Iha fulan-Agostu 1967, kuandu haʼu tinan ida ho balu, maski haʼu mak labarik neʼebé saúde diʼak, maibé haʼu sai isin-manas tebes. Haʼu hadeer loron tuirmai ho kelen neʼebé la iha forsa. Kuandu halo teste iha ospitál iha Freetown, Serra Leoa, fatin neʼebé haʼu hela bá, teste neʼe hatudu katak haʼu kona moras póliu, neʼe mak moras ida neʼebé halo isin sira matek, dala barak neʼe kona labarik sira neʼebé tinan lima ba kraik. Fizioterapia la ajuda haʼu-nia ain sira sai metin. Neineik-neineik, haʼu-nia ain sira sai namlaek no labele ona atu laʼo ka hamriik. Haʼu-nia apá sempre dehan katak haʼu laʼós ema tanba haʼu defisiente. Tanba haʼu só bele dolar no ema la hafolin haʼu, neʼe halo haʼu sente la importante no la iha folin.

 Kuandu haʼu sei kiʼik, haʼu hela hamutuk ho haʼu-nia amá iha área neʼebé família kiak seluk mós hela. Maski ema gosta haʼu, haʼu hakarak tebes atu sente aman nia domin, maibé la hetan. Ema balu hanoin haʼu-nia moras laʼós moras baibain deʼit, maibé tanba espiritizmu. Ema seluk fali fó sujestaun ba amá atu bá fatin neʼebé tau matan labarik defisiente sira, no husik haʼu iha neʼebá. Sira dehan neʼe sei halo nia livre tanba la presiza ona tau matan haʼu. Amá la simu sira-nia sujestaun no nia hakaʼas an atu tau matan haʼu.

 Tanba haʼu labele hamriik no laʼo, haʼu tenke dolar deʼit. Maibé tanba roos haʼu-nia an iha rai no kona buat oioin, neʼe hamosu kanek sira. Atu proteje haʼu-nia isin, haʼu hatais roupa mahar. Atu proteje haʼu-nia liman, haʼu uza xinelus, neʼebé sai hanesan luvas ba haʼu-nia liman. Tuirmai, haʼu uza ai ho modelu U neʼebé ajuda proteje haʼu-nia liman sira. Atu muda haʼu-nia isin, haʼu lolo haʼu-nia liman ba oin tuirmai dada haʼu-nia isin lolon tomak. Neʼe susar tebes no haʼu tenke halo nuneʼe kada haʼu muda haʼu-nia an. Neʼe halo haʼu-nia liman no kabaas moras loos. Muda bá-mai iha dalan hanesan neʼe presiza forsa barak no neʼe halo haʼu ladún sai husi ami-nia hela-fatin. Haʼu labele bá eskola ka halimar ho labarik sira seluk. Haʼu taʼuk kona-ba oinsá haʼu bele tahan se haʼu-nia amá mate.

 Haʼu halo orasaun ba Maromak, husu nia atu ajuda haʼu no atu la husik haʼu sai ezmola-naʼin. Haʼu sente katak se haʼu hakbesik no adora Maromak iha dalan neʼebé loos, nia sei tau matan ba haʼu-nia presiza. Tan neʼe, loron ida iha tinan 1981, haʼu sai husi haʼu-nia fatin atu bá igreja iha estrada neʼebé ami hela bá maski neʼe susar tebes ba haʼu. Haʼu sente la hakmatek tanba ema nia dalan hateke ba haʼu. Pastór mós la fó benvindu ba haʼu, no nia siʼak haʼu-nia amá tanba haʼu tuur iha fatin neʼebé ema seluk mak selu. Haʼu deside haʼu sei nunka bá tan fatin neʼe.

 Dadeer ida iha tinan 1984, bainhira haʼu tinan 18, haʼu saʼe ba ami-nia uma andár atu tuur iha besik janela, fatin neʼebé baibain haʼu tuur. Husi fatin neʼe mak haʼu gosta haree saida mak akontese iha liʼur. Maibé depois neʼe haʼu deside atu tun fali no sai ba liʼur hodi tuur iha fatin neʼebé baibain ema la iha. Bainhira haʼu toʼo iha neʼebá, haʼu hasoru mane naʼin-rua neʼebé haklaken husi uma ba uma. Sira esplika kona-ba futuru neʼebé kapás, no hatete katak haʼu-nia kondisaun sei troka. Sira lee Isaias 33:24 no Apokalipse 21:3, 4. Tuirmai sira fó broxura ho kór oioin naran Moris haksolok ba nafatin iha rai! no promete sei fila fali hodi hanorin haʼu buat barak liután.

 Kuandu sira mai fali, sira dehan sira sei lori misionária ida naran Pauline atu nia bele koʼalia ho haʼu kona-ba Bíblia. Haʼu besik loos ho Pauline no ami-nia relasaun mak hanesan inan ho oan. Nia sempre hatudu domin, pasiénsia, laran-diʼak no interese ba haʼu, no nia sempre cek haʼu-nia kondisaun. Haʼu-nia amá anima haʼu atu kontinua estuda ho Pauline. Pauline hanorin haʼu atu lee, no hodi uza livru Istória husi Bíblia haʼu bele koñese Aman domin neʼebé haʼu hein kleur ona.

 Haʼu gosta tebes buat neʼebé haʼu aprende husi Bíblia. Loron ida haʼu husu ba Pauline se haʼu bele tuir Reuniaun Estudu Livru nian, a neʼebé halaʼo iha Testemuña ba Jeová ida nia uma, ladún dook husi haʼu-nia uma. Pauline dehan bele. Iha loron-tersa tuirmai, nia mai no hein haʼu atu hariis no troka hodi ami bele bá hamutuk. Ema ruma dehan diʼak se haʼu husu Pauline atu selu taksi ba haʼu, maibé haʼu dehan: “Haʼu sei laʼo deʼit uza haʼu-nia ai sira.”

 Kuandu ami atu sai, haʼu-nia inan no ami-nia viziñu sira haree no hanoin barak kona-ba haʼu. Nuʼudar haʼu dolar iha rai, viziñu balu hakilar ba Pauline dehan: “Ó obriga nia!”

 Pauline husu haʼu ho laran-diʼak: “Jay, ó hakarak tuir ka lae?” Neʼe mak tempu atu hatudu katak haʼu tau fiar ba Jeová. (Provérbios 3:5, 6) Haʼu dehan: “Hakarak! Neʼe mak haʼu rasik nia desizaun.” Viziñu sira sai nonook no troka sira-nia atitude nuʼudar haʼu hakbesik ba portaun. Kuandu haʼu sai ona, sira hotu haklalak!

 Haʼu gosta tebes reuniaun neʼe! Halo haʼu sente fresku! Ema hotu simu haʼu, no la iha ema ida hatún haʼu. Haʼu sente kmaan tebes iha neʼebá, tan neʼe haʼu komesa tuir beibeik. Lakleur, haʼu mós husu atu tuir reuniaun sira neʼebé halaʼo iha Reuniaun-Fatin husi Testemuña ba Jeová. Haʼu kiak no iha vestidu rua deʼit no xinelus ida deʼit. Maski nuneʼe, haʼu hatene Maromak nia povu sei simu haʼu nafatin.

 Atu bá Reuniaun-Fatin, haʼu tenke dolar toʼo estrada boot, depois saʼe taksi ba Reuniaun-Fatin neʼebé iha foho-oan nia kraik. Depois neʼe, irmaun sira hiʼit haʼu ba laran.

 Tanba haʼu sente ona Jeová nia laran-diʼak, haʼu hakarak “buka protesaun husi nia”. Haʼu deside katak haʼu sei tuir reuniaun beibeik. (Salmo 34:8) Durante tempu udan, dala barak haʼu bokon no foʼer tanba tahu bainhira toʼo iha Reuniaun-Fatin, no haʼu tenke troka roupa iha neʼebá. Maibé haʼu kontente atu halo ida-neʼe.

 Livru tinan nian 1985 neʼebé fó sai Testemuña nia atividade konta kona-ba haʼu-nia esperiénsia. Irmán ida iha rai-Suisa lee haʼu-nia esperiénsia no haruka ba haʼu bisikleta ho roda tolu neʼebé haʼu bele hean ho liman. Iha mós guardalama no refletór neʼebé kór oioin. Ho bisikleta neʼe, haʼu bele bá-mai ho dignidade. Labarik sira dehan sira gosta haree haʼu ho haʼu-nia kadeira furak neʼe. Haʼu la presiza ona hakdasak iha rai no la sente tan folin-laek. Agora haʼu sente hanesan liurai-feto neʼebé ema respeitu.

 Fasil ba haʼu atu laʼo ba oin iha lia-loos tanba haʼu halaʼo ona moris neʼebé simples no moos iha dalan morál. Haʼu-nia bisikleta ajuda haʼu atu hola parte iha serbisu haklaken, no iha loron 9 Agostu 1986 haʼu hetan batizmu. Neʼe troka haʼu-nia moris no haʼu sente kontente tebes. Haʼu-nia laran hakmatek loos, haʼu sente iha folin no iha fiar an tanba agora haʼu iha Aman ida neʼebé hadomi haʼu, no belun sira neʼebé hanoin haʼu.

 Tanba hakarak tebes hatudu agradese ba Jeová, haʼu hanoin atu foti pioneiru regulár, maibé haʼu la hatene haʼu bele halo ida-neʼe ka lae. (Salmo 116:12) Haʼu halo orasaun no deside atu koko. Haʼu foti pioneiru iha loron 1 Janeiru 1988, no toʼo agora haʼu pioneiru nafatin. Neʼe mak bensaun boot ba haʼu! Irmaun-irmán sira ho laran-diʼak ajuda haʼu atu kumpre oras fulan-fulan no haʼu mós haree ona oinsá Jeová apoia haʼu ho ninia espíritu santu.—Salmo 89:21.

 Nuʼudar pioneiru ida, haʼu sai ativu liu, no neʼe ajuda haʼu-nia ain sira, maski haʼu-nia ain nafatin fraku. Liutiha tempu balu, haʼu bá konsulta iha klínika foun no hakarak atu halo tratamentu hanesan fizioterapia, maibé enfermeira dehan lakleur tan haʼu sei mate, tan neʼe saugati deʼit. Enfermeira seluk mós hatete buat neʼebé hanesan, no haʼu sente laran-kraik tebes. Haʼu fila uma no halo orasaun ba Jeová atu ajuda haʼu tahan haʼu-nia sentimentu sira no atu ajuda haʼu hetan terapia ruma.

 Haʼu haree katak haklaken mak terapia neʼebé diʼak liu ba haʼu tanba neʼe hanesan ezersísiu barak. Tinan balu liutiha, enfermeira neʼebé uluk dehan katak haʼu sei mate, nia laʼo liu Reuniaun-Fatin no hetan haʼu. Nia hakfodak tebes haree katak haʼu sei moris hela.

 Maski haʼu-nia kondisaun mak hanesan neʼe, maibé haʼu koko atu nafatin okupadu iha Jeová nia serbisu. Irmaun sira gaba haʼu tanba haʼu laran-manas no sempre toʼo sedu iha reuniaun. Haʼu sempre halo ida-neʼe tanba haʼu iha tempu atu koʼalia ba haʼu-nia irmaun-irmán sira no hatudu katak haʼu interese ba sira.

 Haʼu koko ona Jeová nia laran-diʼak no hetan bensaun barak iha haʼu-nia moris. Haʼu hetan ksolok boot hodi ajuda ema naʼin-tolu hetan batizmu. Ida mak naran Amelia, ikusmai tuir Eskola Gilead klase 137. Haʼu mós tuir Eskola Serbisu Pioneiru dala balu. Neʼe mak bensaun boot ida husi Jeová. Jeová hiʼit sai haʼu husi rai-rahun, nia halo haʼu sente iha folin no fiar an. Agora ema respeitu haʼu. Haʼu la moe ona. Haʼu iha belun diʼak sira iha lia-loos, laʼós deʼit iha Freetown, haʼu-nia hela-fatin, maibé iha fatin oioin iha mundu tomak.

 Agora besik tinan 40 ona husi tempu neʼebé haʼu aprende Maromak nia promesa kona-ba mundu foun, iha neʼebá sei la iha tan ema defisiente sira. Promesa neʼe enkoraja tebes haʼu no haʼu hein namanas atu ida-neʼe sai loos. Haʼu nafatin hein tanba haʼu hatene Maromak Jeová sei la demora. (Miqueias 7:7) Nuʼudar haʼu hein, haʼu hetan bensaun barak. Jeová ajuda haʼu atu hasoru problema no situasaun susar sira. Jeová sempre fó ajuda iha tempu neʼebé loos. Haʼu kontente tebetebes no sempre oin-midar tanba Maromak hiʼit sai haʼu husi rai-rahun, fatin neʼebé uluk haʼu hakdasak. Neʼe mak buat neʼebé haʼu nunka imajina.