halo ema monu ba haʼu-nia lasu.

Bainhira haʼu tinan 14, haʼu sai matenek ona atu lohi ema. Porezemplu, haʼu hola osan-mean falsu hanesan relójiu, kelu no kadeli sira, no haʼu faʼan sasán sira-neʼe iha dalan ka iha loja boot nia oin hodi bosok ema katak neʼe mak osan-mean duni. Haʼu manán osan barak, neʼe halo haʼu haksolok. Dala ida, haʼu manán osan $8.000 iha loron ida deʼit nia laran!

Ema hatama haʼu ba eskola ba joven sira neʼebé nakar, maibé eskola neʼe mós hasai tiha haʼu. Haʼu tinan 15 deʼit, no la iha hela-fatin. Haʼu toba deʼit iha dalan ninin, jardín, ka dala ruma iha kolega sira-nia uma.

Tanba haʼu toman bosok ema, polísia sira investiga haʼu beibeik. Maibé sira la bele hatama haʼu ba komarka tanba haʼu laʼós naʼok sasán mak faʼan fali. Maski nuneʼe, dala barak haʼu tenke selu multa tanba haʼu lohi ema atu manán osan ka faʼan sasán la ho lisensa. Haʼu nunka taʼuk ema ida, tan neʼe dala ruma ema husu haʼu atu bá sisi osan husi debedór sira. Neʼe mak serbisu neʼebé perigu tebes no haʼu tenke lori kilat. Dala ruma haʼu mós serbisu hamutuk ho máfia sira.

Haʼu foin rona kona-ba Bíblia bainhira haʼu tinan 17. Iha tempu neʼebá, haʼu hela hamutuk ho haʼu-nia namorada, no nia komesa estuda Bíblia ho Testemuña ba Jeová. Maibé haʼu la gosta Bíblia nia morál tanba haʼu sente neʼe kesi metin ema nia moris. Tan neʼe, haʼu husik tiha nia no bá hela fali ho haʼu-nia namorada ida seluk.

 Maibé ikusmai haʼu-nia namorada ida seluk neʼe mós hahú estuda Bíblia ho Testemuña ba Jeová! Nia komesa troka ninia hahalok no sai ema laran-maus no pasiénsia-naʼin. Ida-neʼe halo haʼu hakfodak loos, no loron ida haʼu simu konvite atu asiste Testemuña ba Jeová nia reuniaun. Bainhira ami toʼo iha reuniaun-fatin, ema barak simu haʼu ho laran-diʼak tebes no hatudu hahalok furak loos. Haʼu sente hanesan haʼu tama iha mundu seluk! Loloos, neʼe mak buat neʼebé haʼu hakarak simu husi kiʼik kedas. Haʼu-nia família nunka hatudu domin hanesan neʼe mai haʼu, no la iha ema ida mak hatudu laran-diʼak mai haʼu. Tan neʼe, bainhira Testemuña ba Jeová konvida haʼu atu estuda Bíblia, haʼu simu ho kontente.

Haʼu fiar duni katak estuda Bíblia salva haʼu-nia moris. Iha tempu neʼebá, haʼu iha debe boot toʼo $40.000 liu tanba haʼu lakon taru-osan. Tan neʼe, haʼu halo planu ho haʼu-nia maluk naʼin-rua atu naʼok ema nia osan hodi bele selu fali haʼu-nia debe. Maibé haʼu kontente ikusmai haʼu la halo ida-neʼe! Tanba haʼu-nia maluk naʼin-rua neʼebé bá naʼok duni, polísia kaer tiha ida no oho tiha ida seluk.

Nuʼudar haʼu kontinua estuda Bíblia, haʼu hatene katak haʼu presiza duni troka haʼu-nia hahalok. Porezemplu, iha 1 Korinto 6:10 dehan: “Naʼok-teen, ka kaan-teen, ka lanu-teen, ka koʼalia aat ema seluk, ka lohi ema atu manán osan, sira sei la hetan Maromak nia Ukun.” Bainhira haʼu lee eskritura neʼe, haʼu hanoin fali sala hotu neʼebé haʼu halo ona toʼo haʼu-nia matan-been suli. Haʼu mak ema siʼak-teen no halo violénsia no mós bosok-teen. Haʼu tenkesér troka duni haʼu-nia moris tomak.—Roma 12:2.

Maibé haʼu mós aprende katak Jeová mak Maromak laran-luak no prontu fó perdua ema nia sala. (Isaías [Yesaya] 1:18) Haʼu halo orasaun ho laran ba Maromak Jeová atubele ajuda haʼu husik tiha haʼu-nia toman aat sira-neʼe. Ikusmai ho Jeová nia ajuda, haʼu bele troka haʼu-nia hahalok. Liuliu bainhira haʼu ho haʼu-nia namorada kaben ona, neʼe mak mudansa boot iha ami-nia moris.

Bainhira haʼu tinan 24, haʼu iha ona oan naʼin-tolu, tan neʼe haʼu tenke buka serbisu. Maibé haʼu la eskola, no mós la iha esperiénsia ka matenek ruma atu hakerek iha haʼu-nia CV. Dala ida tan, haʼu harohan ba Maromak Jeová. Atubele hetan serbisu, haʼu bá tuir entrevista barak, haʼu koʼalia ba patraun sira katak haʼu hakarak troka haʼu-nia moris no halo serbisu ho laran-moos. Haʼu mós esplika katak haʼu estuda Bíblia no hakarak sai sidadaun diʼak ida. Maibé la iha patraun ida mak simu haʼu. Iha entrevista ikus, haʼu koʼalia nakloke kona-ba haʼu-nia moris uluk nian, no ema neʼebé halo entrevista ba haʼu dehan: “Haʼu la hatene tansá, maibé haʼu sente hanesan buat ruma mak haruka haʼu tenke simu ó serbisu iha ami-nia fatin.” Haʼu fiar duni neʼe mak resposta ba haʼu-nia orasaun. Liutiha tempu balu, haʼu ho haʼu-nia feen hetan batizmu nuʼudar Testemuña ba Jeová.

Haʼu moris toʼo ohin loron tanba haʼu halo tuir Bíblia. Haʼu kontente ho haʼu-nia moris família nian. Haʼu fiar katak Maromak Jeová fó perdua ona ba haʼu-nia sala, no haʼu sente laran-moos.

Durante tinan 14 nia laran, haʼu uza oras 70 fulan-fulan atu haklaken no hanorin Bíblia ba ema, no foin daudauk haʼu-nia feen mós komesa hola parte iha knaar ida-neʼe. Durante tinan 30 neʼe nia laran, haʼu ajuda ona haʼu-nia kolega naʼin-22 iha serbisu-fatin atu sira mós bele adora Maromak Jeová, ida-neʼe halo haʼu haksolok tebes. Ohin loron mós haʼu bá beibeik loja boot sira, laʼós atu lohi tan ema, maibé atu haklaken esperansa kona-ba mundu foun neʼebé la iha tan ema lohidór sira.—Salmo (Mazmur) 37:10, 11.