Beth dehan: “Haʼu iha moras anemia bainhira haʼu sei joven. Haʼu la iha forsa, sai kole lalais, ruin sira moras, no susar ba haʼu atu fokus. Haʼu-nia doutór fó ai-moruk neʼebé iha ferru ka zat besi. Haʼu hemu ai-moruk neʼe, no mós troka haʼu-nia dieta. Lakleur, haʼu komesa sente diʼak liu.”

 Ema barak mós iha problema saúde hanesan ho Beth. Tuir Organizasaun Mundiál Saúde (OMS), ema biliaun rua ka maizumenus porsentu 30 husi populasaun mundu tomak iha moras anemia. Iha rai neʼebé kiak, maizumenus porsentu 50 husi feto neʼebé isin-rua no porsentu 40 husi labarik kiʼik iha moras anemia.

 Moras anemia bele lori rezultadu aat oioin. Se moras anemia mak todan, neʼe bele lori problema ba fuan. Organizasaun Mundiál Saúde hatete, iha rai balu, “porsentu 20 husi feto isin-rua hotu neʼebé mate” mak tanba moras anemia. Se feto isin-rua ida mak iha moras anemia defisiénsia ferru, ninia bebé bele moris mai sedu liu no isin nia todan la normál. Labarik neʼebé iha moras anemia, neineik atu sai boot no fasil atu hetan infesaun. Maibé, baibain ita bele prevene ka kura anemia defisiénsia ferru. a

Saida mak anemia?

 Anemia mak moras ida. Baibain, ema neʼebé moras anemia, la iha glóbulu mean neʼebé natoon. Problema neʼe bele akontese tanba razaun oioin. Tuir loloos, sientista sira identifika ona moras anemia ho tipu 400 liu! Ema bele kona moras neʼe ba períodu badak ka naruk, iha mós anemia neʼebé todan ka kmaan.

Saida mak kauza moras anemia?

 Baibain, anemia mosu tanba razaun tolu:

•   Lakon raan tan neʼe glóbulu mean sai menus iha isin.

•   Isin la prodús glóbulu mean neʼebé natoon no diʼak.

•   Isin estraga glóbulu mean.

 Anemia defisiénsia ferru mak tipu anemia neʼebé kona ema barak iha mundu. Neʼe akontese tanba isin la iha ferru neʼebé natoon, tan neʼe isin labele prodús emoglobina neʼebé natoon. Emoglobina mak parte husi glóbulu mean neʼebé ajuda atu lori oksijéniu.

Saida mak sintoma ba anemia defisiénsia ferru?

 Foufoun, karik ema neʼebé kona moras anemia la rekoñese katak nia kona moras neʼe. Maski anemia iha sintoma oioin, sintoma ba anemia defisiénsia ferru inklui:

•   Kole tebes

•   Liman ka ain malirin

•   Isin fraku

•   Isin kamutis

•   Ulun moras no oin-halai

•   Hirus-matan moras, fuan tuku-tuku makaʼas, susar dada iis

•   Liman-kukun no ain-kukun fraku

•   Lakohi han, liuliu bebé no labarik

•   Hakarak tebes han jelu-fatuk, trigu, ka rai

Sé mak fasil liu atu kona anemia?

 Feto mak fasil liu atu hetan anemia defisiénsia ferru tanba sira lakon raan durante menstruasaun. Feto neʼebé isin-rua mós bele hetan moras neʼe se sira-nia hahán falta vitamina B, hanesan folatu ka ásidu fóliku.

 Bebé neʼebé moris mai sedu liu ka isin nia todan la normál no la hetan ferru neʼebé toʼo husi inan nia susubeen ka susubeen fórmula.

 Labarik neʼebé la han ai-han neʼebé saudavel.

 Vejetarianu neʼebé ladún han ai-han neʼebé iha ferru.

 Ema neʼebé moras króniku, hanesan ema neʼebé kona moras neʼebé liga ho raan, kankru, rins la halaʼo ninia funsaun, kanek no raan suli iha estómagu, ka infesaun ruma.

Tratamentu ba anemia

 Laʼós anemia hotu mak ita bele prevene ka kura. Maibé ema neʼebé iha anemia tanba kuran ferru ka vitamina, baibain bele prevene ka kura moras neʼe hodi han ai-han saudavel neʼebé iha:

 Ferru. Bele hetan husi naʼan, koto no fore oioin, lentilla, no modo-tahan neʼebé kór-matak tuan. b Peskiza hatudu katak se teʼin ho sanan besi, neʼe mós bele aumenta ferru iha ai-han.

 Folatu. Bele hetan husi ai-fuan, modo-tahan kór-matak tuan, ervilla, koto mean, keiju, manu-tolun, ikan, améndua, no fore-rai. No bele hetan mós husi produtu trigu neʼebé aumenta ho vitamina hanesan paun, sereál, makaraun no etu. Vitamina sintétiku ba folatu mak ásidu fóliku.

 Vitamina B-12. Bele hetan husi naʼan, produtu sira husi susubeen, sereál neʼebé aumenta ho vitamina oioin, no produtu husi fore-keli.

 Vitamina C. Bele hetan husi derok no sabraka oioin, ai-manas boot, brókoli, tomate, melon, no morangu. Ai-han neʼebé iha vitamina C ajuda ita-nia isin atu xupa ferru.

 Rai ida-idak iha ai-han neʼebé la hanesan. Entaun diʼak atu buka-hatene ai-han iha Ita-nia área neʼebé iha nutrisaun importante. Neʼe importante ba feto, liuliu se nia isin-rua ka planu atu iha oan. Hodi tau matan ba Ita-nia saúde, Ita hamenus risku ba Ita-nia bebé atu la hetan anemia. c