Testemuña ba Jeová halo serbisu importante iha nasaun hamutuk 200 liu. Maibé husi nasaun sira-neʼe, nasaun 35 deʼit mak simu kontribuisaun husi sira-nia nasaun rasik no neʼe bele taka sira-nia gastu. Entaun oinsá Testemuña ba Jeová iha nasaun seluk bele selu sira-nia gastu?

 Grupu Administradór hanoin kona-ba buat neʼebé Testemuña ba Jeová iha mundu tomak presiza hodi bele adora Jeová no haklaken liafuan diʼak. Sira koʼalia kona-ba oinsá atu uza osan no uza ida-neʼe iha dalan neʼebé deside nanis. Se sukursál ida simu kontribuisaun barak liu fali buat neʼebé sira presiza atu halaʼo sira-nia atividade, sukursál sira seluk neʼebé presiza bele foti osan neʼebé resin. Arranju neʼe tuir ema Kristaun sira-nia ezemplu iha apóstolu sira-nia tempu. Sira ajuda malu hodi fahe buat neʼebé sira iha atu nuneʼe sira “bele sai hanesan deʼit”. (2 Korinto 8:14) Ema Kristaun neʼebé iha buat barak uza ida-neʼe atu taka buat neʼebé ema Kristaun seluk falta.

 Irmaun sira neʼebé simu osan neʼe husi sukursál seluk sente oinsá? Iha rai-Tanzánia, porsentu 50 liu husi populasaun moris ho osan dolar rua deʼit loroloron. Entaun osan neʼebé irmaun sira-neʼe simu husi sukursál seluk, sira uza atu halo renovasaun ba Reuniaun-Fatin neʼebé Kongregasaun Mafinga mak uza. Kongregasaun neʼe hakerek: “Husi tempu neʼebé ami halo renovasaun, ema barak liután mak mai tuir reuniaun. Ami agradese tebes ba Jeová nia organizasaun no irmaun-irmán sira iha mundu tomak tanba sira-nia laran-luak. No tanba sira hatudu laran-luak agora ami iha fatin neʼebé furak atu adora Jeová.”

 Irmaun-irmán balu iha rai-Sri Lanka falta ai-han tanba pandemia COVID-19. Ezemplu ida mak irmán Imara Fernando no ninia oan-mane naran Enosh. Sira bele simu ajuda tanba kontribuisaun neʼebé sukursál simu husi nasaun seluk. Sira hakerek karta ida hodi hatete: “Ami agradese tebes ba irmaun-irmán sira neʼebé hatudu domin ba ami durante tempu susar neʼe. Ami kontente tebes tanba ami mak parte ba família ida iha mundu tomak, no ami kontinua harohan ba Jeová atu ajuda irmaun-irmán hotu durante loron ikus sira-neʼe.”

 Maski irmaun-irmán sira hela iha fatin neʼebé la hanesan, maibé sira hotu ho laran hakarak fahe buat neʼebé sira iha. Porezemplu, Enosh halo kaixa kontribuisaun kiʼik ida atu nuneʼe nia mós bele fó kontribuisaun hodi ajuda família seluk. Irmán Guadalupe Álvarez mós hatudu laran-luak. Nia hela iha área ida iha rai-Méxiku neʼebé só ema balu deʼit mak hetan saláriu ka sira ladún iha osan. Maski nuneʼe, nia fó kontribuisaun tuir ninia kbiit. Nia hakerek: “Haʼu agradese tebes ba Jeová nia laran-diʼak no domin neʼebé laran-metin. Haʼu hatene katak haʼu-nia kontribuisaun sei tau hamutuk ho kontribuisaun seluk no bele ajuda irmaun-irmán sira.”

 Sukursál sira kontente atu haruka osan ba fatin seluk neʼebé presiza ajuda. Irmaun Anthony Carvalho neʼebé serbí nuʼudar membru ba Komisaun ba Sukursál iha rai-Brazíl hatete: “Durante tinan barak, osan husi irmaun-irmán sira iha nasaun seluk mak apoia serbisu haklaken iha ami-nia nasaun. Tanba ajuda neʼe, ema neʼebé tama lia-loos mós aumenta barak. Agora ami-nia situasaun sai diʼak ona no ami bele ajuda fali irmaun-irmán sira iha nasaun seluk. Irmaun sira iha rai-Brazíl haree ba serbisu haklaken neʼebé halaʼo iha mundu tomak no buka dalan atu fó ajuda.”

 Saida mak dalan diʼak ba Testemuña ba Jeová atu ajuda sira-nia irmaun-irmán sira? Keta haruka rasik osan ba sukursál ruma iha nasaun seluk. Maibé fó Ita-nia osan kontribuisaun ba serbisu haklaken iha mundu tomak. Ita bele halo nuneʼe hodi tau osan iha kaixa kontribuisaun neʼebé hakerek “Serbisu iha mundu tomak” ka liuhusi website donate.pr418.com. Ami hafolin tebes imi-nia kontribuisaun.