Mundu nakonu ho problema polítiku no halo ema la unidade. Tuir peskiza husi Pew Research Center neʼebé halaʼo iha nasaun 19, iha tinan 2022 “porsentu 65 husi ema ho idade maiór hatete katak sira-nia nasaun iha problema tanba ema neʼebé apoia partidu polítiku iha hanoin la hanesan”.

 Ita nota ema iha Ita-nia área haketak malu liután tanba problema polítiku? Tanbasá? Iha solusaun ka lae? Haree toʼok saida mak Bíblia dehan.

 Bíblia fó sai nanis katak iha ita-nia tempu, neʼebé temi nuʼudar “loron ikus sira”, ema barak sei hatudu atitude neʼebé haketak ema.

•   “Iha loron ikus sira sei iha problema barak neʼebé susar atu tahan. Tanba ema sei hadomi deʼit sira-nia an, . . . la rona malu.”—2 Timóteo 3:1-3.

 Maski ema barak hakaʼas an atu lori susesu ba sira-nia governu, maibé sira labele kumpre ida-neʼe. Sira neʼebé iha hanoin la hanesan sente susar, ka labele duni atu serbisu hamutuk hodi bele rezolve problema. Neʼe tuir duni buat neʼebé Bíblia fó sai nanis husi tempu uluk kedas.

•   “Ema mak domina ema seluk, no neʼe lori deʼit susar.”—Eclesiastes 8:9.

 Maski nuneʼe Bíblia mós temi kona-ba solusaun, neʼe mak governu ida ho ulun-naʼin neʼebé iha kbiit atu halakon problema hotu neʼebé lori susar ba ema.

 Bíblia fó sai kona-ba ulun-naʼin ida neʼebé iha abilidade atu rezolve problema, neʼe mak Jesus Kristu. Nia iha kbiit, autoridade, no hakarak atu lori unidade no dame ba ema hotu.

•   “Iha ninia tempu, ema laran-loos sei buras, no dame sei sai barak.”—Salmo 72:7.

•   “Nasaun hotu sei serbí nia.”—Salmo 72:11.

 Jesus mak ulun-naʼin neʼebé diʼak tanba nia hanoin ema no hakarak ajuda sira, liuliu ema neʼebé hasoru situasaun la justisa.

•   “Nia sei salva ema kiak neʼebé halerik atu husu ajuda, no nia sei salva ema kiʼik no mós sira hotu neʼebé la iha ema atu ajuda sira. Nia sei hanoin ema kiʼik no ema kiak, no nia sei salva ema kiak nia moris. Nia sei salva sira husi ema neʼebé hanehan sira no husi violénsia.”—Salmo 72:12-14.

 Aprende liután kona-ba Maromak nia Ukun, ka governu ida iha lalehan neʼebé Jesus mak dirije. Buka-hatene oinsá mak Ita bele apoia ukun neʼe no hetan benefísiu.

•   Haree vídeo Saida mak Maromak nia Ukun?

•   Lee informasaun “Maromak nia Ukun—Governu ida neʼebé la iha korrupsaun”.