Agora Testemuña ba Jeová simu ai-han espirituál barak liu iha dalan eletróniku. Maibé iha fatin barak iha mundu, irmaun-irmán sira-nia osan la toʼo atu sosa internét. Irmaun-irmán seluk hela iha área neʼebé internét la iha ka internét todan loos.

 Maski nuneʼe, agora irmaun-irmán barak bele download publikasaun eletróniku maski la iha internét. Oinsá?

 JW Box mak kaixa kiʼik neʼebé sukursál sira fó ba kongregasaun sira neʼebé labele asesu internét. Iha JW Box nia laran iha router ida neʼebé organizasaun sosa husi kompañia seluk, iha software neʼebé Departamentu Komputadór nian iha Betel halo no iha mós publikasaun eletróniku no vídeo sira neʼebé fó sai iha jw.org. JW Box ida-idak nia folin maizumenus dolar 75.

 Iha Reuniaun-Fatin, irmaun-irmán sira bele liga sira-nia sasán eletróniku ba JW Box liuhusi hotspot no tuirmai download publikasaun no vídeo sira. Irmaun-irmán sira neʼebé iha sasán eletróniku neʼebé tuan mós bele liga. Maibé se kongregasaun ida la iha asesu ba internét, oinsá irmaun sira kontinua hatama publikasaun no vídeo sira neʼebé foun iha JW Box? Sukursál sei haruka beibeik USB foun neʼebé iha publikasaun no vídeo foun husi jw.org no irmaun sira bele tau neʼe iha JW Box. USB ida-idak nia folin maizumenus dolar 4.

 Oinsá JW Box ajuda ona irmaun-irmán sira? Aman ida naran Nathan Adruandra neʼebé hela iha Repúblika Demokrátika Kongu, hatete: “Durante tempu kleur haʼu koko atu download drama ‘Oh Jeová . . . haʼu tau fiar ba Ita’ no Hanoin-hetan Lot nia feen. Maibé haʼu nunka konsege download drama sira-neʼe no neʼe halo haʼu laran-kraik. Maibé agora haʼu bele download vídeo sira-neʼe ba haʼu-nia telemovel, no neʼe ajuda ami atu hanorin ami-nia oan ho didiʼak.”

 Irmaun ida neʼebé ajuda kongregasaun sira atu tau matan JW Box hatete: “Irmaun-irmán sira haree JW Box nuʼudar prezente espesiál husi Jeová. Sira kontente tebes tanba agora fasil ba sira atu download publikasaun no vídeo sira husi Ekipamentu Hanorin nian.”

 Agora irmaun sira haruka ona JW Box 1.700 liu ba irmaun sira iha Áfrika, Oseánia, no Amérika Súl no Betel halo daudaun planu atu haruka ba kongregasaun barak tan. Osan atu hola JW Box sira mai husi neʼebé? Osan neʼe mai husi kontribuisaun sira ba serbisu haklaken iha mundu tomak. Ema barak liu fó kontribuisaun sira-neʼe liuhusi donate.pr418.com. Obrigadu barak ba kontribuisaun neʼebé imi fó ho laran-luak.