Bíblia fó sai katak Job mak “ema neʼebé laran-loos” no Lot mak “ema loos”. (Jó [Ayub] 1:1; 2 Pedro 2:8) Bíblia mós fó sai katak Liurai David “halo buat neʼebé loos deʼit” iha Maromak nia oin. (1 Reis [Raja-Raja] 14:8) Maibé, se ita buka-hatene didiʼak kona-ba sira naʼin-tolu nia istória, ita bele hatene katak (1) sira mós halo sala, (2) ita bele aprende buat barak husi sira-nia ezemplu, no (3) ema sala-naʼin mós bele duni halo Maromak kontente.

Job hasoru susar no terus barak neʼebé halo nia sente la iha justisa. Ikusmai, nia komesa hanoin sala katak, Maromak sei la interese ba nia maski nia fiar metin nafatin ka la fiar tan ba Maromak. (Jó [Ayub] 9:20-22) Job nia hanoin sai kleʼuk tebes toʼo halo nia sente nia mak loos liu fali Maromak.—Jó (Ayub) 32:1, 2; 35:1, 2.

Lot demora tebes atu foti desizaun neʼebé loos. Nia sente laran-susar tanba nia hela iha sidade  Sodoma no Gomorra neʼebé nakonu ho ema aat no hahalok la morál. (2 Pedro 2:8) Tan neʼe, bainhira Maromak fó-hatene ba Lot katak Nia sei halakon Sodoma no Gomorra, Nia haruka Lot ho ninia família sai husi sidade aat neʼe. Tuir loloos, Lot tenke halai sai kedas, maibé nia demora tebes atu halo tuir Maromak nia avizu. Nuneʼe, Maromak nia anju sira mak tenke kaer Lot ho ninia família nia liman, no lori sira sai husi sidade neʼe.—Gênesis (Kejadian) 19:15, 16.

David mós halo sala boot. Nia la kontrola nia an no halo sala-foʼer ho ema nia feen. Tuirmai, atu taka sala neʼe, David halo planu oho feto neʼe nia la’en. (2 Samuel, kapítulu 11) Bíblia dehan katak buat neʼebé David halo mak “aat tebes iha Jeová nia oin”.—2 Samuel 11:27.

Job, Lot no David, sira hotu halo sala, no sala balu neʼebé sira halo mak todan tebes. Maski nuneʼe, sira naʼin-tolu hakarak halo tuir Maromak ho laran tomak. Tan neʼe, sira hakribi sira-nia sala no troka sira-nia hahalok. Ida-neʼe halo Maromak kontente, ikusmai Bíblia temi katak sira mak ema laran-loos no fiar metin.

Tanba ita mak ema sala-naʼin, ita halo sala beibeik. (Roma 3:23) Maibé se ita halo sala ruma, tenke hakribi sala neʼebé ita halo, no tuirmai, presiza troka ita-nia hahalok.

Saida deʼit mak Job, Lot no David halo atu hadiʼa sira-nia sala? Job mak mane neʼebé fiar-naʼin no laran-metin. Bainhira Maromak fó-hatene nia atu troka ninia hanoin sala, nia halo tuir kedas no nia dada fali liafuan sala neʼebé nia koʼalia ona. (Jó [Ayub] 42:6) Lot mós halo Maromak  kontente tanba nia sente laran-susar ba ema nia hahalok aat iha sidade Sodoma no Gomorra. Maibé ninia sala mak nia demora atu halo tuir Maromak nia liafuan. Maski nuneʼe, nia halai sai duni husi sidade aat neʼe no halo tuir Maromak nia mandamentu hodi la hateke fali ba kotuk, ba buat neʼebé nia husik ona. Nuneʼe mós ho David, maski nia halo sala boot kontra Maromak nia ukun-fuan, nia hakribi ninia sala ho laran no husu Maromak nia laran-sadiʼa.—Salmo (Mazmur) 51.

Maromak hatene duni katak nuʼudar ema sala-naʼin, Job, Lot no David dala ruma halo sala, maibé Nia nafatin simu sira. Bíblia dehan katak Maromak “hatene loloos oinsá mak nia kria ita, nia hanoin-hetan katak ita mak rai-rahun deʼit”. (Salmo [Mazmur] 103:14) Loos, Maromak hatene ita ema la bele sees husi sala, maibé Nia hakarak ita halo saida?

Atu hatán ba pergunta neʼe, mai ita lee David nia liafuan ba ninia oan Salomão. Nia dehan: “Salomão, haʼu-nia oan, hatene ó-nia aman nia Maromak bá no serbí nia ho laran tomak.” (1 Crônicas [Tawarikh] 28:9) “Laran tomak” la dehan katak tenke iha laran neʼebé perfeitu, maibé neʼe katak laran neʼebé hadomi tebes Maromak, hakarak duni halo tuir Nia, no prontu atu simu Ninia hanorin ho haraik-an. Job, Lot no David hadomi tebes Maromak no hakarak duni halo tuir Nia, tan neʼe mak Maromak nia Liafuan dehan, Job mak “ema neʼebé laran-loos”, Lot mak “ema loos”, no David “halo buat neʼebé loos deʼit” iha Maromak nia oin. Maski sira naʼin-tolu halo sala, maibé sira bele duni halo Maromak nia laran kontente.

Tan neʼe, se hanoin sala ruma mosu iha ita-nia neon ka ita koʼalia buat ruma neʼebé aat ka halo sala neʼebé ikusmai halo ita sente triste, mai ita hanoin-hetan fali ezemplu diʼak sira-neʼe. Keta husik ita-nia sala halo ita mout no sente laran-tun. Maromak hatene katak ita mak ema sala-naʼin. Se ita hadomi Maromak ho laran tomak no hakaʼas an halo tuir Nia, ita bele fiar duni katak ita halo Maromak nia laran kontente.