Jesus hatete ba ninia dixípulu sira: “Imi sei sai haʼu-nia testemuña . . . toʼo rai sira neʼebé dook liu iha mundu.” (Apóstolu 1:8) Ohin loron, Testemuña ba Jeová kumpre mandamentu neʼe ho badinas. Maski nuneʼe, ema iha fatin balu iha mundu inklui área sira neʼebé luan no iha populasaun barak, seidauk rona kona-ba lia-loos. No iha rai balu, iha Testemuña uitoan deʼit. (Mateus 9:37, 38) Saida mak ita halo atu bele haklaken ba ema barak liután?

 Atu halo tuir Jesus nia mandamentu, Komisaun Serbisu nian husi Grupu Administradór husi Testemuña ba Jeová haruka misionáriu sira bá área neʼebé presiza liután haklaken-naʼin. Agora daudaun, iha misionáriu hamutuk naʼin-3.090 iha mundu tomak. a Sira barak maioria hetan ona treinamentu iha eskola Bíblia, hanesan Eskola ba Haklaken-Naʼin Tempu-Tomak. Misionáriu sira prontu atu husik sira-nia uma no muda ba nasaun seluk. Misionáriu sira-neʼe mak maduru, hetan ona treinu no iha esperiénsia, tan neʼe sira bele ajuda habelar liafuan diʼak no sai nuʼudar ezemplu diʼak ba dixípulu foun sira.

 Iha sukursál ida-idak, departamentu neʼebé tau matan pioneiru no misionáriu sira serbisu hamutuk ho Komisaun ba Sukursál atu tau matan ba misionáriu sira-nia presiza, hanesan hela-fatin, tratamentu médiku, no mós osan uitoan ba sira-nia presiza loroloron. Durante tinan serbisu nian 2020, Testemuña ba Jeová gasta osan besik dolar millaun 27 atu tau matan ba misionáriu sira. Tanba arranju neʼe, misionáriu sira bele tau fokus no uza sira-nia forsa atu haklaken, no mós hametin irmaun-irmán sira iha sira-nia kongregasaun.

 Oinsá misionáriu sira ajuda serbisu haklaken sai belar liután? Irmaun Frank Madsen, membru husi Komisaun ba Sukursál iha rai-Malavi hatete: “Misionáriu sira mak aten-brani no iha esperiénsia, tan neʼe sira bele ajuda irmaun-irmán sira iha kongregasaun atu komesa haklaken iha área oioin neʼebé susar atu haklaken, hanesan iha bairru neʼebé ema labele tama arbiru, ka komunidade no área neʼebé koʼalia língua seluk. Sira mós hakaʼas an atu aprende ema lokál nia língua no kultura, no neʼe anima ema seluk. Sira mós ajuda joven sira atu hanoin kona-ba serbí Maromak tempu-tomak. Ami agradese ba Jeová tanba misionáriu sira.”

 Membru ida husi Komisaun ba Sukursál iha nasaun seluk hatete: “Misionáriu sira hatudu ho klaru katak Jeová nia povu iha mundu tomak iha duni unidade. Ema neʼebé laʼós Testemuña mós bele haree rasik katak ita nafatin iha unidade maski kultura la hanesan, maibé Bíblia nia hanorin sira ajuda ona ita atu moris ho unidade.”

 Oinsá misionáriu sira ajuda haklaken-naʼin sira? Irmaun Paulo husi Timor-Leste, sente agradese ba feen-laʼen misionáriu neʼebé serbí iha ninia kongregasaun. Nia hatete: “Ami-nia área rai-manas tebes. No maski, misionáriu sira mai husi rai neʼebé malirin, maibé rai neʼebé manas la hanetik sira atu haklaken. Sira sempre tuir grupu haklaken. Haʼu haree beibeik sira bá vizita fali iha meiudia, kuandu rai manas loos no mós iha kalan. Sira ajuda ona ema barak atu aprende lia-loos, inklui haʼu. Ho laran-manas no badinas, sira uza sira-nia moris tomak atu serbí Jeová no neʼe motiva kongregasaun tomak atu serbí Jeová liután.”

 Pioneiru regulár ida iha rai-Malavi naran Ketti konta kona-ba oinsá feen-laʼen misionáriu ajuda ninia família: “Bainhira feen-laʼen misionáriu serbí iha ami-nia kongregasaun, haʼu mesak deʼit mak Testemuña iha haʼu-nia família laran. Maibé feen-laʼen neʼe apoia haʼu no sira sai besik ho haʼu-nia família. Sira-nia ezemplu diʼak ajuda haʼu-nia oan sira atu haree katak serbí Jeová lori kontente. Tanba misionáriu sira-nia influénsia diʼak, haʼu-nia oan-feto naʼin-tolu mós serbí nuʼudar pioneiru regulár no haʼu-nia laʼen komesa tuir reuniaun.”

 Oinsá organizasaun bele taka gastu ba misionáriu sira-nia presiza? Liuhusi osan kontribuisaun ba serbisu iha mundu tomak, neʼebé ema barak fó liuhusi website donate.pr418.com. Ami agradese tebes ba imi-nia kontribuisaun.