Haʼu hadomi lia-loos husi tempu neʼebé haʼu sei kiʼik. Haʼu hakarak atu dedika haʼu-nia an ba Jeová no hetan batizmu. Bainhira haʼu tinan 13, haʼu kontente tebes tanba bele kumpre planu espirituál neʼe. Bainhira haʼu tinan 14, irmaun Helge Linck a husu se haʼu hakarak serbí nuʼudar pioneiru ida ka lae. Haʼu hanoin-hetan memória neʼe ho klaru. Maski haʼu-nia inan-aman serbí nuʼudar pioneiru temporáriu (agora bolu nuʼudar pioneiru estra), haʼu la hatene buat ida kona-ba pioneiru regulár. Irmaun Linck nia pergunta neʼe halo haʼu iha hakarak atu halo buat barak liután iha Jeová nia serbisu.

 Iha tinan 1974, mosu problema polítiku iha Etiópia. Polísia kaer ema barak, no ema barak mós mate. Iha tempu neʼebá, ami labele haklaken husi uma ba uma no ami hasoru malu grupu kiʼik deʼit. Haʼu-nia inan-aman komesa prepara ami atu hasoru susar barak liután iha futuru. Bíblia nia prinsípiu sira ajuda ami komprende tanbasá ema Kristaun presiza neutrál. Ami aprende katak Jeová sei ajuda ami hatene oinsá atu hatán se ema husu pergunta, no hatene bainhira mak ami presiza nonook.—Mateus 10:19; 27:12, 14.

 Depois remata eskola, haʼu serbisu iha kompañia aviaun naran Ethiopian Airlines. Iha dadeer ida kuandu haʼu bá serbisu, haʼu-nia kolega serbisu fó parabéns ba haʼu tanba haʼu hetan knaar atu hola parte iha serimónia hodi komemora governu nia aniversáriu. Haʼu fó-hatene kedas ba haʼu-nia xefe katak nuʼudar ema Kristaun, haʼu neutrál kona-ba buat polítiku, entaun haʼu sei la partisipa iha selebrasaun neʼe.

 Loron tuirmai, haʼu serbisu hela iha aeroportu, no husi dook, haʼu haree mane sira neʼebé tara kilat iha sira-nia kabaas laʼo mai billete fatin. Haʼu hanoin katak sira mai atu kaer ema ruma neʼebé koko atu halai sai husi nasaun neʼe. Maibé, sira hatudu haʼu! Haʼu hanoin tanbasá sira buka haʼu. Haʼu komesa haʼu-nia loron hanesan baibain maibé buat hotu troka derrepente.

 Soldadu sira lori haʼu ba eskritóriu ida no iha neʼebá mak ema interroga haʼu ba oras balu. Sira husu: “Sé mak selu Testemuña ba Jeová? Ó serbisu ba Frente de Libertação da Eritreia ka? Ó ka ó-nia apá serbisu ba governu Estadus Unidus ka?” Maski situasaun neʼe bele halo estrese boot, maibé haʼu sente kalma tanba Jeová ajuda haʼu.—Filipe 4:6, 7.

 Depois interroga tiha haʼu, soldadu sira tula haʼu ba uma ida neʼebé sira halo sai prizaun no sira hatama haʼu ba sala ida ho luan metru kuadradu 28, neʼebé iha ona feto sira maizumenus naʼin-15 neʼebé sira kaer tanba sira-nia atividade polítiku.

 Kalan neʼe, nuʼudar haʼu latan iha rai ho haʼu-nia farda serbisu nian, haʼu laran-taridu tanba hatene katak haʼu-nia inan-aman no alin sira sei hanoin barak kona-ba haʼu. Sira hatene ema kaer haʼu, maibé sira la hatene haʼu iha neʼebé. Haʼu husu Jeová atu ajuda haʼu-nia família hatene haʼu iha neʼebé.

 Bainhira haʼu hadeer dadeer tuirmai, haʼu haree guarda joven ida neʼebé haʼu koñese. Nia hakfodak haree haʼu no dehan: “Aster, ó halo saida iha neʼe?” Haʼu husu nia atu bá haʼu-nia inan-aman nia uma no fó-hatene sira haʼu iha neʼebé. Lakleur, haʼu simu hahán no roupa husi haʼu-nia inan-aman. Guarda neʼe mak fó-hatene sira kona-ba haʼu-nia fatin. Jeová rona haʼu-nia orasaun! Esperiénsia neʼe halo haʼu fiar katak haʼu la mesak.

 Sira la fó lisensa ba haʼu atu iha Bíblia ka publikasaun sira, no haʼu-nia família no kolega labele mai vizita haʼu. Maski nuneʼe, Jeová fó anima haʼu liuhusi prizioneira sira seluk. Haʼu haklaken ba sira loroloron, no sira interese ho lia-loos kona-ba Maromak nia Ukun. Dala barak sira hatete mai haʼu: “Ami iha neʼe defende ema nia governu, maibé ó defende Maromak nia governu. Keta rende an, maski sira ameasa atu oho ó!”

 Dala ruma, guarda sira interroga no baku prizioneiru sira. Kalan ida, maizumenus tuku 11, sira mai buka haʼu. Bainhira toʼo iha sala interrogasaun, sira duun haʼu kona-ba buat oioin. Sira dehan katak haʼu la apoia governu. No bainhira haʼu la temi sira-nia slogan polítiku, guarda mane naʼin-rua baku haʼu. Guarda sira lori haʼu ba sala interrogasaun dala balu. Kada tempu ida-idak, haʼu halo orasaun makaʼas ba Jeová, no haʼu sente nia apoia haʼu.

 Depois fulan tolu, guarda ida mai no fó-hatene haʼu katak haʼu livre ona. Maski haʼu hakfodak no kontente, maibé haʼu mós triste uitoan tanba haʼu gosta tebes fahe esperansa husi Maromak nia Ukun ba feto joven sira iha prizaun laran.

 Fulan balu depois haʼu livre husi prizaun, bainhira haʼu sai hela, soldadu sira mai kaer haʼu-nia alin balu! Sira kaer haʼu-nia alin-feto naʼin-rua no haʼu-nia alin-mane ida. Iha tempu neʼebá, haʼu deside katak diʼak liu haʼu sai husi rai neʼe. Maski haʼu triste tebes atu husik fali haʼu-nia família, haʼu-nia amá anima haʼu atu sai brani no tau fiar ba Jeová. Lakleur depois neʼe, haʼu ba Estadus Unidus. Iha loron neʼebé hanesan, soldadu sira bá haʼu-nia uma atu kaer haʼu ba dala segundu. Bainhira sira la hetan haʼu iha uma, sira ba lalais aeroportu. Maibé bainhira sira toʼo iha aeroportu, haʼu-nia aviaun semo tiha ona.

 Haʼu toʼo iha Maryland no kaben-naʼin ida naran Haywood no Joan Ward simu haʼu, sira mak misionáriu neʼebé uluk estuda Bíblia ho haʼu-nia inan-aman. Fulan lima tuirmai, haʼu kumpre haʼu-nia planu hodi sai pioneiru ida. Família Ward nia oan-feto, Cyndi, sai haʼu-nia kolega pioneiru, no ami iha esperiénsia furak barak hamutuk iha serbisu haklaken.

 Iha tempu manas iha tinan 1979, haʼu vizita Betel iha Novaiorke no hasoru irmaun Wesley Parker. Haʼu gosta ninia hahalok diʼak oioin no ninia planu espirituál sira. Iha tinan 1981, ami kaben no haʼu muda ba Wallkill, Novaiorke, atu serbí hamutuk iha Betel. Haʼu simu knaar atu hamoos kuartu no fase roupa, no tuirmai iha Departamentu Komputadór ho team MEPS. Tanba serbí iha Betel, haʼu iha oportunidade atu uza haʼu-nia tempu hotu atu serbí Jeová. Haʼu mós bele koñese irmaun-irmán sira neʼebé ikusmai sai haʼu-nia belun toʼo ohin loron.

 Maibé iha Etiópia, haʼu-nia família hetan terus makaʼas, no neʼe halo haʼu estrese. Haʼu-nia alin naʼin-tolu seidauk sai husi prizaun. b Loroloron haʼu-nia amá tenke prepara no lori hahán ba sira tanba prizaun la fó hahán ba sira.

 Durante tempu estrese neʼe, Jeová mak haʼu-nia fatin protesaun, no família Betel mós fó kmaan no apoia haʼu. (Marcos 10:29, 30) Loron ida, irmaun John Booth hatete mai haʼu: “Ami kontente tebes Ita serbí iha Betel neʼe. Se laʼós tanba Jeová nia bensaun, imposivel atu Ita serbí iha neʼe agora.” c Liafuan sira-neʼe fó fiar mai haʼu katak Jeová haraik bensaun ba haʼu-nia desizaun atu sai husi Etiópia no Jeová sei tau matan haʼu-nia família.

 Iha fulan-Janeiru 1989, haʼu foin hatene katak haʼu isin-rua. Foufoun, ami hakfodak tebetebes! Liutiha loron balu, ami-nia laran-taridu troka fali sai kontente. Maibé, ami hanoin barak kona-ba ami sei sai inan-aman neʼebé diʼak ka lae, ami sei hela iha neʼebé, no oinsá ami bele sustenta ami-nia moris bainhira sai husi Betel.

 Iha loron 15 Abríl 1989, ami tau ami-nia sasán hotu iha karreta laran no ami komesa viajen ba Oregon, ami planu atu kontinua serbí nuʼudar pioneiru iha fatin neʼe. Maibé, lakleur depois ami toʼo iha neʼebá, kolega balu ho laran-diʼak hatete katak diʼak liu ami la foti pioneiru. Ami hatene katak ami iha osan uitoan deʼit no lakleur tan ami sei iha oan. Saida mak ami sei halo? Iha tempu hanesan neʼe, ami simu vizita husi katuas área, irmaun Guy Pierce no ninia feen Penny. d Sira anima ami atu kumpre ami-nia planu espirituál neʼe. Entaun ami komesa serbí nuʼudar pioneiru no tau fiar katak Jeová sei ajuda ami. (Malaquias 3:10) Lakleur, ami-nia oan primeiru Lemuel moris no liutiha tempu balu, ami-nia oan segundu Jadon moris, no ami kontinua serbí nuʼudar pioneiru.

 Pioneiru hamutuk ho ami-nia oan sira neʼebé sei kiʼik mak esperiénsia neʼebé ami hafolin tebes. Serbisu pioneiru fó ami oportunidade barak atu esplika lia-loos husi Bíblia laʼós deʼit ba ema seluk maibé mós ba ami-nia oan sira. (Deuteronómio 11:19) Maibé, depois ami-nia oan-mane terseiru Japheth moris, ami presiza para serbisu pioneiru ba tempu balu.—Miqueias 6:8.

 Ami hatene katak responsabilidade importante liu ba inan-aman mak atu ajuda oan koñese didiʼak Jeová no sai belun ho Jeová. Atu halo ida-neʼe, ami hakaʼas an atu halaʼo adorasaun família iha dalan neʼebé halo oan sira kontente. Bainhira sira sei kiʼik tebes, ami lee hamutuk livru Mendengar kepada Guru yang Agung no Livru Istória husi Bíblia. Ami mós halo drama kona-ba istória balu. Haʼu mak feto mesak iha uma laran, entaun bainhira ami halo drama kona-ba Jezabel, haʼu mak sai Jezabel. Oan sira gosta tebes atu finje dudu haʼu husi sofá no finje sai asu sira. No Wesley mós estuda Bíblia ho labarik ida-idak.

 Ami hadomi no tau matan ami-nia oan sira, ami halo orasaun katak ami-nia relasaun sei metin ba malu. Nuʼudar sira sai boot, ami hanorin sira atu halo serbisu oioin. Sira fase bikan, hamoos sira-nia kuartu, no fase sira-nia roupa. Sira mós aprende atu teʼin.

 Laʼós oan deʼit mak aprende maibé ami rasik mós aprende. Dala ruma, ami sai hirus lalais no hasai liafuan neʼebé kroʼat ba malu ka ba ami-nia oan. No bainhira neʼe akontese, ami hatudu haraik an no husu deskulpa.

 Ami konvida beibeik irmaun-irmán iha ami-nia kongregasaun atu ransu hamutuk iha ami-nia uma, no ami mós konvida ema Betel sira neʼebé mai vizita, misionáriu, katuas área no sira neʼebé serbí iha fatin neʼebé presiza haklaken-naʼin. (Roma 12:13) Bainhira ami simu bainaka, ami la haruka oan sira tama kuartu laran atu halimar. Ami husik sira atu goza tempu hamutuk hodi konversa no rona esperiénsia sira. Ami-nia oan sira hanoin-hetan buat oioin neʼebé ami koʼalia hamutuk, dala barak sira mak iha memória diʼak liu fali haʼu no Wesley.

 Wesley no haʼu hakaʼas an atu ami-nia família tomak kontente iha Jeová nia serbisu. Porezemplu, ami halo planu nanis, rai osan no rai loron feriadu atu ami bele bá rai oioin. Iha ami-nia viajen ida-idak, ami vizita sukursál, tuir reuniaun sira, no bá haklaken. Neʼe halo ami hafolin Jeová nia organizasaun iha mundu tomak, no ami-nia relasaun nuʼudar família sai besik liután ba malu.

 Ami nota katak iha ami-nia área, ema barak koʼalia lian Españól, maibé ladún iha ema neʼebé bá haklaken beibeik ba sira. Entaun bainhira ami-nia oan sira sei kiʼik tebes, ami husu irmaun Pierce nia hanoin kona-ba muda ba kongregasaun lian Españól. Nia hatán ho oin-midar: “Se Ita mak peskadór ida, Ita bá fatin neʼebé iha ikan.” Tanba ninia liafuan neʼe, ami muda ba kongregasaun lian Españól iha Woodburn, Oregon. Ami kontente tebes bele komesa estudu Bíblia ho ema barak neʼebé ikusmai hakbesik an ba Jeová, ajuda ema balu hetan batizmu no haree oinsá grupu lian Españól neʼebé kiʼik ikusmai sai kongregasaun ida.

 Loron ida, Wesley lakon ninia serbisu no ami tenke muda ba Kalifórnia tanba Wesley hetan serbisu seluk. Tinan rua tuirmai, Lemuel, Jadon no haʼu deside atu komesa pioneiru. Iha tinan 2007, haʼu kontente tanba bele tuir eskola serbisu pioneiru hamutuk ho sira. Lakleur depois eskola pioneiru, ami nota katak iha ami-nia área, ema barak koʼalia lian Árabe. Ami tuir kongregasaun lian Españól ba tinan 13 ona, maibé ami-nia família deside atu muda ba kongregasaun lian Árabe. Ami kontente atu fahe lia-loos ba imigrante sira neʼebé koʼalia lian Árabe no mós hola parte iha kampaña espesiál atu haklaken iha rai seluk. Ami kontinua serbí nuʼudar pioneiru hodi haklaken ba ema neʼebé koʼalia lian Árabe iha San Diego, Kalifórnia.

 Wesley mak laʼen no ulun ba família neʼebé diʼak tebes. Nia hatudu respeitu kleʼan ba Jeová nia organizasaun. Nia nunka hatete buat negativu kona-ba Betel ka arranju iha kongregasaun. Duké halo nuneʼe, nia sempre koʼalia buat pozitivu. Nia halo orasaun ho haʼu no ba haʼu, no bainhira ami hasoru situasaun neʼebé lori estrese, ninia orasaun halo haʼu sente kmaan no ajuda haʼu atu nafatin kalma.

 Kuandu haʼu hanoin fila fali, ami goza duni ami-nia moris atu serbí Jeová tempu tomak, haboot oan sira, no serbí iha kongregasaun sira neʼebé presiza ajuda. Ami haree ona katak Jeová haraik bensaun ba ema neʼebé tau uluk Ninia hakarak, no ami nunka falta buat ida. (Salmo 37:25) Haʼu fiar metin katak hili atu fó moris tomak ba Jeová mak desizaun neʼebé diʼak liu hotu neʼebé haʼu halo ona iha haʼu-nia moris.—Salmo 84:10.