Múzika mak prezente furak husi Jeová. Múzika bele afeta ita-nia dalan atu hanoin, troka ita-nia sentimentu no mós bele motiva ita. Neʼe mak buat neʼebé ita sente kuandu rona Knananuk sira husi Broadcasting. Tuir loloos, knananuk sira-neʼe mós bele halo buat seluk tan, knananuk sira-neʼe mós ajuda ita hakbesik liután ba Jeová.

 Husi tinan 2014, iha ona knananuk hamutuk 70 neʼebé fó sai iha JW Broadcasting no agora daudaun ita bele download knananuk barak iha língua 500 liu. Maibé karik Ita hanoin: ‘Sé mak halo knananuk sira-neʼe, no atu prodús knananuk sira-neʼe envolve serbisu saida deʼit?’

 Irmaun-irmán grupu ida neʼebé matenek kona-ba múzika iha Departamentu Áudio no Vídeo mak halo knananuk sira-neʼe. Komisaun Hanorin nian husi Grupu Administradór mak tau matan ba grupu neʼe. Iha grupu neʼe, iha irmaun-irmán hamutuk naʼin-13 neʼebé hakerek liafuan ba knananuk, halo melodia, grava no edit múzika, halo oráriu, no halo serbisu seluk tan. Komisaun Hanorin nian mós aprova ona irmaun-irmán sira iha mundu tomak atu halaʼo serbisu voluntáriu hodi hola parte iha serbisu neʼe. Sira mak ema neʼebé kria múzika, kantadór no tokadór sira. Irmaun-irmán sira-neʼe ho haraik an uza sira-nia talentu no sira la buka atu hetan gaba husi ema.

 Atu prodús knananuk sira-neʼe envolve serbisu saida deʼit? Primeiru, Komisaun Hanorin nian deside Eskritura tema ba knananuk neʼe no knananuk neʼe tenke book ema atu sente oinsá. Tuirmai, grupu neʼe hetan knaar atu halo melodia no mós liafuan sira ba knananuk neʼe. Tuirmai sira grava knananuk neʼe hodi fó ba Komisaun Hanorin nian atu rona uluk no husu sujestaun kona-ba oinsá atu bele hadiʼa liután knananuk neʼe. Tuirmai, grupu neʼe hadiʼa fali knananuk no grava ba dala ikus. Knananuk sira-neʼe grava iha fatin oioin, inklui iha sukursál sira no iha irmaun-irmán sira-nia uma neʼebé iha ekipamentu gravasaun nian.

 Atu bele halo múzika no grava knananuk sira, ita-nia irmaun-irmán sira-neʼe uza programa komputadór oioin. Presiza mós ekipamentu sira hanesan, instrumentu múzika, ekipamentu atu edit múzika, mákina amplifikadór, speaker sira, no mós mikrofone sira. Mikrofone ida nia folin maizumenus komesa husi dolar 100 toʼo dolar 1.000 liu (U.S). Iha tinan 2020, ita-nia organizasaun gasta osan hamutuk dolar 116.000 (U.S) ba ekipamentu gravasaun múzika nian.

 Saida mak organizasaun halo atu uza didiʼak osan kontribuisaun? Duké iha grupu múzika boot neʼebé prodús múzika iha Betel, irmaun-irmán barak neʼebé la serbí iha Betel prontu atu ajuda. Liután neʼe, duké tokadór no kantadór sira mai halibur hamutuk hodi halo gravasaun, irmaun-irmán sira uza programa komputadór neʼebé bele kria lian husi instrumentu múzika oioin.

 Irmaun no irmán sira gosta atu rona knananuk sira husi Broadcasting. Irmán Tara neʼebé hela iha rai-Alemaña hatete: “Knananuk sira-neʼe ajuda haʼu atu sente kalma bainhira haʼu laran-taridu. Bainhira rona knananuk sira-neʼe iha haʼu-nia língua materna, haʼu sente hanesan Jeová hakoʼak metin haʼu.” Irmaun Dmitry iha rai-Kazakistaun hatete: “Haʼu gosta tebes atu rona knananuk sira-neʼe no la presiza hanoin barak katak knananuk sira-neʼe sei book haʼu atu halo buat neʼebé aat hanesan knananuk sira seluk ohin loron. Liután neʼe, knananuk sira-neʼe mós ajuda haʼu atu iha relasaun diʼak ho Jeová.”

 Irmán Delia iha rai-Áfrika Súl esplika buat neʼebé nia sente kona-ba knananuk husi Broadcasting: “Knananuk sira-neʼe hametin haʼu-nia fiar. Bainhira haʼu sente triste no hasoru situasaun susar, sempre iha knananuk ida neʼebé bele ajuda haʼu atu tahan situasaun neʼebé susar. Dala barak, haʼu bele sente kalma fali bainhira rona deʼit knananuk nia melodia!”

 Knananuk balu mak sai nuʼudar ema balu nia múzika favoritu. Irmán Lerato iha rai-Áfrika Súl hatete: “Knananuk ‘Besik daudaun ona’ no ‘Paraízu neʼebé atu mai’ ajuda haʼu atu imajina haʼu-nia an iha Paraízu bainhira haʼu fó benvindu ba haʼu-nia amá neʼebé sei moris-hiʼas. Bainhira haʼu rona knananuk sira-neʼe, haʼu imajina tempu neʼebé nia halai mai ho liman nakloke luan atu hakoʼak haʼu.”

 Iha knananuk ida neʼebé ajuda tebes joven feto ida iha rai-Sri Lanka. Nia dehan: “Profesora siénsia trata aat haʼu iha klase laran tanba haʼu mak Testemuña ba Jeová. Haʼu sente taʼuk no haʼu la hatene atu hatete saida. Kuandu haʼu fila ba uma, haʼu-nia amá anima haʼu atu rona knananuk ‘Rajin belajar’. Knananuk neʼe ajuda haʼu rekoñese katak haʼu presiza halo riset liután no prepara haʼu-nia resposta atu bele defende haʼu-nia fiar. Loron tuirmai, haʼu koʼalia ho haʼu-nia profesora. Nia rona didiʼak mai haʼu no nia hatete katak agora nia komprende ho diʼak liután saida mak Testemuña ba Jeová fiar. Haʼu agradese ba Jeová nia organizasaun tanba fó ona knananuk neʼebé bele anima haʼu.”

 Osan atu apoia serbisu oioin hodi prodús knananuk sira-neʼe mai husi neʼebé? Serbisu ida-neʼe hetan apoiu husi kontribuisaun iha mundu tomak, kontribuisaun barak fó liuhusi dalan oioin neʼebé temi iha donate.pr418.com. Obrigadu barak ba imi-nia kontribuisaun neʼebé imi fó ho laran-luak.