Grupu Administradór hakarak tebes atu uza osan kontribuisaun hodi halo fasilidade oioin atu bele apoia serbisu haklaken. Porezemplu, durante tinan serbisu nian 2023, sukursál sira husi Testemuña ba Jeová gasta osan dolar millaun 500 atu sosa, harii, halo renovasaun no manutensaun ba Reuniaun-Fatin no Salaun ba Asembleia iha mundu tomak. a Osan neʼe mós la inklui osan neʼebé kongregasaun hotu iha mundu tomak gasta atu tau matan ba sira-nia Reuniaun-Fatin rasik.

 Liután neʼe, Grupu Administradór mós uza osan kontribuisaun atu harii no tau matan ba sukursál sira neʼebé organiza no apoia serbisu haklaken iha mundu tomak. Organizasaun mós halo simples serbisu balu iha sukursál atu nuneʼe bele hamenus gastu kona-ba osan no uza fali osan neʼe atu harii no halo renovasaun ba Reuniaun-Fatin no Salaun ba Asembleia. Maski nuneʼe, organizasaun nafatin presiza osan barak atu bele hadiʼa, halo renovasaun, no muda sukursál sira. Tanbasá projetu sira-neʼe importante? Oinsá mak sukursál sira apoia serbisu haklaken neʼebé importante? Mai ita buka resposta.

 Sukursál barak mak maizumenus tinan 30 ka 40 liu! Irmaun Nicholas neʼebé serbí iha Departamentu Planeamentu no Konstrusaun ba mundu tomak, hatete: “Maski ita tau matan didiʼak ba uma ida, maibé nuʼudar tempu liu daudaun uma neʼe sei sai tuan no iha problema oioin. Kuandu ita halo renovasaun ba uma ida, irmaun-irmán sira bele kontinua uza uma neʼe ba tinan barak liután.”

 Presiza mós halo mudansa ba sukursál sira atu bele apoia nafatin organizasaun nia presiza oioin. Iha mundu tomak, agora iha haklaken-naʼin barak liu fali uluk. Atu apoia irmaun-irmán sira-neʼe, organizasaun presiza tan ema Betel atu bele serbí iha sukursál sira. Tanba ema neʼebé serbisu iha Betel aumenta, rezultadu mak sukursál nia fatin la toʼo ba ema Betel hotu!

 Organizasaun mós hakarak halo sukursál hotu seguru nafatin. Tanba ita moris iha loron ikus sira, dezastre naturais neʼebé perigu akontese dala barak liu fali uluk. (Lucas 21:11) Bainhira irmaun-irmán sira halo renovasaun, sira halo konstrusaun iha dalan neʼebé modernu no neʼe halo fasilidade sira sai metin no seguru liután. Tan neʼe kuandu akontese dezastre naturais, irmaun sira bele uza fatin sira-neʼe atu halo arranju oioin hodi ajuda irmaun-irmán sira no mós bele kontinua organiza serbisu haklaken.

 Durante tinan serbisu nian 2023, Grupu Administradór fó lisensa atu halo serbisu konstrusaun ba sukursál hamutuk 43. Neʼe mak maizumenus porsentu 50 husi sukursál hotu iha mundu tomak. Mai ita haree oinsá irmaun-irmán sira hafolin tebes serbisu konstrusaun neʼe.

 Rai-Angola. Membru ida husi Komisaun ba Sukursál Angola naran Matt hatete: “Ami hetan priviléjiu atu haree profesia iha Ageu 2:7 sai loos iha dalan neʼebé espesiál. Iha tinan sanulu nia laran deʼit, haklaken-naʼin sira aumenta ba porsentu 60! Atu bele apoia haklaken-naʼin sira-neʼe, ema Betel mós presiza aumenta ba dala tolu. Tanba sukursál mak kiʼik, ami labele konvida ema barak atu mai serbisu iha Betel. Rezultadu mak ema Betel presiza halo serbisu ba oras barak liu.”

 Irmaun balu simu knaar atu buka-hatene oinsá mak sira bele halo sukursál sai boot liután. Foufoun, sira hanoin katak diʼak liu se sira halo renovasaun ba sukursál neʼebé iha ona. Kuandu halo tiha peskiza, sira rekoñese katak dalan diʼak liu atu uza osan kontribuisaun mak laʼós hodi halo renovasaun ba sukursál neʼe. Tuirmai, sira fó sujestaun atu sosa no halo renovasaun ba uma seluk. Irmaun Matt hatete: “Bainhira irmaun sira fó sujestaun ba Komisaun ba Sukursál atu sosa no halo renovasaun ba fatin seluk, ami hanoin barak no sente katak fatin uluk diʼak liu fali fatin foun. Agora serbisu neʼe hotu ona no ami bele haree fatin neʼe furak tebes. Jeová haraik bensaun duni ba desizaun neʼe.”

 Sukursál foun neʼe inklui mós uma ba ema Betel no apartamentu sira neʼebé la dook husi área Betel nian. Klaru katak, karik iha futuru irmaun sira presiza halo boot liután sukursál Angola. Maibé agora daudaun sukursál foun neʼe apoia ema Betel atu bele kontinua ajuda haklaken-naʼin sira neʼebé aumenta barak.

 Rai-Japaun. Irmaun sira harii sukursál Japaun maizumenus tinan 40 liubá no fatin neʼe nunka hetan renovasaun iha dalan neʼebé boot. Irmaun-irmán sira iha neʼebá halo serbisu oioin atu mantein fatin neʼe, maski nuneʼe fatin neʼe mak tuan loos. Tan neʼe, agora daudaun irmaun-irmán sira halo renovasaun boot ba sukursál.

 Arranju oioin iha sukursál Japaun mós troka. Antes tinan 2015, ema Betel la presiza teʼin, tanba Betel iha departamentu neʼebé prepara ona hahán ba sira. Tan neʼe, uluk sukursál harii kuartu sira ho dapur neʼebé kiʼik deʼit. Agora ema Betel barak presiza teʼin ba sira-nia an rasik. Entaun durante renovasaun neʼe sira harii dapur neʼebé natoon iha kuartu ida-idak atu nuneʼe fasil liu ba ema Betel atu teʼin rasik. Irmán ida naran Kumiko neʼebé serbí iha sukursál Japaun, hatete: “Haʼu kontente tebes tanba agora iha dapur neʼebé natoon, no neʼe halo fasil ba haʼu atu apoia Betel nia arranju foun.”

 Serbisu neʼebé halaʼo iha sukursál Japaun mak parte importante ba serbisu iha mundu tomak. (Mateus 28:19, 20) Iha mundu tomak, iha sukursál rua deʼit neʼebé print Bíblia kompletu, ida mak sukursál Japaun. Entaun, irmaun sira neʼebé halo projetu konstrusaun mós monta mákina neʼebé bele supa rai-rahun no surat-tahan nia rahun iha fatin print nian. Atu sosa no monta mákina neʼe, organizasaun gasta dolar millaun ida, maibé mákina neʼe importante tanba neʼe proteje irmaun-irmán sira neʼebé serbisu iha neʼebá no apoia sira atu kontinua print no haruka ai-han espirituál.

 Durante tempu neʼebé projetu renovasaun halaʼo, irmaun-irmán sira mós la para atu print Bíblia. Membru ida ba Komisaun ba Sukursál Japaun naran Trey hatete: “Durante projetu konstrusaun neʼe, ita-nia organizasaun prodús Bíblia iha língua barak liután, no ema neʼebé hakarak hetan Bíblia mós aumenta. Departamentu no ema oioin tenke serbisu hamutuk ho didiʼak atu bele halo planu kona-ba monta ekipamentu foun no mós kontinua print publikasaun sira.” Maski hasoru susar oioin, maibé durante fulan-Marsu toʼo fulan-Agostu tinan 2023 sukursál neʼe print ona Bíblia hamutuk 220.000 kada fulan. Neʼe mak durante tempu neʼebé irmaun sira okupadu loos tanba projetu renovasaun neʼe. Liután neʼe, irmaun sira bele kumpre serbisu hotu neʼe hodi la gasta osan barak liu fali buat neʼebé sira deside ona.

 Poupa enerjia mós parte importante ba renovasaun neʼe. Sukursál neʼe sei uza panel solár atu ajuda sukursál poupa osan dolar 120.000 tinan-tinan. Sira mós sei uza janela neʼebé iha vidru mahar atu hamenus enerjia neʼebé organizasaun uza no poupa osan dolar 10.000 tinan-tinan. Maski sasán sira-neʼe mak karun, maibé ikusmai neʼe bele ajuda organizasaun atu poupa osan dolar millaun 3,5 durante tempu neʼebé sukursál uza sasán sira-neʼe. Sasán sira-neʼe mós sei hamenus impaktu ba ambiente iha sukursál.

 Projetu rua neʼe hatudu oinsá organizasaun presiza halo serbisu barak atu Betel bele apoia serbisu haklaken. Maibé serbisu neʼe seidauk hotu. Irmaun Aaron husi Departamentu Planeamentu no Konstrusaun iha mundu tomak hatete: “Irmaun sira kumpre ona serbisu barak, maibé sei iha tan serbisu barak atu halo.” Oinsá mak organizasaun bele kumpre serbisu neʼe hotu? Irmaun Aaron hatete: “Ami hafolin tebes laran-luak neʼebé ema hotu hatudu hodi fó osan kontribuisaun neʼebé uza atu halaʼo projetu sira-neʼe, maibé ami mós agradese ba irmaun-irmán sira neʼebé prontu atu ajuda no mós sira neʼebé prepara atu ajuda iha futuru. Tanba irmaun-irmán sira prontu atu ajuda no mós fó kontribuisaun, neʼe hatudu ho klaru katak Jeová haraik bensaun ba ita-nia serbisu.”—Salmo 110:3.

 Ita-nia serbisu konstrusaun no renovasaun hetan apoia husi kontribuisaun neʼebé ema fó, ema barak fó kontribuisaun liuhusi donate.pr418.com. Obrigadu barak ba imi hotu neʼebé kontinua fó ho laran-luak.