Tinan balu depois ami-nia família muda ba sidade Roodepoort, Áfrika Súl, haʼu-nia apá mate. Iha tinan 1947, bainhira haʼu tinan 16, haʼu serbisu loron-loron ba governu atu atende telefone hodi nuneʼe haʼu bele sustenta haʼu-nia família. Loron ida bainhira haʼu iha uma, katuas ida vizita ami no oferese mai ami simu beibeik Livru Haklaken liuhusi korreiu. Ami konkorda, tanba hakarak hatudu laran-diʼak ba nia.

 Maibé lakleur, ami sai laran-manas atu aprende kona-ba Bíblia nia hanorin. Haʼu-nia amá uluk tuir Igreja Reformada Olandesa bainhira nia sei joven, nia haree igreja nia doutrina la hanesan ho Bíblia nia hanorin. Ami komesa estuda Bíblia ho Testemuña no lakleur ami komesa tuir reuniaun. Iha tinan 1949, haʼu hetan batizmu, haʼu mak primeiru neʼebé hetan batizmu iha ami-nia família. Ba tinan balu, haʼu kontinua serbisu, maibé haʼu hakarak aumenta haʼu-nia serbisu ba Jeová.

 Iha tinan 1954, haʼu hahú serbí nuʼudar pioneiru regulár, no haʼu husu sukursál Áfrika Súl kona-ba fatin neʼebé haʼu bele bá ajuda. Sukursál rekomenda sidade Pretória no arranja irmán ida nuʼudar haʼu-nia pár pioneiru. Ami-nia hela-fatin mak diʼak, no toʼo agora haʼu hanoin-hetan nafatin dose neʼebé ami hola besik ami-nia uma, naran koeksisters. Neʼe mak gostu hanesan donat maibé ninia modelu mak hanesan sasin no hoban iha sirup.

 Bainhira haʼu-nia pár kaben, irmaun George Philips neʼebé tau matan ba sukursál husu se haʼu hakarak serbí nuʼudar pioneiru espesiál, entaun haʼu simu ho kontente.

 Iha tinan 1955, haʼu hahú serbí nuʼudar pioneiru espesiál iha sidade Harrismith. Haʼu ho haʼu-nia pár pioneiru hasoru susar atu buka hela-fatin neʼebé diʼak ba ami. Porezemplu, igreja hatene kona-ba ami no obriga ami-nia uma-naʼin atu hasai ami husi uma neʼebé ami aluga.

 Ikusmai, haʼu hetan knaar atu serbí iha Parkhurst iha sidade Johannesburg, no serbí hamutuk ho irmán misionária naʼin-rua. Ikusmai, sira ida kaben, no ida seluk hetan knaar iha fatin seluk. Tan neʼe, irmán ida naran Eileen Porter konvida haʼu atu hela hamutuk maski sira-nia uma mak kiʼik ba sira-nia família. Haʼu toba iha fatin neʼebé kloot no kortina mak haketak ami. Eileen mak irmán neʼebé laran-diʼak no sempre anima ema seluk, no haʼu kontente tebes hamutuk ho nia. Haʼu admira ninia laran-manas ba lia-loos maski nia presiza halo serbisu barak iha uma laran.

 Lakleur haʼu hetan knaar atu muda ba sidade Aliwal North iha provínsia Eastern Cape hodi serbí hamutuk ho irmán ida naran Merlene (Merle) Laurens. Iha tempu neʼebá, ami rua seidauk toʼo tinan 30, no ami hetan anima husi irmán ferik ida naran Dorothy. Ami hadomi nia no bolu nia nuʼudar Tia Dot. Bainhira nia sei joven, nia hetan ataka husi asu sira durante haklaken, maibé neʼe la hanetik nia atu haklaken ho laran-manas.

 Iha tinan 1956, Merle hetan konvite atu tuir Eskola Gilead klase 28. Haʼu triste tanba haʼu mós hakarak tebes atu tuir Gilead hamutuk ho nia! Maski nuneʼe, Tia Dot sempre anima haʼu, no ami sai belun neʼebé diʼak tebes maski ami-nia idade la hanesan.

 Ikusmai, haʼu mós hetan konvite atu tuir Eskola Gilead, neʼe halo haʼu kontente tebes! Antes haʼu bá, haʼu hela ba fulan ualu iha sidade ida naran Nigel, no serbí hamutuk ho irmán Kathy Cooke, neʼebé tuir ona Gilead. Kathy halo haʼu hein namanas ba buat neʼebé haʼu sei aprende iha Gilead, no iha Janeiru 1958, haʼu bá Novaiorke.

 Iha Gilead, haʼu iha kuartu ida hamutuk ho irmán husi Samoa naran Tia Aluni, no irmán Ivy Kawhe, ema Maori. Bainhira haʼu iha Áfrika Súl, governu bandu ema kulit mutin labele ransu ho ema husi rasa seluk, tan neʼe, hela hamutuk ho irmán sira-neʼe mak buat espesiál mai haʼu. Haʼu toman lalais no hadomi sira, no haʼu kontente tebes sai parte husi klase internasionál neʼe.

 Instrutór ida husi Gilead mak irmaun Maxwell Friend. Dala ruma nia fó treinu mai ami iha dalan neʼebé makaʼas. Iha ninia sala iha lampu tolu neʼebé iha sinál kona-ba atu halo lian “Tun/saʼe”, “Neineik/lalais”, no “Mamar/makaʼas”. Bainhira estudante ida hatoʼo ninia diskursu ka drama kiʼik, irmaun Friend loke lampu ida se estudante neʼe presiza hadiʼa dalan neʼebé nia koʼalia. Tanba haʼu mak moedór, irmaun Friend sempre halo lampu lakan bainhira haʼu hatoʼo haʼu-nia parte, no dala ruma neʼe halo haʼu matan-been suli! Maski nuneʼe, haʼu gosta nafatin irmaun Friend. Dala ruma bainhira haʼu okupadu ho haʼu-nia knaar atu halo limpeza, irmaun Friend hatudu laran-diʼak hodi lori kafé mai haʼu.

 Fulan balu liu ona, haʼu hanoin haʼu sei hetan knaar atu serbí iha neʼebé. Irmán Merle neʼebé haʼu-nia pár pioneiru uluk nian serbí iha Perú depois nia gradua husi Gilead. Nia fó sujestaun mai haʼu atu koʼalia ho irmaun Nathan Knorr, neʼebé tau matan ba Jeová nia organizasaun iha tempu neʼebá, no husu se haʼu bele sai pár ho Merle, tanba ninia pár misionária besik atu kaben. Tanba irmaun Knorr vizita Eskola Gilead kada semana balu, fasil ba haʼu atu koʼalia ho nia. Entaun, bainhira haʼu gradua husi eskola, haʼu hetan knaar atu bá Perú!

 Haʼu hamutuk fali ho Merle iha sidade Lima, iha Perú, neʼe halo haʼu kontente tebes! Lakleur haʼu iha estudante barak neʼebé kontente atu estuda Bíblia maski haʼu aprende hela lian Españól. Ikusmai, Merle ho haʼu hetan knaar atu muda ba sidade Ayacucho, neʼe mak iha foho. Neʼe mak knaar neʼebé susar. Maski haʼu-nia lian Españól diʼak uitoan ona, maibé ema barak koʼalia deʼit lian Quechua, no ami presiza tempu kleur atu toman ho fatin aas neʼebé oksijéniu menus.

 Haʼu sente haʼu ladún kumpre buat ida iha Ayacucho, no haʼu duvida se ema barak iha área neʼe sei simu lia-loos ka lae. Maibé ohin loron, sidade Ayacucho iha Testemuña naʼin-700 liu no iha eskritóriu tradusaun ba lian Quechua (Ayacucho).

 Ikusmai, Merle kaben ho katuas área ida naran Ramón Castillo, no iha tinan 1964, irmaun Ramón tuir kursu iha Eskola Gilead ba fulan 10. Iha kursu neʼe, iha mós irmaun ida naran Fu-lone Liang, nia graduadu husi Gilead hamutuk ho haʼu no serbí iha Honkóng. Nia tuir fali tan kursu iha Eskola Gilead atu hetan treinu liután hodi kaer responsabilidade iha sukursál. a Fu-lone husu Ramón kona-ba haʼu, no ikusmai Fu-lone ho haʼu komesa hakerek karta ba malu.

 Bainhira ami komesa hakerek karta ba malu, Fu-lone hatete mai haʼu katak hakerek karta ba malu mak hanesan namora ona. Iha Honkóng, Fu-lone nia maluk misionáriu irmaun Harold King mak sempre bá korreiu, tan neʼe nia konkorda atu lori Fu-lone nia karta ba korreiu. Dala barak irmaun Harold halo dezeñu no hakerek liafuan badak iha envelope neʼebé tau iha Fu-lone nia karta mai haʼu, porezemplu nia hakerek: “Haʼu sei anima Fu-lone atu hakerek beibeik liután ba ó!”

 Fu-lone no haʼu hakerek karta ba malu maizumenus tinan ida ho balu, no ami deside atu kaben. Haʼu serbí iha Perú maizumenus tinan hitu ona, no muda ba fatin foun.

 Iha loron 17 Novembru 1965, Fu-lone no haʼu kaben. Haʼu kontente ho haʼu-nia moris foun iha Honkóng, haʼu ho haʼu-nia laʼen hela iha sukursál hamutuk ho feen-laʼen pár rua. Fu-lone halo serbisu tradusaun iha sukursál durante loron, no haʼu bá haklaken. Aprende lian Xinés Kantonés mak susar, maibé irmán misionária sira no haʼu-nia laʼen ajuda haʼu ho pasiénsia. Haʼu mós estuda Bíblia ho labarik sira, neʼe ajuda haʼu sente kontente atu aprende língua.

 Liutiha tinan balu, Fu-lone ho haʼu muda ba uma misionáriu iha Kwun Tong, neʼe mak área seluk iha Honkóng, atu nuneʼe Fu-lone bele hanorin Kantonés ba misionáriu sira neʼebé foin mai. b Haʼu kontente tebes atu haklaken iha área neʼebá no dala barak haʼu lakohi fila ba uma!

 Iha tinan 1968, ami simu livru foun ho títulu Lia-Loos neʼebé Lori Moris Rohan-Laek, neʼebé uza atu halaʼo estudu, neʼe halo haʼu kontente tebes. Livru neʼe simples liu fali livru “Maromak mak Loos”, neʼe diʼak tebes ba estudante sira neʼebé la iha koñesimentu kona-ba Bíblia no hanorin Kristaun.

 Maibé dala ruma haʼu hanoin sala katak estudante sira simu lia-loos tan deʼit sira hatán ho loloos ba pergunta sira iha livru. Porezemplu, haʼu-nia estudante ida estuda hotu livru Truth, maibé nafatin la fiar katak Maromak iha! Haʼu aprende atu konversa liután ho estudante sira atu bele hatene sira-nia hanoin kona-ba buat neʼebé sira aprende.

 Ami iha Kwun Tong ba tinan balu, depois ami muda fali ba sukursál, no Fu-lone komesa serbí nuʼudar membru husi Komisaun Sukursál Honkóng. Ba tinan barak, haʼu halo serbisu hamoos no sai nuʼudar resepsionista. Dala ruma Fu-lone tenke halo viajen tanba simu knaar neʼebé presiza halaʼo subasubar no haʼu labele akompaña, maibé haʼu kontente apoia nia atu kumpre ninia responsabilidade sira.

 Triste mak iha tinan 2008 haʼu-nia moris troka derrepente. Bainhira Fu-lone halo viajen hela, nia mate derrepente. Neʼe halo haʼu-nia laran rahun. Neʼe akontese iha tempu neʼebé besik ona ba loron Memoriál ba Jesus nia mate. Irmaun-irmán barak mai kedas atu fó kmaan mai haʼu, no durante diskursu Memoriál, haʼu konsege tahan haʼu-nia matan-been tanba haʼu okupadu ajuda feto ida neʼebé mai Memoriál atu loke eskritura sira. Haʼu hetan forsa husi Fu-lone nia eskritura favoritu ida, neʼebé dehan: “Haʼu, Jeová, ó-nia Maromak, mak kaer ó-nia liman-loos . . . ‘Haʼu sei ajuda ó.’”—Isaias 41:13.

 Liutiha tinan hitu depois Fu-lone mate, irmaun sira iha Honkóng dehan katak diʼak liu ba haʼu atu muda ba sukursál neʼebé boot liu hodi bele hetan tratamentu ba haʼu-nia saúde. Tan neʼe iha tinan 2015, haʼu muda ba sukursál Áfrika Súl, la dook husi fatin neʼebé haʼu hetan lia-loos iha tinan 1947.

 Haʼu serbí Jeová ho kontente ba tinan barak ona, no haʼu sente katak Jeová fó bensaun mai haʼu tanba haʼu prontu serbí nia. Haʼu kontinua kontaktu malu ho sira neʼebé uluk estuda ho haʼu no kontinua serbí Jeová ho laran-metin. Haʼu mós haree oinsá mak Jeová haraik bensaun ba buat kiʼik neʼebé ita halo iha serbisu haklaken. Porezemplu, iha tinan 1958 iha deʼit haklaken-naʼin maizumenus naʼin-760 iha Perú, maibé iha tinan 2021 iha maizumenus naʼin-133.000, no iha tinan 1965 iha haklaken-naʼin maizumenus naʼin-230 iha Honkóng, maibé iha tinan 2021 iha naʼin-5.565.

 Tanba haʼu idade ona, haʼu labele halo buat neʼebé uluk haʼu halo. Maibé haʼu-nia hakarak nafatin hanesan uluk, neʼe mak sempre prontu atu halo buat naran deʼit neʼebé Jeová haruka, no haʼu mós hein ba tempu neʼebé haʼu bele halo buat hotu iha mundu foun, tanba sei presiza ema barak atu halo Jeová nia serbisu. Iha tempu neʼebá, haʼu sei hatete hanesan Rebeca: “Haʼu hakarak bá.”