Bíblia fó sai nanis ona katak iha ita-nia tempu sei akontese funu, rai-nakdoko, moras-peste no mós ‘buat neʼebé halo ita taʼuk’. (Lc 21:10, 11) Liafuan sira-neʼe sai loos daudaun durante tinan serbisu nian 2022. a Porezemplu, konflitu iha rai-Ukránia sei kontinua no neʼe afeta ema millaun ba millaun nia moris. Rai barak iha mundu foin mak komesa sai diʼak husi pandemia COVID-19. Laʼós neʼe deʼit, ema barak tebes mak sai vítima husi dezastre naturais sira hanesan rai-nakdoko iha rai-Haití no mós anin-fuik neʼebé kona Amérika Sentrál, rai-Filipinas, no Áfrika parte súl. Oinsá Testemuña ba Jeová ajuda vítima sira ba dezastre sira-neʼe?

 Durante tinan serbisu nian 2022, ita-nia organizasaun fó ajuda ba vítima sira husi dezastre hamutuk 200 neʼebé akontese. Osan neʼebé organizasaun uza atu fó ajuda bainhira dezastre akontese mak hamutuk dolar millaun 12. b Mai ita haree oinsá kontribuisaun neʼebé ita fó, ajuda ona vítima sira husi dezastre rua neʼebé akontese.

 Iha 14 Agostu 2021, akontese rai-nakdoko ho forsa magnitude 7,2 iha Haití parte súl. Triste mak irmaun ida no irmán naʼin-rua mate tanba dezastre neʼe. Rai-nakdoko neʼe afeta ema sira iha dalan fíziku no mós emosaun. Irmaun ida naran Stephane dehan: “Iha sidade laran, ema barak tebes mak mate. Kada semana, iha serimónia funerál barak tebes durante fulan rua liu.” Irmaun seluk naran Éliézer hatete: “Testemuña barak la iha hela-fatin, la iha roupa, sapatu no nesesidade báziku seluk. Durante fulan balu, ema barak moris ho taʼuk tanba rai-nakdoko kiʼik-kiʼik neʼebé nafatin mosu.”

 Ita-nia organizasaun lalais atu ajuda kedas. Sukursál Haití haruka hahán hamutuk tonelada 53 liu no mós tenda sira, lona sira, kolxaun no mós karregadór neʼebé uza loro-matan nia forsa atu bele karrega telemovel sira. Laʼós neʼe deʼit, durante tinan serbisu nian 2022, hamutuk uma 100 liu mak hadiʼa no harii fali. Ita gasta osan dolar millaun ida liu ba serbisu ida-neʼe.

 Ita-nia irmaun-irmán sira sente agradese tebetebes. Irmán Lorette hatete: “Rai-nakdoko neʼe sobu ami-nia uma no mós ami-nia negósiu. Ami la iha hahán. Maibé Jeová nia organizasaun ajuda ami, sira fó buat hotu neʼebé ami presiza.” Irmán Micheline dehan: “Rai-nakdoko neʼe estraga fatin neʼebé haʼu no haʼu-nia oan-mane naʼin-rua hela bá. Haʼu la hatene tan atu halo saida, haʼu halo orasaun deʼit no Jeová hatán haʼu-nia orasaun liuhusi ninia organizasaun. Agora ami hela iha uma neʼebé metin. Haʼu hakaʼas an atu halo buat hotu neʼebé haʼu bele atu hatudu agradese ba Jeová.”

 Autoridade sira rona kona-ba buat neʼebé ita-nia organizasaun halo. Diretór ba governu nia eskritóriu ida iha L’Asile hatete: “Hau gaba imi tanba imi lalais atu ajuda no imi hatudu respeitu boot ba autoridade sira. Haʼu sente kontente atu haree katak imi la interese atu hetan osan. Maibé imi hakarak atu ajuda ema. Imi hatudu duni domin.”

 Iha 24 Janeiru 2022, anin-fuik Ana kona rai-Mosambike no tuirmai anin neʼe kona Malavi. Anin-fuik neʼe hamosu udan boot neʼebé tau makaʼas. Dezastre neʼe estraga fiu eletrisidade sira, sobu ponte sira no mós halo bee saʼe.

 Anin-fuik neʼe afeta Testemuña naʼin-30.000 liu iha Malavi no Mosambike. Irmaun ida naran Charles neʼebé hola parte atu ajuda hatete: “Bainhira haree irmaun-irmán sira terus no lakon buat barak, neʼe halo haʼu triste tebes.” Situasaun sai aat liután tanba dezastre neʼe estraga hotu modo no hahán neʼebé sira kuda. Sira barak lakon hela-fatin. Triste mak irmaun ida nia feen no oan-feto naʼin-rua mate tanba bero neʼebé atu salva sira baku fila.

 Anin-fuik neʼe forsa boot tebes. Iha tuku 1 dadeer iha Nchalo, rai-Malavi, família Sengeredo rona lian makaʼas husi bee. Mota rua iha sira-nia área saʼe makaʼas! Irmaun Sengeredo deside katak sira presiza halai sai husi sira-nia uma. Neʼe mak desizaun neʼebé matenek tanba lakleur deʼit sira-nia uma naksobu. Sira-nia sasán hotu hetan estragu ka bee lori tiha. Família Sengeredo deside atu bá Reuniaun-Fatin. Baibain presiza laʼo minutu 30 deʼit, maibé iha tempu neʼebá, sira presiza laʼo ba oras rua. Sira bokon no kole, maibé sira seguru.

 Sukursál Malavi no Mosambike lalais atu fó ajuda. Sira haruka katuas área sira no katuas kongregasaun sira atu buka-hatene buat neʼebé irmaun-irmán sira iha área neʼe presiza no mós atu fó anima. Komisaun ba Dezastre balu hetan knaar atu tau matan ba serbisu neʼe no komisaun sira-neʼe komesa kedas ajuda irmaun-irmán sira liuhusi fó hahán no nesesidade seluk. Ita-nia organizasaun gasta osan hamutuk dolar 33.000 liu atu ajuda ema no mós osan dolar 300.000 atu hadiʼa no harii fali uma sira.

 Tanba problema ekonomia hanesan agora daudaun, Komisaun ba Dezastre uza osan kontribuisaun ho kuidadu. Porezemplu, fulan hitu primeiru husi serbisu atu fó ajuda, folin ba produtu báziku hanesan batar uut saʼe toʼo porsentu 70. Mina ba transporte mós folin saʼe. Atu bele uza ho didiʼak osan kontribuisaun, irmaun sira sosa hahán no materiál konstrusaun lokál no sira sosa barak dala ida. Hodi nuneʼe, sira hetan diskontu no la gasta osan barak ba transporte.

 Serbisu atu fó ajuda neʼe kona duni Jeová nia povu nia laran. Irmaun Felisberto iha rai-Mosambike hatete: “Haʼu nunka haree organizasaun seluk neʼebé fó buat barak tebes ba ema: materiál konstrusaun, transporte, serbisu-naʼin konstrusaun sira, hahán, no matadalan. Neʼe mak ezemplu kapás ida husi domin neʼebé Jesus temi iha João 13:34, 35.” Irmán faluk ida naran Ester iha rai-Malavi neʼebé ninia uma hetan estragu hatete: “Haʼu lakon esperansa tanba haʼu la iha osan atu harii fali uma seluk. Tan neʼe bainhira irmaun-irmán sira mai no harii uma ida mai haʼu, neʼe halo haʼu sente hanesan haʼu iha ona Paraízu.”

 Nuʼudar ita hakbesik daudaun ba mundu foun neʼebé Maromak promete ona, ita hatene katak ita sei hasoru dezastre neʼebé boot liután. (Mateus 24:7, 8) Maski nuneʼe, tanba kontribuisaun neʼebé imi fó ho laran-diʼak, ami fiar katak Jeová nia povu sei simu ajuda neʼebé sira presiza. Ita bele hetan esplikasaun kona-ba oinsá atu fó kontribuisaun iha donate.pr418.com. Obrigada barak ba imi-nia laran-luak.