Fulan-fulan, ita hein namanas atu haree programa no vídeo neʼebé fó sai iha JW Broadcasting. Maibé, ita-nia irmaun-irmán barak iha Áfrika labele asesu programa sira-neʼe. Tanbasá?

 Área barak iha Áfrika la iha asesu ba internét. No iha fatin neʼebé iha asesu internét, baibain internét laʼo neineik no folin karun tebes. Porezemplu, katuas área ida iha rai-Madagaskar download programa JW Broadcasting ida deʼit iha sala de internét. No nia presiza selu dolar 16, neʼe osan barak liu fali ema balu nia saláriu ba semana ida. a

 Maski hasoru situasaun susar oioin, maibé agora irmaun-irmán naʼin millaun ba millaun iha Áfrika bele haree JW Broadcasting maski la iha internét. Oinsá?

 Husi tinan 2017, ema neʼebé hela iha Áfrika Subsaariana bele asesu JW Broadcasting hodi uza kanál televizaun satelit JW. Kanál neʼe fó sai loroloron ho gratuitu durante oras 24, iha língua 16.

 Atu bele halo ida-neʼe, Testemuña ba Jeová aluga serbisu tranzmisaun televizaun atu fó sai programa liuhusi satelit. Nasaun hamutuk 35 iha Áfrika Subsaariana bele asesu ba kanál neʼe. Atu aluga serbisu tranzmisaun neʼe gasta osan hamutuk dolar 12.000 liu fulan-fulan. Dala ruma, selu tan osan ba kanál seluk atu bele fó sai programa neʼebé halaʼo daudaun. Ida-neʼe loke dalan ba ema rihun ba rihun atu nonton programa reuniaun boot ka programa espesiál seluk neʼebé liga ho reprezentante sukursál nian.

 Ema barak, inklui ema neʼebé laʼós Testemuña mós bele asesu kanál televizaun satelit JW iha sira-nia uma. Maibé irmaun-irmán balu la iha osan atu sosa ekipamentu hodi asesu kanál neʼe. Atu ajuda sira, agora Reuniaun-Fatin hamutuk 3.670 iha ona ekipamentu atu asesu kanál neʼe, hodi nuneʼe irmaun-irmán sira bele nonton JW Broadcasting iha neʼebá. Se Reuniaun-Fatin ida iha ona televizaun ka projetor, entaun presiza deʼit osan maizumenus dolar 70 atu sosa ekipamentu no mós haruka ida-neʼe ba Reuniaun-fatin sira. Maibé dala ruma, presiza gasta osan dolar 530 ba ekipamentu neʼebé Reuniaun-Fatin presiza.

 Ita-nia irmaun-irmán sira hafolin tebes kanál neʼe. Katuas kongregasaun ida iha rai-Kamaroins hatete: “Neʼe hanesan maná iha rai-fuik laran ba ami-nia família.” Irmaun Odebode husi rai-Nijéria hatete: “Ami-nia família nonton hamutuk kanál neʼe dala tolu semana-semana. Haʼu-nia oan sira hein namanas atu bele nonton kanál neʼe. Dala ruma, sira mós husu atu loke kanál JW nian, kuandu nonton hela kanál seluk.” Irmán Rose neʼebé mós husi rai-Nijéria hatete: “Duké haree notísias iha tempu hotu, agora haʼu nonton kanál televizaun satelit JW. Bainhira haʼu haree notísias, haʼu sente la kontente no haʼu-nia tensaun saʼe. Maibé JW Broadcasting anima haʼu no haʼu sente dame! Neʼe mak haʼu-nia kanál televizaun favoritu. Neʼe mak bensaun boot husi Jeová.”

 Katuas área ida iha rai-Mosambike hatete katak iha ninia área, ekipamentu atu asesu ba kanál JW nian monta ona iha Reuniaun-Fatin sira. Irmaun-irmán sira iha kongregasaun sira-neʼe toʼo iha Reuniaun-Fatin oras ida sedu liu atu bele nonton JW Broadcasting hodi uza satelit.

 Reuniaun boot internasionál tinan 2019 iha Johannesburg, rai-Áfrika Súl, uza kanál neʼe atu fó sai diskursu importante sira ba fatin sia, inklui diskursu neʼebé membru husi Grupu Administradór mak hatoʼo. Irmaun Sphumelele husi Departamentu Broadcasting iha sukursál Áfrika Súl hatete: “Uluk, ami sempre uza internét atu fó sai diskursu sira. Neʼe presiza internét neʼebé estavel no pakote internét neʼebé karun. Maibé kanál televizaun satelit JW mak diʼak liu no baratu liu.”

 Obrigadu barak tanba imi-nia kontribuisaun ba serbisu iha mundu tomak, ita-nia irmaun-irmán sira iha Áfrika bele nonton JW Broadcasting liuhusi satelit. Ami hafolin tebes imi-nia kontribuisaun neʼebé imi fó liuhusi dalan oioin neʼebé temi iha donate.pr418.com.