Buat ida neʼebé Testemuña ba Jeová hein namanas tinan neʼe mak atu haree vídeo kona-ba Liafuan Diʼak husi Jesus Episode 1. Ema millaun ba millaun haree ona ida-neʼe. No neʼe mak foin episode primeiru husi episode 18! Saida mak akontese durante prosesu atu halo vídeo neʼe, no saida mak Ita halo ona atu ajuda sira kumpre ida-neʼe?

 Fatin neʼebé uza barak liu atu halo filme Liafuan Diʼak mak iha sukursál Australásia, maizumenus ema naʼin-50 toʼo 80 mak iha fatin neʼe bainhira prosesu foka istória ida-idak. a Sempre iha hahán meiudia, hahán kalan no merenda ba atór no serbisu-naʼin sira. Planu kona-ba lista hahán nian prepara ho didiʼak. Esther neʼebé serbisu iha Departamentu Hahán nian hatete: “Ami sosa ai-han sira husi fatin oioin atu nuneʼe ami bele hetan ai-han sira neʼebé kualidade diʼak ho presu neʼebé diʼak. No ami sempre troka kuantidade ba hahán neʼebé ami prepara atu nuneʼe la iha restu neʼebé soe deʼit.” Folin hahán ba ema ida loroloron mak maizumenus dolar Amerikanu haat.

 Atór no serbisu-naʼin sira laʼós deʼit presiza hahán, maibé mós presiza protesaun. Protesaun husi saida? Dala barak klima iha Austrália mak ladún manas no la iha kalohan, maibé radiasaun husi loro-matan mak perigu tebes. Atu proteje ema hotu husi loro-matan no loron manas, irmaun-irmán sira harii tenda no prepara fatin atu hamahon an, no sira prepara sunscreen, sombriña, no bee. Kevin neʼebé serbisu ho Grupu Áudio no Vídeo, hatete: “Irmaun-irmán barak neʼebé halo serbisu neʼe mak sira neʼebé serbí iha Betel maibé hela iha fatin oioin. Sira halo ida-neʼe no knaar barak seluk ho haraik an no kontente. Ita bele kumpre projetu neʼe tanba sira-nia ajuda.”

 Parte balu husi filme sei la haree realidade se foka iha estúdiu ka fatin drama nian iha sukursál. Atu grava parte balu husi filme, presiza ba fatin seluk. Iha Bíblia nia tempu, la iha eletrisidade, estrada ho alkatraun, no uma modernu sira, entaun fatin neʼebé diʼak atu halo filme mak iha área rurál. Presiza lori roupa hotu no ekipamentu ba fatin atu grava vídeo no rai didiʼak sasán sira-neʼe iha neʼebá. Antes komesa grava vídeo, asistente sira husi koordenadór ba produsaun cek katak jeradór, bee hemu, no sentina prepara tiha ona. Atór no ekipa sira hela iha irmaun-irmán sira-nia uma, iha karreta trailer, ka iha otél sira.

 Hasai vídeo iha fatin sira-neʼe mak karun, han tempu no halo ema sira neʼebé hola parte sai kole tebes. Entaun, iha tinan 2023, Grupu Administradór konkorda atu sosa video wall ho presu dolar Amerikanu millaun 2,5 atu bele halo produsaun virtuál. Teknolojia ida-neʼe uza monitór boot neʼebé iha rezolusaun boot tebes no fó sai naroman hanesan realidade duni. Rezultadu mak ita la presiza gasta osan barak atu halo gravasaun vídeo iha fatin seluk. Darren neʼebé serbí nuʼudar membru ba Komisaun Sukursál Australásia, hatete: “Grava vídeo hodi uza video wall la halo atór sira sai kole lalais no ekipa bele hasai vídeo dala balu. Porezemplu, se ami atu hasai vídeo iha fatin seluk, ami só iha minutu balu atu hasai vídeo ba loro-matan monu antes loro-matan lakon. Maibé ho video wall, ami bele kria loro-matan monu dala barak toʼo ami hetan rezultadu neʼebé diʼak.”

 Episode ida-idak husi série Liafuan Diʼak presiza atór atus ba atus no ekipa barak. Sira sente oinsá kona-ba buat neʼebé irmaun-irmán sira halo atu tau matan ba sira?

 Amber, neʼebé halo viajen ba kilómetru 700 husi ninia uma iha Melbourne atu partisipa iha projetu neʼe, hatete: “Husi tempu neʼebé haʼu toʼo iha aeroportu, irmaun sira iha Betel tau matan haʼu ho didiʼak. Ema Betel barak mak konvida haʼu atu han hamutuk ho sira ka hemu xá. Iha fatin ba gravasaun vídeo, ema hotu halo haʼu sente kmaan no domin. Haʼu-nia viajen neʼe nakonu ho bensaun. Haʼu sente hanesan haʼu la halo sakrifísiu ruma!”

 Derek neʼebé serbisu ho ekipa produsaun nian hatete: “Departamentu barak mak apoia ami husi projetu neʼe hahú. Haʼu sente agradese tanba iha irmaun-irmán sira neʼebé sakrifísiu sira-nia tempu, rikusoin, no enerjia ba projetu neʼe. Sira apoia, prontu atu halo tuir, no laran-diʼak. Jeová haraik bensaun ba sira no ami. Haʼu fiar metin katak Jeová laʼós interese deʼit ba rezultadu husi ita-nia serbisu, maibé nia mós interese ba oinsá ita kumpre serbisu neʼe.”

 Obrigadu barak ba apoia neʼebé imi fó ba série vídeo neʼe hodi fó kontribuisaun, inklui kontribuisaun neʼebé imi fó liuhusi donate.pr418.com.