Irmaun ida hatete: “Haʼu hein namanas ba ida-neʼe durante tinan 19!” Irmaun neʼe hein saida? Bíblia Sagrada Tradusaun Mundu Foun, Mateus-Apokalipse iha ninia língua, Bengalí. Ema barak mós hatete nuneʼe kuandu simu Bíblia Tradusaun Mundu Foun iha sira-nia língua. Maibé Ita rasik hatene saida deʼit mak envolve iha prosesu atu tradús no prodús Bíblia ka lae?

 Primeiru, Komisaun Hakerek nian husi Grupu Administradór fó knaar ba irmaun-irmán balu atu forma ekipa ida atu tradús Bíblia. Ekipa neʼe presiza tempu hira atu tradús Bíblia? Irmaun Nicholas Ahladis husi Departamentu Serbisu Tradusaun iha Warwick, Novaiorke, esplika: “Neʼe depende ba buat oioin, inklui tradutór hira mak bele ajuda iha projetu neʼe, língua neʼe mak susar ka lae, lee-naʼin sira komprende ema nia toman iha Bíblia nia tempu ka lae, no mós área ida-idak koʼalia língua neʼe iha dalan neʼebé hanesan ka lae. Baibain presiza tinan ida toʼo tinan tolu atu tradús deʼit Mateus toʼo Apokalipse no presiza tinan haat ka liu atu tradús Bíblia tomak. No presiza tinan barak liután atu tradús Bíblia iha língua liman nian.”

 Presiza mós ema barak nia ajuda, laʼós deʼit tradutór sira. Irmaun-irmán grupu ida ho situasaun moris oioin no dala ruma husi nasaun seluk sei hetan knaar atu lee tradusaun neʼe. No sira la hetan osan kuandu ajuda. Sira-nia sujestaun sei ajuda tradutór atu prodús tradusaun Bíblia neʼebé loos, klaru no ema bele komprende. Irmaun ida iha rai-Áfrika Súl neʼebé fó treinu ba tradutór Bíblia sira hatete katak “tradutór sira sente katak sira iha responsabilidade boot ba Jeová no ba ema neʼebé lee ninia Liafuan”.

 Bainhira Bíblia tradús kompletu ona, irmaun-irmán sira sei print no jilid Bíblia. Atu bele print Bíblia, presiza buat sanulu: surat-tahan, tinta, materiál neʼebé uza nuʼudar Bíblia nia kulit, goma, hena neʼebé taka parte laran husi Bíblia nia kulit, buat neʼebé halo surat-tahan ninin nabilan, fita, kabas neʼebé suku iha Bíblia nia leet, surat-tahan mahar oin rua atu halo Bíblia metin no toos. Iha tinan 2019, organizasaun uza osan hamutuk dolar millaun 20 ba buat sira-neʼe atu bele prodús Bíblia sira. Irmaun-irmán sira neʼebé serbisu atu print Bíblia uza oras 300.000 liu durante tinan 2019 atu prodús no haruka Bíblia ba fatin oioin.

 Tanbasá organizasaun hasai osan barak no uza tempu barak ba ida-neʼe? Irmaun Joel Blue husi Departamentu Print Internasionál nian hatete: “Bíblia mak publikasaun importante liu hotu neʼebé ami prodús. Tan neʼe, ami hakarak halo ho didiʼak atu nuneʼe bele fó glória ba Maromak neʼebé ita adora no fó glória ba ita-nia mensajen neʼebé ita haklaken.”

 Ita-nia organizasaun mós prodús Bíblia ba lee-naʼin sira neʼebé defisiente. Porezemplu, Bíblia Tradusaun Mundu Foun iha lian braile tradús ona ba língua sanulu. Presiza oras ualu liu atu halo Bíblia braile neʼebé kompletu, no neʼe inklui volume barak neʼebé okupa metru 2,3 iha armáriu. Ami mós prodús Bíblia edisaun espesiál ba prizioneiru sira iha komarka tanba sira bele simu deʼit Bíblia ho kulit husi surat-tahan.

 Bíblia Tradusaun Mundu Foun troka ema barak nia moris. Haree toʼok ezemplu ida husi kongregasaun lian Kiluba iha área naran Tombe, iha Repúblika Demokrátika Kongu. Tombe mak dook kilómetru 1.700 liu husi sidade kapitál. Iha Bíblia ida deʼit ba Testemuña sira iha neʼebá no Bíblia neʼe uza liafuan neʼebé antigu. Irmaun sira uza Bíblia neʼe troka malu atu nuneʼe sira bele prepara ba reuniaun. Maibé husi fulan-Agostu 2018, irmaun-irmán ida-idak iha kongregasaun lian Kiluba hetan Bíblia Tradusaun Mundu Foun neʼebé kompletu iha língua Kiluba neʼebé modernu.

 Irmán ida neʼebé koʼalia lian Alemaun esplika kona-ba Bíblia Tradusaun Mundu Foun edisaun revizaun nian iha ninia língua hodi dehan: “Haʼu sei la hatete tan haʼu tenke lee Bíblia. Agora haʼu hatete: ‘Haʼu hakarak lee Bíblia liután.’” Prizioneiru ida hakerek: “Haʼu simu Bíblia Tradusaun Mundu Foun, no neʼe troka haʼu-nia moris. Haʼu nunka bele komprende Maromak nia Liafuan, maibé husi tempu neʼebé haʼu lee Bíblia neʼe, haʼu bele komprende ho didiʼak. Haʼu hakarak aprende liután kona-ba Testemuña ba Jeová no oinsá haʼu bele sai Testemuña.”

 Ema sira neʼebé lee Bíblia Tradusaun Mundu Foun hafolin tebes kontribuisaun neʼebé ema fó atu apoia serbisu tradusaun neʼe. Ema fó kontribuisaun ba serbisu iha mundu tomak liuhusi dalan oioin neʼebé temi iha website donate.pr418.com. Obrigadu barak ba imi-nia laran-diʼak.