Iha loron ikus sira, ita sei “rona kona-ba funu iha fatin oioin”. (Mateus 24:6) Maibé bainhira ita-nia irmaun-irmán sira hasoru problema tanba funu, sira hetan ajuda neʼebé sira presiza. Notísias husi Grupu Administradór #3 tinan 2022 fó sai informasaun kona-ba serbisu umanitária neʼebé irmaun-irmán sira halo iha Europa parte leste ba ema sira neʼebé hetan susar tanba funu iha rai-Ukránia. Oinsá mak ita-nia irmaun-irmán sira ajuda malu bainhira funu akontese iha área neʼebá? Oinsá serbisu umanitária neʼe ajuda irmaun-irmán sira iha rai-Ukránia?

 Iha loron 24 Fevereiru 2022, funu komesa akontese iha rai-Ukránia, Komisaun Koordenadór aprova osan atu ajuda irmaun-irmán sira iha rai-Ukránia. Sukursál Ukránia komesa sosa sasán no hahán iha neʼebá no fahe buat sira-neʼe liuhusi Komisaun ba dezastre hamutuk 27.

 Atu ajuda sukursál Ukránia, irmaun-irmán sira husi Sede-jerál Testemuña ba Jeová komesa hanoin kedas kona-ba dalan neʼebé sira bele fó ajuda. Komisaun Koordenadór no Komisaun Editora nian husi Grupu Administradór husu Departamentu Kompras ba Mundu Tomak atu serbisu hamutuk ho reprezentante husi sukursál Ukránia no Polónia hodi bele halo arranju liután atu ajuda. Irmaun-irmán sira husi departamentu Kompras nian, departamentu neʼebé haruka sasán, departamentu Legál iha sukursál ida-idak, membru ida husi Komisaun ba Sukursál Ukránia, no membru sira husi Departamentu Kompras ba Mundu Tomak hasoru malu loroloron atu organiza buat hotu.

 Membru husi Departamentu Kompras ba Mundu Tomak naran Jay Swinney hatete: “Primeiru, ami presiza buka-hatene saida mak irmaun-irmán sira presiza. Ami hakarak prepara hahán no sasán neʼebé irmaun-irmán sira toman ona. Ami hasoru susar bainhira koko atu deside saida mak irmaun-irmán sira presiza. Laʼós neʼe deʼit, ami mós hasoru susar kona-ba oinsá atu haruka buat sira-neʼe ba Ukránia iha dalan neʼebé lalais no seguru maski akontese daudaun funu.”

 Iha loron 9 Marsu 2022, irmaun-irmán sira hatene ona saida deʼit mak irmaun-irmán sira iha Ukránia presiza. Kaixa sira neʼebé nakonu ho hahán simples hanesan naan lata no ikan lata, trigu, foos, no koto. Iha mós buat seluk hanesan sabaun no tisu sentina nian. Iha tempu neʼebá, nesesidade ba fulan ida nian ba ema ida mak hamutuk maizumenus dolar 65. Tanba iha irmaun-irmán rihun ba rihun neʼebé presiza buat sira-neʼe, Komisaun Koordenadór aprova osan barak neʼebé bele uza atu ajuda irmaun-irmán sira. Maibé oinsá ita-nia irmaun-irmán sira bele lori sasán sira-neʼe ho seguru ba ita-nia maluk sira?

 Iha loron 13 Marsu, irmaun naʼin-rua husi Polónia koko uluk atu lori sasán balu husi sukursál Polónia ba armazén besik Lviv, Ukránia. Loron balu antes sira bá, irmaun-irmán sira husi sukursál Polónia no Ukránia ajuda voluntáriu naʼin-rua neʼe atu prepara ba sira-nia viajen. Sukursál halo kompletu dokumentu legál neʼebé sira presiza atu laʼo liu fronteira hodi bele fó ajuda umanitária, sira mós tau sinál neʼebé klaru iha irmaun sira-neʼe nia karreta neʼebé hatudu katak sira atu fó ajuda umanitária, no sira serbisu hamutuk ho irmaun sira iha Ukránia atu deside dalan ida-neʼebé mak lalais no seguru liu. Ho preparasaun neʼebé diʼak no ho Jeová nia ajuda, sira lori sasán sira toʼo iha Lviv no entrega ba Komisaun ba dezastre iha oras 24 nia laran, no ita-nia irmaun sira fila fali ba Polónia ho seguru.

 Maski sira susesu atu lori sasán sira ba dala primeiru, maibé sasán neʼebé sira lori mak maizumenus tonelada ida deʼit. Presiza tan atu lori hahán hamutuk tonelada 200 ba neʼebá. Oinsá irmaun sira bele tula sasán barak no fahe ida-neʼe lalais?

 Depois lee tiha relatóriu iha jw.org kona-ba oinsá ita-nia irmaun-irmán sira hasoru terus tanba funu neʼebé akontese iha rai-Ukránia, ema husi mundu tomak hakarak atu ajuda. Ema barak neʼebé hela dook husi área konflitu neʼe haruka kontribuisaun ba Testemuña ba Jeová nia serbisu iha mundu tomak, no sira hatene katak osan neʼe sei uza iha dalan neʼebé diʼak. Ema seluk husi nasaun viziñu mós fó sira-nia tempu, enerjia no buat seluk tan atu ajuda. Tuirmai mak ezemplu balu.

 Iha rai-Polónia, voluntáriu sira prepara kaixa rihun ba rihun nakonu ho hahán no sasán balu no mós karta sira husi labarik. Membru ida husi Departamentu Kompras iha sukursál Polónia naran Bartosz Kościelniak hatete: “Haʼu lee beibeik eskritura iha Salmo 110:3 neʼebé dehan katak Jeová nia ‘povu sei fó sira-nia an ho hakarak rasik’. Maibé agora haʼu haree rasik irmaun-irmán sira-nia apoia. Haʼu haree serbisu-naʼin voluntáriu atus ba atus neʼebé prontu atu mai kedas no prontu atu halo serbisu. Neʼe hatudu katak liafuan iha Salmo mak loos.”

 Iha Testemuña ba Jeová ida neʼebé iha kompañia internasionál atu haruka sasán sira. Nia fó empresta trek sira no fó gazolina nuʼudar kontribuisaun, nia hatete: “Neʼe mak oportunidade mai haʼu atu hatudu haʼu-nia domin ba irmaun-irmán sira no mós Jeová. Haʼu sente kontente tanba bele ajuda.” Maizumenus gazolina neʼebé nia fó nuʼudar kontribuisaun mak hamutuk litru 7.700 liu no irmaun sira uza sira-nia tempu no enerjia atu lori trek maizumenus ba kilómetru 48.000.

 Ho irmaun-irmán sira-nia sakrifísiu no domin, loron 15 liutiha husi tempu neʼebé sira koko lori sasán ba dala primeiru, iha loron 28 Marsu, irmaun sira lori ona hahán, sasán atu mantein ijiene no mós ai-moruk sira hamutuk kilograma 100.000 ba Ukránia. Tanba irmaun-irmán sira no ema seluk fó sasán no hahán oioin nuʼudar kontribuisaun, neʼe ajuda hamenus gastu neʼebé organizasaun presiza uza atu prepara hahán no sasán. Toʼo ohin loron, Testemuña ba Jeová haruka ona hahán no nesesidade sira seluk hamutuk tonelada 190. Oinsá buat sira-neʼe ajuda ita-nia irmaun-irmán sira?

 Kuandu hahán no sasán sira toʼo iha Lviv, Komisaun ba dezastre iha Ukránia tomak fahe ida-neʼe ba maluk sira neʼebé presiza. Sira lori kaixa hahán no sasán sira-neʼe ba sidade oioin, sidade balu maizumenus dook kilómetru 1.300 liu husi Lviv. Maski serbisu neʼe halaʼo iha dalan neʼebé organizadu, maibé ida-neʼe nafatin han tempu. a

 Membru ida husi Komisaun ba Sukursál Ukránia naran Markus Reinhardt hatete: “Durante tempu susar neʼe, irmaun-irmán barak sente rasik Jeová nia domin. Sira mós haree ona tanbasá importante atu halo tuir ho didiʼak matadalan husi Jeová nia organizasaun, inklui antes dezastre ruma akontese. Porezemplu, ema hotu hetan anima atu rai iha sira-nia uma hahán no bee hemu neʼebé bele uza durante semana balu. Kona-ba matadalan neʼe, katuas kongregasaun ida naran Anton neʼebé serbí iha Kyiv hatete: ‘Jeová nia organizasaun, prepara ita ba situasaun neʼebé susar, no ita sente agradese ba ida-neʼe. Tanba iha hahán no bee hemu no mós rádiu, neʼe salva duni ami-nia moris.’ Ami agradese tebes kuandu irmaun-irmán sira halo tuir matadalan neʼe ho laran tanba neʼe fó tempu ba sukursál atu prepara no organiza hahán no nesesidade sira.”

 Irmaun-irmán sira sente oinsá kuandu sira simu ajuda? Mykola no Zinaida neʼebé hela iha Kharkiv fó sai sira-nia sentimentu hodi hatete: “Neʼe kona tebes ami-nia laran atu haree katak imi hanoin ami. Obrigada barak ba hahán no ai-moruk. Ami bele haree katak Jeová mak tau matan mai ami.” Irmán Valentyna neʼebé hela iha área hanesan hatete: “Husi tempu neʼebé funu komesa akontese, ema presiza forma ba tempu kleur atu bele sosa hahán. Dala barak susar tebes atu bele sosa buat neʼebé ita presiza. Maibé Jeová hatene no haree problema neʼe. Nia fó knaar ba irmaun sira atu fó ajuda umanitária ba família sira no sira fó duni buat neʼebé ami presiza. Iha situasaun susar sira-neʼe, bainhira haree hanesan la iha tan esperansa, ita bele sente katak Jeová no ninia organizasaun tau matan ita iha dalan neʼebé espesiál. . . . Neʼe mak priviléjiu atu bele sente Jeová nia apoia no ajuda iha tempu neʼebé loos.”

 Yevhen no Iryna neʼebé halai husi Mariupol hatete: “Ami agradese tebes ba imi-nia ajuda no apoia ba ami-nia família. Ajuda neʼe mai iha tempu neʼebé loos. Foufoun, ami hanoin katak iha hahán deʼit iha kaixa neʼebé ami simu, maibé kuandu ami loke, ami mós bele haree imi-nia domin!”

 Ita bele haree ho klaru oinsá Jeová uza ninia espíritu santu atu dirije ninia povu atu nuneʼe sira bele fó ajuda bainhira “rona kona-ba funu iha fatin oioin”. Kontribuisaun neʼebé imi fó ho laran ba serbisu iha mundu tomak liuhusi donate.pr418.com mós apoia serbisu umanitária neʼe. Obrigadu barak ba imi-nia laran-diʼak.

Fó ajuda lalais no iha dalan neʼebé seguru

1. 24 Fevereiru 2022: Komisaun Koordenadór aprova osan atu fó ajuda ba irmaun-irmán sira iha Ukránia no neʼe loke dalan ba sukursál atu fó ajuda

2. 24 Fevereiru–8 Marsu 2022: Sukursál Ukránia sosa sasán no hahán iha neʼebá no komesa fahe liuhusi Komisaun ba dezastre. Sukursál mós prepara an atu simu no fahe sasán no hahán husi Polónia

3. 9 Marsu 2022: Komisaun Koordenadór aprova arranju atu lori hahán no sasán ba Ukránia

4. 10–12 Marsu 2022: Halo planu atu koko lori hahán no sasán husi Polónia ba Lviv, Ukránia

5. 13 Marsu 2022: Koko ba dala primeiru atu tula hahán no sasán husi Polónia ba Lviv, Ukránia

6. 14–16 Marsu 2022: Iha Salaun Asembleia besik Poznan, Polónia, serbisu-naʼin voluntáriu ba Planeamentu no Konstrusaun Lokál prepara kaixa sira neʼebé nakonu ho hahán no sasán seluk

7. 17 Marsu 2022: Loron haat liutiha husi koko primeiru, irmaun sira komesa lori trek atu tula sasán no hahán hamutuk tonelada 13 ba Ukránia nia fronteira

8. 21–27 Marsu 2022: Irmaun-irmán sira prepara kaixa seluk tan neʼebé nakonu ho sasán no hahán iha Polónia no tula ba Ukránia, tuirmai tula tan ba área sira seluk neʼebé presiza iha oras 24 laran

9. 28 Marsu 2022: Loron 20 liutiha husi tempu neʼebé irmaun sira hetan aprova, sira tula hahán, sasán atu mantein ijiene no ai-moruk hamutuk tonelada 100 ba Ukránia

 Toʼo ohin loron, Testemuña ba Jeová haruka hahán no sasán hamutuk tonelada 190 ba Ukránia.