Iha fulan-Jullu no fulan-Agostu 2020, neʼe mak primeiravez ba Testemuña ba Jeová iha mundu tomak atu nonton programa ba Reuniaun Boot ba loron tolu iha tempu hanesan. Ida-neʼe bele akontese tanba programa ba Reuniaun Boot tradús ba língua 500 liu. Baibain presiza tinan ida ka liu atu halo planu no kumpre projetu hanesan neʼe. Maibé tanba pandemia COVID-19, ema neʼebé tradús programa ba Reuniaun Boot “Haksolok Nafatin Bá”! iha deʼit fulan haat atu kumpre serbisu neʼe.

 Departamentu Tradusaun no Departamentu Kompras iha Testemuña ba Jeová nia sede-jerál ajuda atu halo projetu neʼe. Departamentu Tradusaun esplika katak ekipa tradusaun barak presiza tan ekipamentu atu bele kumpre serbisu neʼe, inklui mikrofone ho kualidade diʼak. Departamentu Kompras arranja atu sosa mikrofone hamutuk 1.000 no haruka ba fatin maizumenus 200.

 Atu bele poupa osan, organizasaun sosa mikrofone barak dala ida, no haruka ba fatin ida deʼit. Tuirmai haloot fali no haruka ba fatin oioin iha mundu. Sosa mikrofone barak dala ida deʼit mak porsentu 20 baratu liu fali se kompara ho sosa husi loja. Mikrofone ida nia folin maizumenus dolar 170, neʼe inklui ho gastu atu haruka ba fatin ida-idak.

 Departamentu Kompras tenke sosa ekipamentu sira-neʼe no arranja atu haruka ba fatin sira durante fulan-Abríl no fulan-Maiu. Durante fulan sira-neʼe negósiu barak la laʼo hanesan baibain tanba pandemia COVID-19. Maski nuneʼe, toʼo iha fulan-Maiu nia rohan, maioria eskritóriu tradusaun, sukursál no fatin seluk neʼebé halo tradusaun iha ona ekipamentu neʼebé sira presiza.

 Irmaun neʼebé tau matan ba Departamentu Kompras naran Jay Swinney hatete: “Durante projetu neʼe, departamentu sira iha Betel no kompañia sira neʼebé faʼan ekipamentu, serbisu hamutuk ho didiʼak. Ho Jeová nia espíritu deʼit mak ema hotu bele serbisu hamutuk ho lalais hanesan neʼe no sosa buat neʼebé presiza hodi la gasta osan barak.”

 Irmaun Nicholas Ahladis neʼebé serbisu iha Departamentu Tradusaun hatete: “Durante tempu neʼe, tradutór barak labele sai husi uma no sira hetan anima bainhira simu ekipamentu neʼe. Maski sira labele hamutuk ho irmaun-irmán seluk iha sira-nia ekipa tradusaun, maibé sira bele nafatin serbisu hamutuk ho diʼak hodi tradús no grava diskursu sira, vídeo drama, no knananuk iha língua 500 liu.”

 Projetu neʼe mak projetu ida husi projetu barak neʼebé irmaun-irmán sira halo atu prepara Reuniaun Boot tinan 2020 “Haksolok nafatin bá”! ba irmaun-irmán sira iha mundu tomak. Kontribuisaun neʼebé imi fó ho laran-luak liuhusi donate.pr418.com no dalan seluk ajuda atu hola ekipamentu neʼebé ita presiza atu halo projetu sira-neʼe.