Testemuña ba Jeová hanoin tebes sira-nia maluk fiar-naʼin. (1 Pedro 2:17) Ita barak sente hanesan irmán Tannis neʼebé hela iha rai-Kénia. Nia hatete: “Haʼu gosta tebes atu rona kona-ba irmaun-irmán sira-nia situasaun iha mundu tomak.” Oinsá mak irmán Tannis no Testemuña millaun ba millaun bele hetan informasaun kona-ba neʼe? Husi tinan 2013, ita bele hetan informasaun iha parte Notísias iha website jw.org.

 Iha parte Notísias, iha informasaun oioin neʼebé ita bele tau fiar kona-ba Testemuña ba Jeová. Informasaun kona-ba projetu konstrusaun, fó ajuda ba ema bainhira dezastre mosu, fó sai Bíblia iha língua oioin no eventu importante seluk. Parte neʼe mós fó sai kona-ba irmaun-irmán sira neʼebé tama komarka tanba sira-nia fiar. Iha mós esperiénsia kapás kona-ba kampaña haklaken no Memoriál. Sé mak halo peskiza atu hakerek notísias sira-neʼe, no oinsá atu prepara notísias sira-neʼe?

 Departamentu Informasaun ba Públiku mak tau matan ba parte Notísias iha jw.org. Departamentu neʼe iha sede-jerál no simu matadalan husi Komisaun Koordenadór nian husi Grupu Administradór. Irmaun-irmán naʼin-100 liu mak sai parte ba Departamentu Informasaun ba Públiku, sira halo knaar nuʼudar hakerek-naʼin, halo peskiza, halo dezeñu no tradús. Irmaun-irmán barak iha departamentu neʼe mak voluntáriu online. Irmaun-irmán seluk komunika ho ema iha governu, profesór, mestre sira no mós média sira. Departamentu Informasaun ba Públiku iha sede-jerál hetan apoiu husi Departamentu Informasaun ba Públiku iha sukursál 80 liu iha mundu tomak.

 Atu prepara notísias, irmaun sira iha sede-jerál no sukursál sira serbisu hamutuk. Bainhira irmaun sira deside katak iha notísias diʼak atu fó sai, sira halo peskiza no buka informasaun neʼebé loos no ema bele tau fiar. Sira mós entrevista ema no koʼalia ho matenek-naʼin sira. Bainhira hetan tiha faktu hotu, sira hakerek, edit, lee fali, prepara foto sira no haruka ida-neʼe ba Komisaun Koordenadór nian atu aprova.

 Ita-nia maluk fiar-naʼin sira sente oinsá kona-ba parte Notísias iha jw.org. Irmán Cheryl iha rai-Filipinas hatete: “Haʼu gosta tebes hahú haʼu-nia loron hodi lee notísias kona-ba Jeová nia organizasaun no ninia povu.”

 Lee-naʼin barak koʼalia kona-ba diferensa entre Notísias iha jw.org no notísias husi média seluk. Irmán Tatiana iha rai-Kazakistaun hatete: “Haʼu agradese tebes tanba haʼu bele tau fiar ba notísias iha jw.org. Informasaun neʼe sempre bazeia ba faktu.” Irmán Alma iha rai-Méxiku hatete: “Baibain notísias neʼebé média fó sai nakonu ho notísias aat deʼit, maibé parte Notísias iha jw.org anima tebes haʼu.”

 Ema bele tau fiar ba informasaun iha parte Notísias, no informasaun neʼe mós bele hametin ema nia fiar. Irmaun Bernard iha rai-Kénia hatete: “Parte Notísias iha jw.org ajuda haʼu atu sente katak irmaun-irmán sira iha mundu tomak mak haʼu-nia família, maski sira iha fatin seluk. Haʼu bele temi sira-nia naran no sira-nia situasaun iha haʼu-nia orasaun.” Irmán Bybron neʼebé mós hela iha rai-Kénia hatete: “Haʼu sempre sente kontente tebes bainhira lee informasaun foun kona-ba Bíblia neʼebé fó sai iha língua seluk. Informasaun sira-neʼe fó-hanoin haʼu katak Jeová la todan ba sorin.”

 Ita mós bele hetan anima husi notísias sira kona-ba irmaun-irmán sira neʼebé ema fó-terus. Irmán Jackline iha rai-Kénia hatete: “Bainhira haʼu hanoin kona-ba aten-brani neʼebé irmaun-irmán sira hatudu, neʼe hametin haʼu-nia fiar. Haʼu sempre buka-hatene saida mak ajuda sira atu tahan. Haʼu aprende kona-ba oinsá buat simples hanesan orasaun, lee Bíblia no kanta mak importante tebes atu ajuda irmaun-irmán sira hamriik metin nafatin.”

 Irmán Beatriz iha rai-Kostarrika hafolin tebes notísias kona-ba dezastre naturais neʼebé kona irmaun-irmán sira. Nia hatete: “Parte Notísias ajuda haʼu atu haree oinsá Jeová nia organizasaun ajuda irmaun-irmán sira ho lalais no ho domin. Neʼe halo haʼu fiar metin katak neʼe mak Jeová nia organizasaun duni.”

 Ita agradese tebes tanba bele simu informasaun foun liu kona-ba irmaun-irmán sira iha mundu tomak. Ami bele prepara notísias sira-neʼe tanba kontribuisaun neʼebé imi fó ba serbisu iha mundu tomak liuhusi website donate.pr418.com. Obrigadu barak ba imi-nia laran-luak.