Reuniaun boot tinan 2020 mak úniku, tanba programa ba reuniaun boot neʼe mak gravasaun neʼebé ema iha mundu tomak bele download liuhusi internét. Maibé ita-nia irmaun-irmán sira iha rai-Malavi no Mosambike asesu programa reuniaun boot laʼós liuhusi internét. Tanbasá?

 Koordenadór no Komisaun Hanorin nian hetan lisensa husi Grupu Administradór atu fó sai programa reuniaun boot liuhusi televizaun no rádiu iha rai-Malavi no Mosambike. Tanbasá sira halo arranju neʼe? Rai-Malavi inklui nasaun ida iha mundu neʼebé internét karun tebes, tan neʼe Testemuña uitoan deʼit mak bele asesu internét. Irmaun William Chumbi, membru ba Komisaun ba Sukursál iha rai-Malavi esplika: “Dalan ida deʼit atu bele fahe hahán espirituál ba irmaun-irmán sira mak liuhusi rádiu no televizaun.” Irmaun Luka Sibeko neʼebé mós membru ba Komisaun ba Sukursál iha rai-Malavi hatete: “Se programa reuniaun boot la fó sai liuhusi televizaun no rádiu, só irmaun-irmán uitoan deʼit iha sukursál nia territóriu mak bele hetan benefísiu husi programa neʼe.” Iha rai-Mosambike mós, só irmaun-irmán uitoan deʼit mak iha osan atu bele sosa telemovel ka ekipamentu eletróniku, sá tan atu sosa internét.

 Tanba pandemia COVID-19, estasaun rádiu no televizaun balu fó sai ona programa reuniaun sira. a Ita-nia irmaun sira kontaktu estasaun sira-neʼe hodi husu atu fó sai mós programa reuniaun boot.

 Iha rai-Malavi, ita-nia irmaun-irmán sira hasoru situasaun susar ida. Baibain, estasaun sira deside katak programa neʼebé kliente ida atu fó sai mak ba oras ida deʼit. Estasaun sira-neʼe hanoin barak katak se fó sai programa neʼebé naruk bele halo ema sai baruk atu haree. Maibé irmaun sira esplika katak ita-nia serbisu bele ajuda komunidade. Maski durante tempu estadu emerjénsia, ita nafatin fó kmaan ba ema liuhusi fahe liafuan diʼak husi Bíblia neʼebé bele ajuda ema atu sai sidadaun neʼebé diʼak no mós iha família neʼebé kontente. Bainhira rona esplikasaun neʼe, estasaun sira aprova atu hanaruk oras atu fó sai programa.

 Iha rai-Malavi, programa reuniaun boot fó sai liuhusi estasaun rádiu ida no estasaun televizaun ida. Área hotu iha rai-Malavi bele asesu estasaun rua neʼe no ema millaun ba millaun bele asesu programa neʼe. Iha rai-Mosambike, programa reuniaun boot fó sai liuhusi estasaun televizaun ida no estasaun rádiu hamutuk 85.

 Ita-nia organizasaun gasta osan hamutuk dolar 28.227 b atu bele fó sai programa reuniaun boot liuhusi televizaun no osan maizumenus dolar 20.000 atu bele fó sai ida-neʼe liuhusi rádiu. Presu atu fó sai programa liuhusi estasaun rádiu sira la hanesan, presu ba estasaun rádiu kiʼik hahú husi dolar 15 toʼo dolar 2.777 ba estasaun rádiu nasionál.

 Ita-nia organizasaun hakaʼas an atu uza didiʼak osan kontribuisaun sira. Porezemplu, iha rai-Malavi, irmaun sira husu atu estasaun sira bele fó diskontu, inklui diskontu porsentu 30. Diskontu neʼe ajuda organizasaun poupa osan dolar 1.711. Iha rai-Mosambike, estasaun balu prontu atu hatún presu tanba Testemuña sira sempre laran-moos no selu tuir tempu.

 Ita-nia irmaun-irmán sira sente agradese tebes tanba bele rona ka haree programa reuniaun boot liuhusi estasaun rádiu ka televizaun lokál. Irmaun Patrick neʼebé serbí nuʼudar katuas kongregasaun iha rai-Malavi hatete: “Ami hatoʼo obrigadu ba Grupu Administradór ba buat hotu neʼebé sira halo ona mai ami durante tempu pandemia neʼe.” Irmaun Isaac husi rai-Malavi mós hatete: “Ami la iha ekipamentu eletróniku seluk, tan neʼe ami agradese tebes ba organizasaun nia arranju espesiál atu ami bele rona programa reuniaun boot liuhusi rádiu. Arranju neʼe ajuda haʼu-nia família tomak atu bele hetan benefísiu husi reuniaun boot. Ami bele haree ho klaru katak Jeová hadomi duni ninia povu.”

 Haklaken-naʼin ida iha rai-Mosambike tuir reuniaun boot tinan 2020. No neʼe mak reuniaun boot primeiru neʼebé nia asiste. Nia hatete: “Arranju atu nonton programa reuniaun boot iha televizaun fó-hanoin haʼu katak Jeová mak Maromak Kbiit Boot Liu Hotu. Pandemia labele hanetik Jeová atu fó buat neʼebé ita presiza atu nafatin iha fiar metin no ita bele hetan ida-neʼe iha ita ida-idak nia uma. Haʼu bele haree domin iha Jeová nia povu nia leet. Haʼu fiar katak neʼe mak relijiaun neʼebé loos.”

 Katuas kongregasaun ida naran Wyson hatete: “Haʼu hakarak hatoʼo agradese ba dalan neʼebé atan laran-metin no matenek tau matan ba ita durante tempu pandemia neʼe. Arranju atu rona no nonton programa reuniaun boot liuhusi rádiu no televizaun ajuda ona ita barak neʼebé iha osan uitoan deʼit no hela iha área kiak atu bele tuir reuniaun boot no mós hetan benefísiu husi ida-neʼe.”

 Ba reuniaun boot tinan 2021, Koordenadór no Komisaun Hanorin nian halo arranju dala ida tan atu fó sai programa reuniaun boot liuhusi televizaun no rádiu iha komunidade balu. Oinsá ita-nia organizasaun bele taka gastu sira atu fó sai programa reuniaun boot liuhusi televizaun no rádiu? Hodi uza kontribuisaun sira neʼebé ita barak fó liuhusi dalan oioin neʼebé temi iha donate.pr418.com. Obrigadu barak ba imi-nia laran-luak.