Iha mundu tomak, ema barak tahan hasoru inundasaun neʼebé estraga buat barak. Haree notísias sira tuirmai neʼe:

•   “Iha loron balu nia laran, udan tun makaʼas iha Xina nia sidade kapitál, no neʼe mak udan barak liu durante tinan 140 nia laran. Husi loron-sábadu toʼo kuarta, udan tun toʼo sentímetru 74,5.”—AP News, 2 Agostu 2023.

•   “Loron-kinta mak loron segundu neʼebé anin-fuik Khanun kona rai-Japaun nia parte súl, no neʼe halo udan tun makaʼas no anin boot. Rezultadu mak pelumenus ema naʼin-rua mate. . . . Anin-fuik neʼe karik sei halo udan tun toʼo sentímetru 60 iha área foho iha Taiwán sentrál.”—Deutsche Welle, 3 Agostu 2023.

•   “Iha findesemana, inundasaun akontese iha Nova Eskósia tanba udan tun makaʼas tebes iha área Kanadá Atlántiku, neʼe mak udan tun makaʼas liu durante tinan 50 nia laran iha área neʼe.”—BBC News, 24 Jullu 2023.

 Saida mak Bíblia dehan kona-ba akontesimentu sira-neʼe?

 Bíblia fó sai katak ita moris iha tempu neʼebé bolu nuʼudar “loron ikus sira”. (2 Timóteo 3:1) Jesus fó sai nanis katak durante ita-nia tempu, ema sei haree “buat neʼebé halo sira taʼuk”, ka akontesimentu sira neʼebé halo ema taʼuk. (Lucas 21:11) Mudansa iha klima mak razaun boot ida neʼebé halo dezastre naturais akontese derrepente deʼit, beibeik no makaʼas liu.

 Bíblia fó-hatene ita katak buat sira neʼebé akontese ohin loron iha mundu tomak bele sai razaun ba ita atu iha esperansa. Tanbasá? Jesus dehan: “Bainhira imi haree buat sira-neʼe akontese, imi hatene bá katak Maromak nia Ukun besik ona.”—Lucas 21:31; Mateus 24:3.

 Akontesimentu sira neʼebé ita haree hatudu katak lakleur tan Maromak nia Ukun sei kontrola forsa natureza, inklui siklu bee nian.—Job 36:27, 28; Salmo 107:29.

 Atu aprende liután kona-ba oinsá Maromak nia Ukun sei hadiʼa mundu nia ambiente, haree informasaun “Sé mak sei salva planeta mundu?”