Ba tinan 130 liu, Testemuña ba Jeová halibur hamutuk iha reuniaun boot kada tinan. Programa neʼe inklui diskursu 40 liu ho múzika, entrevista no vídeo sira. Ema presiza “rona no haree” ho klaru programa sira-neʼe atu bele hetan benefísiu no kona sira-nia laran. (Lucas 2:20) Oinsá mak organizasaun uza Ita-nia kontribuisaun hodi nuneʼe ema hotu neʼebé hela iha fatin oioin bele hetan benefísiu husi reuniaun boot?

 Estádiu modernu barak no arena iha rai sira neʼebé riku iha ona ekipamentu áudio/vídeo. Entaun tanbasá ita nafatin uza ita-nia ekipamentu rasik bainhira aluga fatin ba reuniaun boot? David neʼebé serbisu ho Departamentu Broadcasting iha Sede-jerál, esplika: “Baibain programa laʼo ba oras neen liu ba loron ida-idak. No ema neʼebé asiste sei rona diskursu oioin no haree vídeo sira neʼebé naruk. Ita hakarak rona-naʼin sira bele rona no komprende diskursu hotu no haree vídeo ida-idak ho klaru. Maibé dala barak, fatin neʼebé ita aluga la iha ekipamentu áudio/vídeo neʼebé diʼak tuir ita-nia presiza. Porezemplu, iha arena desportu nian, sira-nia ekipamentu baibain uza deʼit atu hatoʼo avizu badak ka toka múzika badak ida, no screen ba vídeo mak atu hatudu deʼit skor, iklan, no replay.”

 Fatin ida-idak ba reuniaun boot la hanesan, tan neʼe sistema áudio/vídeo tenke tuir fatin ida-idak. Bainhira hili ona fatin ida, Departamentu Broadcasting iha ita-nia sukursál sei deside iha neʼebé mak ema sei tuur bazeia ba fatin neʼe nia luan no ema naʼin-hira mak sei asiste. Tuirmai irmaun sira deside fatin ba oradór no screen sira no oinsá atu liga ekipamentu sira. Irmaun sira mós halo lista kona-ba ekipamentu hotu neʼebé presiza atu nuneʼe ema hotu bele haree no rona ba programa.

 Iha reuniaun boot balu, sistema áudio/vídeo sai komplikadu liután tanba fó sai programa ba língua balu. Se tradús programa ba língua seluk, tradutór presiza haree no rona programa neʼe, tuirmai sira-nia tradusaun sei tranzmite ba kanál rádiu ketak ida ba sira neʼebé komprende língua neʼe. Tanba iha media player oioin neʼebé espesiál, vídeo bele fó sai iha tempu hanesan ba rona-naʼin hotu, maski áudio fó sai iha língua ualu neʼebé la hanesan. Irmaun David hatete: “Sistema sira-neʼe mak komplikadu tebetebes no irmaun sira neʼebé halaʼo knaar neʼe presiza hetan treinamentu barak.”

 Sukursál barak iha ekipamentu áudio/vídeo neʼebé sempre uza kada tinan. Sukursál sira-neʼe sei arranja atu lori ekipamentu ida-idak ba fatin seluk neʼebé sei halaʼo reuniaun boot, no neʼe presiza osan barak. Porezemplu, sukursál Estadus Unidus Amérika gasta maizumenus $200.000 a kada tinan atu haruka deʼit ekipamentu áudio/vídeo. Maski nuneʼe, ita bele poupa osan tanba la presiza sosa no tau matan ekipamentu seluk tan. Irmaun Steven neʼebé tau matan ba Departamentu Áudio/vídeo iha reuniaun boot iha Kanadá, hatete: “Ami-nia ekipa hakaʼas an atu la iha buat ruma iha ekipamentu áudio/vídeo mak aat ka lakon, inklui porka, parafuzu, fiu no komponente seluk. Ami mós cek katak ekipamentu hotu haruka ho didiʼak hodi bele uza ba reuniaun boot tuirmai.”

 Osan ba aluga ekipamentu áudio/vídeo mak karun tebes, no ekipamentu neʼebé ema fó aluga dala barak kualidade ladún diʼak no ema ladún tau matan ho didiʼak. Entaun, baibain ita sosa ekipamentu neʼebé ita presiza. Agora daudaun, presu ba screen boot ida ho metru 5x3 mak maizumenus $24.000 no presu ba fiu mikrofone ida neʼebé naruk metru 15 mak maizumenus $20. Entaun antes sosa ekipamentu ruma, Departamentu Broadcasting hamutuk ho Departamentu Kompras ‘sura osan’ uluk. (Lucas 14:28) Porezemplu, ema naʼin-hira mak sei hetan benefísiu husi ekipamentu neʼe? Sosa ekipamentu foun mak desizaun neʼebé diʼak ka lae? Ita iha fatin atu rai sasán sira-neʼe, no iha ema atu halo manutensaun ba ekipamentu sira-neʼe ka lae?

 Irmaun sira hadiʼa no halo manutensaun beibeik ba ekipamentu sira atu la sai aat lalais no bele poupa osan. Bainhira atu haruka ekipamentu áudio/vídeo, irmaun sira hatama sasán sira-neʼe iha kaixa neʼebé mahar no forte atu nuneʼe la hetan estragu. No irmaun sira mós tau matan didiʼak kaixa sira-neʼe.

 Iha komentáriu pozitivu barak husi ema neʼebé laʼós Testemuña. Porezemplu, iha reuniaun boot ida, mane neʼebé serbisu ba kompañia boot ida kona-ba tranzmisaun, admira ho kualidade husi ita-nia informasaun no áudio/vídeo. Irmaun Jonathan neʼebé ajuda iha parte áudio/vídeo, hatete: “Mane neʼe admira tebes bainhira hatene katak ema hotu iha ami-nia ekipa mak voluntáriu deʼit. Nia hatete katak ninia kompañia presiza loron lima atu installa ekipamentu sira neʼebé ami-nia ekipa halo ba loron ida ho balu deʼit.” Iha reuniaun boot seluk, manajer ida ba fatin neʼebé ita aluga hatete: “Iha ema profisionál barak kona-ba múzika no vídeo neʼebé aluga fatin neʼe, maibé ba haʼu, imi-nia dalan halaʼo serbisu mak profisionál liu!”

 Benefísiu saida mak Ita hetan tanba iha sistema áudio/vídeo neʼebé diʼak iha reuniaun boot? Karik Ita sente hanesan irmaun David neʼebé hela iha Inglaterra. Nia hatete: “Haʼu tinan 88 no tuir ona reuniaun boot iha haʼu-nia moris tomak. Maibé, ikus-ikus neʼe haʼu sente fasil liu atu tau fokus durante programa. Tanba vídeo sira mak kapás loos, ita sente tempu liu lalais deʼit no bele komprende lisaun sira ho klaru.” Irmaun Micheal neʼebé hela iha Nijéria hatete: “Tanba irmaun-irmán sira bele rona didiʼak ba oradór no haree vídeo ho klaru, sira bele tau fokus no la sai baruk durante programa.”

 Bainhira Ita asiste reuniaun boot no reuniaun boot espesiál tinan neʼe nian ho tema “Fó sai liafuan diʼak!”, hanoin kona-ba irmaun-irmán sira neʼebé serbisu makaʼas atu Ita bele rona no haree programa neʼe. Buat sira-neʼe hotu bele kumpre tanba irmaun-irmán sira-nia kontribuisaun, inklui kontribuisaun neʼebé fó liuhusi donate.pr418.com. Obrigadu barak ba Ita-nia laran-luak!