Iha fulan-Marsu 2022, iha anúnsiu ida neʼebé fó sai iha jw.org, no halo Testemuña ba Jeová iha mundu tomak sente kontente. Anúnsiu mak neʼe: “Se rai ida la iha regra husi governu neʼebé hanetik ema atu halibur hamutuk, Grupu Administradór deside no hakarak anima kongregasaun hotu atu halibur hamutuk iha Reuniaun-Fatin atu halaʼo reuniaun sira komesa husi loron 1 fulan-Abríl.” Maibé pandemia COVID-19 seidauk lakon totál. a Irmaun sira presiza halo mudansa, preparasaun no ekipamentu saida atu bele proteje ema sira neʼebé tuir reuniaun iha Reuniaun-Fatin atu la kona virus? Tinan rua ona ita halaʼo reuniaun liuhusi vídeo konferénsia, Reuniaun-Fatin prontu ona ka lae?

 Tuir loloos, irmaun sira prepara an ona ba fulan barak atu halaʼo fali reuniaun iha Reuniaun-Fatin sira.

 Fulan ida liutiha husi tempu neʼebé ita la halaʼo tan reuniaun iha Reuniaun-Fatin iha tinan 2020, Departamentu Planeamentu no Konstrusaun ba mundu tomak, iha Warwick, Novaiorke komesa buka-hatene oinsá COVID-19 afeta dalan neʼebé ita uza Reuniaun-Fatin no saida deʼit mak ita presiza halo atu Reuniaun-Fatin bele seguru nafatin.

 Baibain área ida nia presiza la hanesan ho área sira seluk. Irmaun Matthew De Sanctis neʼebé serbisu ho Departamentu Planeamentu no Konstrusaun esplika: “Iha nasaun balu, buat neʼebé susar mak la iha fatin atu fase liman. Irmaun-irmán sira presiza sosa bee ka kuru bee husi mota ka bee-matan tanba la iha torneira iha Reuniaun-Fatin. Iha nasaun seluk, governu balu halo regra foun kona-ba AC, sirkulasaun anin, no sinál sira kona-ba saúde no ijiene.”

 Saida mak irmaun sira halo iha situasaun sira-neʼe? Irmaun Matthew hatete katak ba Reuniaun-Fatin barak, “solusaun neʼebé simples no baratu mak diʼak liu”. Porezemplu, iha Papua-Guiné Foun, irmaun sira halo fatin fase liman simples hodi monta torneira ba balde plástiku sira. Balde sira-neʼe bele tau bee litru 20. Atu sosa ekipamentu no monta fatin fase liman iha Reuniaun-Fatin ida iha área rurál, irmaun sira gasta deʼit dolar 40. Ba Reuniaun-Fatin iha Áfrika, ita sosa ona fatin fase liman ho kualidade diʼak hamutuk 6.000 husi Ázia.

 Mudansa seluk mak monta ka troka ventuiña no ventilasaun atu anin fresku bele tama-sai iha Reuniaun-Fatin. Kongregasaun barak sosa besi naruk atu monta ba mikrofone hodi nuneʼe ema neʼebé fó komentáriu la presiza kaer mikrofone. Irmaun sira mós hamenus fatin sira neʼebé baibain ema kaer no hamoos beibeik fatin sira-neʼe, hanesan odamatan no torneira, neʼebé karik bele lori virus. Iha sentina, kongregasaun balu monta torneira neʼebé bele moris automátiku deʼit no la presiza kaer. Iha rai-Xile, irmaun sira gasta maizumenus dolar 1.400 ba Reuniaun-Fatin ida-idak atu halo mudansa sira-neʼe.

 Bainhira irmaun sira halo Reuniaun-Fatin sira seguru, sira mós hakaʼas an atu uza ho matenek osan kontribuisaun. Porezemplu, iha rai balu, sira hetan ajuda husi governu atu sosa fatin fase liman no besi naruk ba mikrofone. Sukursál sira serbisu hamutuk atu uza osan kontribuisaun ho matenek hodi sosa sasán no ekipamentu barak liu duké baibain. Sukursál sira no Departamentu Kompras ba mundu tomak halo arranju beibeik atu sosa kedas sasán no ekipamentu sira husi fábrika, hodi nuneʼe bele baratu liu no haruka mai lalais liu.

 Ema sira neʼebé komesa tuir reuniaun iha Reuniaun-Fatin sente seguru no hetan anima tanba iha arranju kona-ba halo Reuniaun-Fatin seguru liu. Irmán Dulcine husi rai-Perú hatete katak nia “sente taʼuk uitoan” bainhira rona katak ita sei komesa halaʼo reuniaun iha Reuniaun-Fatin. Dulcine hatete: “Bainhira COVID-19 foin komesa, haʼu mós kona COVID-19. Tan neʼe haʼu sente la kmaan atu bá Reuniaun-Fatin, tanba hatene katak karik haʼu bele kona tan virus neʼe. Maibé bainhira haʼu toʼo iha Reuniaun-Fatin, haʼu haree katak katuas sira halo ona buat oioin atu Reuniaun-Fatin seguru, hanesan halo fatin ba hand-sanitizer, monta mikrofone ba besi neʼebé naruk no mós iha oráriu atu hamoos ho didiʼak Reuniaun-Fatin antes no depois halaʼo reuniaun ida-idak. Buat sira-neʼe hotu halo haʼu sente kmaan duni.” b

 Irmán Sara iha rai-Zámbia hasoru susar neʼebé la hanesan. Nia esplika: “Fulan balu liubá, haʼu-nia laʼen mate tanba COVID-19. Haʼu hanoin barak kona-ba haʼu sei sente oinsá bainhira tuir reuniaun iha Reuniaun-Fatin la ho haʼu-nia laʼen.” Agora, nia sente oinsá kona-ba tuir reuniaun iha Reuniaun-Fatin? Nia dehan: “Tuir reuniaun iha Reuniaun-Fatin hatudu mai haʼu katak Jeová hamutuk ho ita durante loron ikus sira. Liu fali tempu uluk, agora haʼu sente katak haʼu hetan anima, domin no apoiu neʼebé haʼu presiza husi katuas kongregasaun sira no irmaun-irmán sira.”

 Irmaun-irmán iha mundu tomak sente agradese ba oportunidade atu tuir fali reuniaun iha Reuniaun-Fatin. Obrigada barak ba imi-nia kontribuisaun neʼebé imi fó liuhusi dalan oioin neʼebé temi iha donate.pr418.com. Kontribuisaun sira ajuda ami atu halo fatin ba adorasaun loos sai fatin neʼebé ema bele sente kmaan no seguru atu halibur hamutuk.