Iha fulan-Marsu 2020, bainhira Organização Mundial da Saúde fó sai katak moras COVID-19 mak pandemia ida, ema barak la imajina katak virus neʼe sei afeta mundu tomak toʼo tinan ida liutiha. Pandemia neʼe afeta ema millaun ba millaun iha dalan fíziku, emosaun no finanseiru. No pandemia neʼe mós afeta Testemuña ba Jeová balu. Oinsá Testemuña ba Jeová organiza no fó ajuda durante tempu susar neʼe?

 Komisaun Koordenadór husi Grupu Administradór ba Testemuña ba Jeová dirije Komisaun ba dezastre hamutuk 950 liu iha mundu tomak atu atende situasaun COVID-19. Iha situasaun balu, sira mós halo arranju balu atu fó ajuda ba Testemuña sira, no iha situasaun seluk, Testemuña sira mós simu ajuda husi governu. Komisaun ba dezastre mós halo arranju atu fó ajuda ba ema barak liu iha tempu ida deʼit.

 Hanoin toʼok kona-ba ezemplu ida iha rai-Paraguai. Jornál ida fó sai reportajen katak pandemia lori problema ekonomia no rezultadu mak “ema Paraguaianu barak la iha hahán atu han”. Maibé Komisaun ba dezastre iha Paraguai komesa ona fahe sesta bázika ba semana rua nian neʼebé inklui produtu hahán sira, sasán atu hamoos no mós sasán atu mantein ijiene nian ba família ho membru naʼin-haat. Sesta bázika ida-idak iha folin maizumenus dolar Amerikanu 30.

 Oinsá mak serbisu-naʼin sira husi komisaun ba dezastre proteje sira-nia an no ema seluk husi COVID-19? Sira uza masker no mantein distánsia fíziku. Sira mós cek katak kompañia sira prepara hahán iha fatin neʼebé moos no halo tuir didiʼak matadalan kona-ba seguransa. Neʼe inklui cek didiʼak katak ema hotu neʼebé prepara sesta bázika tenke uza ekipamentu protesaun kompletu, hamoos ho didiʼak sira-nia transporte, no rai sesta bázika sira iha fatin neʼebé hamoos uluk ona. Ikusmai, serbisu-naʼin sira neʼebé lori sesta bázika sira-neʼe presiza mantein distánsia fíziku husi irmaun-irmán sira neʼebé simu ida-neʼe.

 Iha fulan-Janeiru 2021, Komisaun Koordenadór aprova ona osan hamutuk dolar Amerikanu millaun 25 liu atu uza ajuda ema tanba COVID-19. Sukursál sira no Komisaun Dezastre sira iha fatin oioin uza osan kontribuisaun ho didiʼak no hakaʼas an atu buka sasán sira ho folin natoon. Porezemplu iha rai-Xile, irmaun sira neʼebé hola parte iha komisaun dezastre nian hakarak sosa koto kilograma 750. Maibé koto nia folin sai karun tebes iha fulan ida nia laran. Oras rua depois irmaun sira konkorda atu sosa koto ho folin neʼebé karun, vendedór neʼe hatete ba sira katak iha ema seluk neʼebé kansela atu sosa koto sira. Entaun, duké husu irmaun sira atu selu koto sira ho folin neʼebé karun, vendedór faʼan fali koto neʼebé ema seluk kansela ho folin uluk nian neʼebé baratu!

 Maibé bainhira irmaun sira atu tula koto sira-neʼe, vendedór koko atu kansela akordu, nia duun katak irmaun sira sei fahe hahán sira la ho justisa, hanesan organizasaun seluk halo. Depois halo tiha orasaun, irmaun ida bá no esplika ba vendedór katak kongregasaun ida-idak buka-hatene ona sé-sé deʼit mak presiza duni hahán. Irmaun sira mós esplika katak tanba ema iha kongregasaun nia situasaun la hanesan, entaun produtu sira iha sesta bázika neʼebé sira sei simu mós tuir sira-nia presiza. Ikusmai, sira esplika ba vendedór katak osan kontribuisaun hotu no serbisu hotu neʼebé Testemuña ba Jeová halo mak voluntáriu. Nia hakfodak loos. Vendedór neʼe konkorda atu faʼan koto ba sira tuir folin neʼebé baratu no iha tempu seluk bainhira irmaun sira sosa koto, nia kontribui koto kilograma 400.

 Irmán Lusu neʼebé ferik no faluk ona iha rai-Libéria, hela hamutuk ho ninia oan-feto, mane-foun no bei-oan naʼin-tolu. Bainhira sira matabixu no lee hamutuk eskritura loron-loron, irmán Lusu nia bei-oan mane neʼebé tinan hitu haree katak sira la iha ona hahán iha uma. Nia husu: “Orasida ita sei han saida?” Lusu hatete ba ninia bei-oan katak nia halo ona orasaun atu husu Jeová nia ajuda no nia fiar katak Jeová sei tau matan sira. Iha lokraik, katuas kongregasaun sira telefone irmán Lusu no konvida nia atu mai foti hahán balu. Irmán Lusu hatete: “Haʼu-nia bei-oan hatete katak nia agora fiar katak Jeová bele rona no hatán ba ita-nia orasaun tanba Jeová hatán ona haʼu-nia orasaun.”

 Feto ida iha Repúblika Demokrátika Kongu nia viziñu mak família Testemuña ida. Depois nia haree katak família neʼe simu hahán husi sira-nia maluk sira, nia hatete ba ninia laʼen: “Depois pandemia neʼe remata, haʼu sei sai Testemuña ba Jeová tanba sira tau matan ba sira-nia maluk durante tempu susar.” Ninia laʼen husu: “Ó atu sai Testemuña ba Jeová tan deʼit foos saku ida ka?” Nia hatán: “Lae, maibé foos saku ida-neʼe mak evidénsia husi domin neʼebé loos.”

 Testemuña ba Jeová bele ajuda lalais irmaun-irmán sira durante tempu pandemia neʼe tanba kontribuisaun neʼebé imi fó ho laran-luak. Obrigadu barak ba imi-nia kontribuisaun neʼebé imi fó liuhusi dalan oioin neʼebé temi iha website donate.pr418.com.