DAVID MAZA | ISTÓRIA
Halaʼo moris família neʼebé kontente, triste, no kontente fali
Hodi estuda Bíblia no aplika ninia prinsípiu sira, ikusmai haʼu-nia mehi sai loos, neʼe mak atu iha moris família neʼebé kontente. Haʼu ho haʼu-nia feen no ami-nia oan naʼin-tolu serbí Jeová ho laran tomak no unidade.
Maibé iha loron 24 Abríl 2004, dezastre akontese, ami la prepara an atu hasoru susar boot hanesan neʼe.
Bainhira haʼu-nia feen Kaye partus ba ami-nia oan-feto Lauren, haʼu la hatene oinsá atu sai aman neʼebé diʼak. Nuneʼe mós ho tempu neʼebé ami-nia oan segundu Michael moris. Bainhira haʼu sei kiʼik, haʼu-nia inan-aman sempre diskute malu, no ikusmai soe malu. Maski haʼu hakarak atu sai família nia ulun neʼebé diʼak, maibé haʼu la hatene oinsá.
Aat liu mak bainhira haʼu sei joven, haʼu sai atan ba tua no droga. Haʼu la hatene kontrola haʼu-nia moris. Tanba haʼu iha toman aat, inklui mós gosta joga, rezultadu mak haʼu halo desizaun aat barak. Situasaun sai aat liután toʼo ikusmai Kaye husik haʼu no lori ami-nia oan naʼin-rua hamutuk ho nia. Neʼe halo haʼu triste tebetebes.
Haʼu husu Kaye haʼu presiza halo saida atu nia bele fila fali mai haʼu. Nia komesa ona estuda Bíblia ho Testemuña ba Jeová ida naran Gloria, tan neʼe ninia resposta simples mak: “Estuda Bíblia.” Haʼu la interese atu estuda Bíblia, maibé tanba hakarak Kaye atu fila fali, haʼu konkorda atu hasoru Gloria no ninia laʼen naran Bill.
Diskusaun neʼebé troka haʼu-nia moris
Bainhira Bill no Gloria mai ami-nia uma, haʼu admira tebes tanba haree katak feen-laʼen neʼe hadomi malu. Haʼu mós rona katak sira-nia oan naʼin-tolu neʼebé tinan atu hanesan ho haʼu uza sira-nia moris atu halo buat diʼak oioin. Ba dala primeiru haʼu komesa hanoin, karik Bíblia bele ajuda haʼu atu iha moris família neʼebé kontente.
Iha tempu neʼebá, Bill no Gloria koʼalia kona-ba haʼu-nia problema sira. Sira hatudu mai haʼu Bíblia nia liafuan iha Galásia 6:7, neʼebé dehan: “Buat naran deʼit neʼebé ema kari, nia mós sei koʼa ida-neʼe.” Haʼu hanoin: ‘Se uluk haʼu aplika prinsípiu neʼe no halo desizaun diʼak, agora haʼu la presiza hasoru problema barak hanesan neʼe!’
Kaye no David
Husi tempu neʼebá, haʼu haree duni oinsá mak aplika Bíblia nia prinsípiu sira bele hadiʼa haʼu-nia moris. Kaye no haʼu para fuma, no haʼu konsege husik tiha toman aat oioin. Ikusmai iha tinan 1985 bainhira ami iha oan terseiru naran David, neʼebé baibain ami bolu Davey, haʼu sente haʼu prontu ona atu sai aman neʼebé diʼak.
Serbí Jeová ho unidade
Nuʼudar inan-aman, haʼu no Kaye aprende katak kuandu ami hanorin ami-nia oan sira atu hadomi Jeová, neʼe ajuda mós ami atu hakbesik ba nia. Ami aprende buat barak husi livru sira hanesan Mendengar kepada Guru yang Agung. Família sira iha ami-nia kongregasaun mós hatudu ezemplu neʼebé diʼak mai ami no ami-nia oan sira.
Michael no ninia feen Diana
Ikusmai, ami-nia oan hotu serbí nuʼudar pioneiru. Iha tinan 2004, Lauren serbí iha kongregasaun língua Españól. Michael sai husi Betel no kaben ho Diana, sira prepara atu bá halo serbisu haklaken iha Guam. Davey tinan 19 ona, no komesa serbí iha Repúblika Dominikana.
Haʼu no Kaye sente orgullu tanba ami-nia oan sira halo desizaun neʼebé diʼak. Ami sente duni hanesan 3 João 4, neʼebé dehan: “La iha buat ida neʼebé halo haʼu haksolok liu fali ida-neʼe: katak haʼu rona haʼu-nia oan sira kontinua laʼo iha lia-loos.” Ami la hatene katak derrepente deʼit ami-nia moris troka ho xamada telefone ida.
Asidente boot
Iha loron 24 Abríl 2004, haʼu no Kaye bá han iha restaurante hamutuk ho kaben-naʼin naʼin-haat. Restaurante neʼe dook kilómetru 100 liu, tan neʼe ami naʼin-neen saʼe haʼu-nia karreta. Bainhira han hotu tiha, ami bá restaurante seluk atu han sobremeza, haʼu hatún sira seluk iha restaurante no buka fatin atu para karreta. Iha tempu neʼe mak haʼu-nia telefone lian. Neʼe mak haʼu-nia kolega ida, no husi ninia lian, haʼu bele nota kedas nia estrese tebes.
Nia dehan: “Buat aat tebes akontese. Davey hetan asidente.”
Haʼu husu: “Oinsá ninia kanek?” Haʼu taʼuk atu rona ninia resposta.
Foufoun, nia nonook deʼit. Nia dada an tebes, maibé ikusmai nia fó-hatene haʼu katak Davey mate ona.
Depois taka tiha telefone, haʼu halo orasaun ba Jeová hodi husu forsa. Tuirmai, haʼu tama ba restaurante no hatete katak haʼu sente la diʼak, tan neʼe diʼak liu ami fila lalais ba uma. Haʼu lakohi fó-hatene ba Kaye bainhira ema seluk sei iha.
Haʼu presiza hodi karreta ba oras ida ho balu atu fila ba uma. Haʼu-nia laran moras tebes. Haʼu rona Kaye koʼalia ho kontente ba kolega sira katak nia hein namanas Davey vizita fali ami. Iha tempu hanesan, mensajen kondolénsias husi ema oioin tama iha haʼu-nia telefone.
Ami hatún feen-laʼen sira-neʼe iha sira ida-idak nia uma, no fila ba ami-nia uma. Kaye haree ba haʼu-nia oin no nota katak buat ruma akontese. Nia husu: “Saida mak akontese?” Haʼu hatene haʼu-nia liafuan sei harahun ninia fuan, hanesan haʼu sente oras rua antes neʼe kuandu simu xamada ida.
Tahan hasoru sentimentu triste
Kaye no haʼu hasoru ona susar oioin, no ami hatene Jeová sempre ajuda ninia povu. (Isaias 41:10, 13) Maibé susar neʼebé ami foin hetan neʼe la hanesan. Haʼu hanoin: ‘Oinsá mak ida-neʼe akontese ba Davey, neʼebé halo buat barak ba Jeová? Tanbasá mak Jeová la proteje nia?’
Akontesimentu neʼe afeta mós ami-nia oan seluk. Lauren hadomi tebes Davey no nia hanesan Davey nia amá segundu, tan neʼe nia laran triste tebetebes. Nuneʼe mós ho Michael. Maski Michael sai husi uma maizumenus tinan lima ona, nia nota oinsá mak ninia alin Davey sai maduru no nia kontente haree ida-neʼe.
Kongregasaun komesa kedas atu ajuda ami. Porezemplu, maski iha tempu neʼebé Kaye seidauk bele simu realidade katak ami-nia oan mate ona, kolega sira husi kongregasaun mai vizita ami atu fó kmaan no ajuda. (Provérbios 17:17) Haʼu sei nunka haluha domin neʼebé sira hatudu mai ami!
Atu tahan hasoru laran-triste, haʼu no Kaye kontinua ami-nia toman atu halo orasaun, estuda Bíblia, no tuir reuniaun. Neʼe la halakon ami-nia sentimentu triste, maibé ami hatene katak buat sira-neʼe importante atu bele besik nafatin ho Jeová.—Filipe 3:16.
Lauren no ninia laʼen Justin
Durante tempu neʼe, Michael no Diana muda besik ami-nia uma, no Lauren fila fali ba ami-nia kongregasaun Inglés. Ami hamutuk ba tinan balu, no neʼe ajuda ami atu sente diʼak fali. Ikusmai Lauren kaben, no ninia laʼen Justin mós apoia tebes ami.
Viajen neʼebé susar
Lakleur depois Davey mate, ami halo buat ida neʼebé susar tebes maibé ikusmai lori bensaun mai ami. Kaye sei konta kona-ba neʼe.
“Bainhira haʼu-nia laʼen fó-hatene haʼu katak Davey mate, haʼu sente hanesan haʼu monu tiha ba kuak neʼebé nakukun, no ba tempu kleur haʼu iha kuak neʼe nia laran. Haʼu-nia triste neʼe makaʼas tebes toʼo labele halaʼo moris hanesan baibain. Haʼu tanis beibeik. Haʼu koʼalia nakloke deʼit, dala ruma haʼu sente hirus ba Jeová no mós ba ema hotu neʼebé sei moris. Haʼu sente hanesan haʼu labele ona atu iha hanoin neʼebé loos.
“Haʼu hakarak bá Repúblika Dominikana. Haʼu hakarak haree fatin neʼebé Davey hela no serbí Jeová antes nia mate. Iha tempu hanesan, haʼu sente fraku hela no la iha forsa atu halo viajen.
“Ami-nia belun ida apoia haʼu hodi hatete katak Davey nia belun sira iha Repúblika Dominikana mós triste tebes no sira presiza hasoru Davey nia família. Neʼe ajuda haʼu iha fali forsa atu saʼe aviaun.
“Viajen neʼe mak buat neʼebé ami presiza duni. Neʼe ajuda ami atu komprende katak Davey serbí Jeová ho laran tomak. Davey nia kongregasaun iha katuas ida deʼit, no nia dehan nia sempre tau fiar ba Davey atu kumpre knaar sira.
“Bainhira ami laʼo iha dalan besik Davey nia hela-fatin, ema barak hakbesik ami no konta kona-ba buat diʼak oioin neʼebé Davey halo ba sira. Haʼu hatene katak nia mak ema neʼebé laran-diʼak, maibé haʼu sente kontente tebes tanba hatene katak nia hakaʼas an liután atu halo tuir Jesus nia ezemplu.
Davey kuandu serbí iha Repúblika Dominikana
“Ami mós hasoru Davey nia estudante Bíblia ida. Neʼe mak mane neʼebé hela iha uma kiʼik no latan deʼit iha kama. Mane neʼe kiak tebes, maibé irmaun-irmán sira iha kongregasaun konta katak Davey sempre trata nia ho dignidade no respeitu. Neʼe halo haʼu sente orgullu tebes!
“Viajen neʼe mak susar tebes. Maibé neʼe fó oportunidade ba ami atu sente triste hamutuk ho ema neʼebé hatene Davey no konsola malu. Viajen neʼe ajuda ami atu sente kmaan uitoan.”
Davey nia ezemplu anima ema barak
Revista Matan-moris bá! 8 Janeiru 2005 fó sai informasaun kona-ba Davey no oinsá nia serbí iha Repúblika Dominikana. Iha tempu neʼebá, ami la hatene oinsá mak informasaun neʼe fó impaktu ba lee-naʼin sira. Porezemplu, iha Maiu 2019, irmaun ida naran Nick kontaktu ami no hatete:
“Iha tinan 2004 nia rohan, haʼu iha universidade no la iha planu kona-ba oinsá atu serbí Jeová. Haʼu la kontente. Haʼu halo orasaun ba Jeová hodi husu ninia ajuda atu bele uza haʼu-nia tempu joven ho didiʼak. Lakleur depois neʼe, haʼu lee Davey nia esperiénsia iha Matan-moris bá! Neʼe mak resposta ba haʼu-nia orasaun!
“Haʼu husik universidade no hahú serbí nuʼudar pioneiru. Haʼu mós halo planu atu aprende língua Españól no muda ba rai seluk. Ikusmai, haʼu serbí iha Nikarágua no tuir Eskola ba Haklaken-Naʼin Tempu Tomak hamutuk ho haʼu-nia feen. Bainhira ema husu saida mak book haʼu atu serbí nuʼudar pioneiru, haʼu koʼalia kona-ba Davey nia esperiénsia.”
Ami mós hetan esperiénsia ida neʼebé halo ami kontente bainhira ami hasoru irmán ida naran Abi. Nia iha knaar atu serbí iha otél neʼebé ami hela bainhira ami tuir Reuniaun Boot Internasionál iha Buenos Aires, Arjentina. Ami kontente tanba irmán Abi hatudu domin no laran-diʼak, neʼe halo ami hanoin-hetan kona-ba Davey.
Davey nia esperiénsia book Abi atu foti pioneiru no muda ba fatin neʼebé izoladu
Bainhira ami fila ba ami-nia kuartu iha otél, ami haruka mensajen ba Abi no link atu loke informasaun iha Matan-moris bá! kona-ba Davey. Minutu balu liu tiha, Abi hatán. Nia hakarak tebes atu koʼalia buat ruma mai ami, tan neʼe ami hasoru nia iha entrada iha otél. Iha neʼebá, Abi konta ho matan-been katak Davey nia esperiénsia mak motiva nia atu hahú pioneiru iha Setembru 2011 no tuirmai muda ba área izoladu neʼebé presiza haklaken-naʼin. Abi dehan: “Bainhira haʼu hasoru susar iha haʼu-nia knaar, haʼu sempre lee fali Davey nia esperiénsia.” Nia lori beibeik kopia kona-ba informasaun neʼe!
Esperiénsia hanesan neʼe hatudu katak ita mak parte husi família iha mundu tomak. Ema seluk iha mundu neʼe labele goza unidade furak hanesan Jeová nia povu!
Haʼu no Kaye sente kmaan hodi hatene katak Davey nia esperiénsia fó impaktu boot ba ema barak. Maibé tuir loloos, ita-nia joven sira hotu neʼebé serbí Jeová ho badinas fó impaktu diʼak ba ema seluk. Karik sira la rekoñese, maibé sira anima duni ema seluk neʼebé haree sira-nia laran-manas, no liuhusi sira-nia ezemplu, sira book ema seluk atu hakaʼas an hodi serbí Jeová ho laran.
“Ba nia sira hotu sei moris hela”
Iha Lucas 20:37, Jesus konta fali Jeová nia liafuan neʼebé temi Ninia an nuʼudar “Abraão nia Maromak, Isaac nia Maromak no Jacob nia Maromak”. Jeová la dehan katak nia mak sira-nia Maromak bainhira sira sei moris, maibé depois sira mate tiha mós nafatin sira-nia Maromak! Tanbasá? Jesus hatete iha versíkulu 38: “Ba nia sira hotu sei moris hela.”
Sin, husi Jeová nia haree, ninia atan hotu neʼebé laran-metin mak hanesan moris hela. Neʼe hatudu katak nia hakarak tebetebes atu halo sira moris fali! (Job 14:15; João 5:28, 29) Haʼu fiar metin katak Jeová sente hanesan neʼe kona-ba Davey, no mós Ninia atan seluk hotu neʼebé mate ona.
Haʼu hakarak tebes atu hasoru fali Davey, maibé haʼu-nia hakarak neʼebé boot liu mak atu haree Kaye hasoru fali Davey. Haʼu nunka haree ema neʼebé sente terus hanesan Kaye. Liafuan iha Lucas 7:15 mak espesiál tebes mai haʼu: “Ema mate neʼe moris fali, nia tuur no hahú koʼalia, no Jesus entrega nia ba ninia inan.”
Iha Setembru 2005, haʼu mós hahú serbí nuʼudar pioneiru hanesan Kaye. Neʼe mak buat neʼebé furak tebes, tanba haʼu bele pioneiru hamutuk ho haʼu-nia feen, ami-nia oan sira, no sira-nia kaben. Nuʼudar família neʼebé unidade, ami apoia malu no fokus ba esperansa kona-ba futuru, tempu neʼebé ami iha mundu foun no hamutuk fali ho ami-nia oan doben Davey.