Iha Domingu kalan, loron 24 Fevereiru tinan 1924, Estudante Bíblia sira a uza estasaun rádiu, WBBR, hodi halo tranzmite ba dala primeiru. Broadcasting primeiru neʼebé fó sai iha rádiu mak hanesan saida? Sé deʼit mak rona? No oinsá mak Testemuña ba Jeová kontinua uza teknolojia atu habelar “liafuan diʼak kona-ba Maromak nia Ukun iha mundu tomak”?—Mateus 24:14.

 Programa primeiru hahú husi tuku 8.30 kalan no laʼo ba oras rua. Programa neʼe fó sai husi estúdiu ida neʼebé foin harii iha Staten Island, Estadus Unidus. Irmaun Ralph Leffer neʼebé tau matan ba áudio, dehan: “Ema hotu iha estúdiu fatin sente laran-manas no mós laran-taridu. Ema sei rona ka lae? Ami komesa fó sai programa hodi hein katak buat hotu laʼo diʼak.”

 Irmaun Victor Schmidt neʼebé tau matan ba estúdiu, nia mak sai aprezentadór ba programa istóriku neʼe. Nia komesa programa hodi konvida irmaun-irmán sira neʼebé matenek kanta no toka múzika, sira hotu mak Estudante Bíblia. Primeiru, ema ida mak toka uluk pianu. Depois, irmán Cora Wellman kanta knananuk “The Ninety and Nine” ka sianulu-resin-sia bazeia ba Jesus nia ai-knanoik kona-ba bibi neʼebé lakon. (Lucas 15:4-7) Tuirmai ema seluk mós kanta, inklui irmaun Frederick W. Franz, nia kanta knananuk “The Penitent” ka ema neʼebé arrepende an, knananuk neʼe kona-ba oan neʼebé lakon.—Lucas 15:11-25.

 Joseph F. Rutherford, neʼebé tau matan ba Estudante Bíblia iha tempu neʼebá, hatoʼo diskursu ida hodi inaugura estasaun rádiu, hodi dehan: “Neʼe uza ba Mesias nia ukun.” Nia hatete: “Tanba Maromak fó lisensa ba ema atu kria rádiu iha tempu neʼe, klaru katak nia mós hakarak ita atu uza hodi hanorin ema kona-ba ninia profesia sira.”

 Ema barak neʼebé rona programa ba dala primeiru husi rádiu mak sira neʼebé hela iha Estadus Unidus parte leste. Mane ida neʼebé hela dook husi estasaun rádiu maizumenus kilómetru 320 iha Morrisville, Vermont, hatete: “Haʼu kontente atu dehan katak . . . Haʼu rona Rutherford nia lian moos tebes. . . . La iha liafuan ida mak lakon.” Mane ida husi Monticello, Florida mós bele rona programa neʼe. Estasaun rádiu foun neʼe hetan susesu neʼebé boot, no ema barak haruka karta atu hatoʼo agradese.

 Estasaun rádiu neʼe kontinua fó sai mensajen kona-ba Maromak nia Ukun durante tinan 33, b liuliu ba área sira iha Estadus Unidus parte leste. Maibé dala ruma, WBBR liga mós ba estasaun rádiu sira seluk no neʼe toʼo ba rona-naʼin millaun ba millaun iha Estadus Unidus, Kanadá, no fatin sira neʼebé dook tebes. Informasaun husi 1975 Yearbook of Jehovah’s Witnesses, hatete: “Iha tinan 1933, estasaun rádiu tranzmite informasaun ba ema barak tebes, sira uza estasaun 408 atu hatoʼo mensajen ba kontinente neen hodi fó sai diskursu Bíblia hamutuk 23.783 . . . Iha tempu neʼebá, ita-nia organizasaun nia programa bele loke husi estasaun oioin iha tempu neʼebé hanesan. Ema iha fatin oioin neʼebé rona rádiu bele rona kona-ba lia-loos neʼebé lori glória ba Maromak.”

 Bainhira Estudante Bíblia komesa uza WBBR, haklaken-naʼin 1.064 mak iha Estadus Unidus. Programa neʼe ajuda irmaun-irmán sira iha tempu neʼebá atu habelar liafuan diʼak ba ema barak tan. Maibé iha tinan 1957 iha ona haklaken-naʼin 187.762 iha Estadus Unidus no 653.273 iha mundu tomak. No mós, bainhira irmaun-irmán sira simu tiha treinu iha reuniaun, sira ho laran-manas komesa haklaken diʼak liután husi uma ba uma no haklaken iha dalan seluk tan.

 Tanba irmaun-irmán sira sai matenek liután kona-ba haklaken husi uma ba uma, irmaun sira neʼebé tau matan ba organizasaun iha tempu neʼebá komesa hanoin kona-ba se diʼak nafatin atu uza estasaun rádiu ka lae. Ikusmai, sira deside atu faʼan estasaun rádiu WBBR, estasaun ida deʼit neʼebé Associação Watchtower iha. Estasaun rádiu neʼe faʼan iha loron 15 Abríl 1957. Loron ida antes neʼe, programa ikus kona-ba despedida, irmaun Nathan H. Knorr esplika kona-ba tanbasá mak faʼan estasaun neʼe. Nia hatete katak Testemuña ba Jeová aumenta barak liután tanba rezultadu husi haklaken husi uma ba uma. Nia dehan: “Klaru katak ema barak hetan ona ajuda husi programa iha WBBR. Maibé, iha área neʼebé labele rona WBBR, númeru ba Testemuña ba Jeová aumenta liután hanesan ho área neʼebé bele rona WBBR.” Tan neʼe, irmaun sira halo konkluzaun katak haklaken husi uma ba uma mak diʼak liu duké rádiu. Maibé, neʼe laʼós dala ikus neʼebé Testemuña ba Jeová halo tranzmite hodi habelar liafuan diʼak. Tinan barak liutiha organizasaun uza fali maibé iha dalan oin seluk.

 Iha loron 6 Outubru 2014, Testemuña ba Jeová kontente tebes hodi haree organizasaun fó sai estasaun televizaun liuhusi internét neʼebé hanaran JW Broadcasting. Fulan-fulan, Testemuña sira no ema seluk bele haree kedas liuhusi website, aplikasaun JW Library, ka sasán eletróniku. c Iha rai balu, Testemuña ba Jeová sei uza rádiu no televizaun atu haklaken liafuan diʼak.

 Iha tinan hirak neʼe nia laran, Jeová nia organizasaun uza estasaun rádiu no televizaun husi kompañia oioin atu tranzmite reuniaun semana-semana no mós reuniaun boot sira ba área neʼebé koneksaun internét ladún diʼak. Ema neʼebé laʼós Testemuña mós bele rona programa sira-neʼe, no ema barak hakarak atu estuda Bíblia. Porezemplu, entre tinan 2021 no 2022, manajer sira husi estasaun rádiu fó-hatene ba sukursál Áfrika Leste katak ema sira neʼebé laʼós Testemuña mós hafolin tebes reuniaun sira-neʼe. Rona-naʼin sira husi rai-Kénia, Sudaun Súl, no Tanzánia mós husu atu estuda Bíblia.

 Dala barak liu Testemuña ba Jeová haklaken husi uma ba uma, haklaken ho karrosa, no uza website jw.org hodi fahe liafuan diʼak kona-ba Maromak nia Ukun iha mundu tomak. Iha website neʼe, ema bele lee Bíblia no mós publikasaun seluk neʼebé bazeia ba Bíblia iha língua 1.080 liu, no buat hotu neʼe mak gratuitu. Sira mós bele hetan resposta ba pergunta kona-ba Bíblia no mós bele hetan fatin no oras ba reuniaun sira. Rezultadu mak ema barak liután rona kona-ba Maromak nia Ukun. Hanesan Bíblia fó-hatene nanis, liafuan diʼak neʼe haklaken daudaun “iha mundu tomak”.—Mateus 24:14.