Tinan-tinan, ema rihun ba rihun mak hetan batizmu, tan neʼe ita mós presiza liután fatin sira atu halaʼo adorasaun ba Jeová. Tanba razaun neʼe mak Departamentu Planeamentu no Konstrusaun Lokál iha mundu tomak halo planu atu harii ka halo renovasaun ba ita-nia fatin adorasaun nian hamutuk 2.700 liu durante tinan serbisu nian 2020. a

 Maibé planu sira-neʼe la laʼo tanba pandemia COVID-19. Atu bele proteje irmaun-irmán sira no halo tuir matadalan husi governu, Komisaun Editora nian husi Grupu Administradór deside atu hapara projetu konstrusaun barak iha mundu tomak. Maski nuneʼe, durante tinan serbisu nian 2020, organizasaun harii ka halo renovasaun ba fatin adorasaun nian hamutuk 1.700 liu antes pandemia neʼe mosu. Laʼós neʼe deʼit, iha mós projetu boot hamutuk 100 ba sukursál sira neʼebé kompletu ona. Mai haree toʼok oinsá projetu konstrusaun rua neʼebé kompletu ona lori benefísiu ba ita-nia irmaun-irmán sira.

 Sukursál iha rai-Kamaroins. Sukursál tuan iha Douala mak kloot tebes, tan neʼe presiza halo renovasaun boot. Komisaun Editora nian hanoin atu halo renovasaun, maibé gastu atu halo renovasaun mak karun liu fali duké fatin neʼe nia folin. Sira mós buka-hatene kona-ba posibilidade atu harii fatin foun ka sosa fatin ruma no halo renovasaun ba fatin neʼe. Maibé tanba sira-nia situasaun neʼebé la permite, sira la konsege halo buat sira-neʼe.

 Maibé irmaun sira deskobre katak iha Douala nia parte norte, autoridade lokál planu atu halo estrada foun ba ita-nia fatin ba reuniaun boot. Estrada neʼe sei halo fasil ba ema atu asesu fatin neʼe no mós loke dalan atu bele iha eletrisidade, bee, no buat seluk tan. Neʼe mak buat neʼebé sukursál presiza. Entaun, Grupu Administradór aprova projetu atu harii sukursál foun iha rai neʼebé besik fatin ba reuniaun boot.

 Testemuña serbisu hamutuk ho serbisu-naʼin husi kompañia konstrusaun nian atu halo planeamentu hodi nuneʼe bele uza didiʼak osan no mós tempu. Tuir loloos, projetu neʼe kompletu duni no gasta osan ladún barak hanesan buat neʼebé uluk sira hanoin. Sira bele poupa osan hamutuk dolar millaun rua liu. Família Betel konsege muda ba sukursál foun antes pandemia COVID-19 mosu.

 Ema Betel sira iha rai-Kamaroins hetan benefísiu husi hela-fatin no serbisu-fatin neʼebé diʼak liu, no sira mós bele haree ida-neʼe nuʼudar prezente husi Jeová. Feen-laʼen ida hatete: “Neʼe book ami atu serbisu ho badinas liután no hakaʼas an liután atu hatudu katak ami hafolin prezente neʼe.”

 Eskritóriu tradusaun (RTO) lian Tojolabal iha rai-Méxiku. Ba tinan barak, tradutór sira ba lian Tojolabal serbisu iha sukursál Amérika Sentrál, besik Sidade Méxiku. Maibé ema neʼebé koʼalia lian Tojolabal barak liu mak iha munisípiu Altamirano no Las Margaritas. Neʼe dook maizumenus kilómetru 1.000! Rezultadu mak tradutór sira ladún hatene ho loloos mudansa sira ho lian Tojolabal. No sukursál mós susar atu hetan irmaun no irmán neʼebé hela besik no kumpre kritériu atu ajuda ho tradusaun no gravasaun ba lian Tojolabal.

 Tanba razaun sira-neʼe mak Komisaun Hakerek nian husi Grupu Administradór hakarak atu muda ekipa neʼebé halo tradusaun ba lian Tojolabal ba área neʼebé uza lian neʼe. Atu bele halo nuneʼe, sukursál deside atu sosa uma ida no halo renovasaun. Neʼe baratu liu duké harii eskritóriu foun ka aluga eskritóriu.

 Tradutór ida esplika oinsá nia bele hetan benefísiu husi ida-neʼe, nia dehan: “Durante tinan sanulu, haʼu serbí nuʼudar tradutór iha sukursál, no haʼu seidauk hasoru família ida neʼebé hela besik no koʼalia haʼu-nia língua. Agora ami-nia eskritóriu mak iha área neʼebé ema maioria koʼalia lian Tojolabal. Loron-loron, haʼu hasoru no koʼalia ho ema neʼebé koʼalia lian Tojolabal. Neʼe ajuda haʼu atu aprende liafuan foun barak no mós kualidade husi ami-nia tradusaun sai diʼak liu.”

 Ba tinan serbisu nian 2021, se situasaun permite, iha planu konstrusaun ba eskritóriu tradusaun nian no fatin ba eskola Bíblia sira hamutuk 75. Iha mós projetu boot ualu, inklui harii eskritóriu foun ba sede-jerál iha Ramapo, Novaiorke, no mós atu muda fatin ba sukursál Arjentina no Itália. Laʼós neʼe deʼit, presiza mós Reuniaun-Fatin foun hamutuk 1.000 liu, iha mós fatin adorasaun nian hamutuk 6.000 neʼebé la diʼak ona no presiza troka no Reuniaun-Fatin seluk hamutuk 4.000 neʼebé presiza halo renovasaun.

 Ita-nia organizasaun hetan osan husi neʼebé atu halo projetu sira-neʼe? Irmaun Lázaro González, membru husi Komisaun ba Sukursál Amérika Sentrál hatán ba pergunta neʼe bainhira nia esplika kona-ba projetu atu harii eskritóriu tradusaun nian ba lian Tojolabal. Nia hatete: “Iha ami-nia sukursál nia área, ami-nia osan mak limitadu. Tan neʼe, se ami la hetan apoia husi irmaun-irmán sira iha mundu tomak, ami labele harii eskritóriu tradusaun nian ba língua lokál oioin neʼebé irmaun-irmán sira koʼalia. Kontribuisaun husi irmaun-irmán hotu iha mundu tomak mak ajuda tradutór sira sai besik liu ba komunidade lokál neʼebé koʼalia língua sira-neʼe. Ami hakarak hatoʼo obrigadu ba irmaun-irmán sira iha mundu tomak tanba sira-nia laran-diʼak.” Sin, konstrusaun neʼe bele susesu tanba ita-nia kontribuisaun ba serbisu iha mundu tomak, ema barak fó kontribuisaun liuhusi website donate.pr418.com.