Agora daudaun, ema iha mundu tomak tahan hasoru klima neʼebé manas liu fali uluk no dezastre neʼebé mosu tanba klima neʼebé manas liu. Haree notísias sira tuirmai:

•   “Komesa husi tempu neʼebé ema sukat temperatura ho loloos toʼo ohin loron, fulan-Juñu tinan neʼe mak manas liu hotu durante tinan 174 nia laran.”—National Oceanic and Atmospheric Administration, U.S. Department of Commerce, 13 Jullu 2023.

•   “Itália, España, Fransa, Alemaña no Polónia hasoru anin manas neʼebé makaʼas, no temperatura iha illa Sisília no Sardeña karik sei saʼe toʼo 48°C [118°F], karik neʼe mak temperatura neʼebé manas liu hotu iha Europa nia istória.”—European Space Agency, 13 Jullu 2023.

•   “Nuʼudar mundu sai manas liu, udan boot sei akontese beibeik no sai makaʼas liután, no neʼe sei hamosu inundasaun neʼebé boot liután.”—Stefan Uhlenbrook, diretór ida iha World Meteorological Organization, 17 Jullu 2023.

 Notísias sira kona-ba klima neʼebé aat tebes halo Ita hanoin barak ka lae? Hanoin toʼok saida mak Bíblia dehan kona-ba tópiku importante neʼe.

 Sin. Anin manas iha mundu tomak no klima neʼebé aat tebes liga ho akontesimentu neʼebé Bíblia fó sai nanis kona-ba ita-nia tempu. Porezemplu, Jesus fó sai nanis katak ema sei haree “buat neʼebé halo sira taʼuk”. (Lucas 21:11) Mundu nia temperatura neʼebé saʼe ba beibeik halo ema barak taʼuk katak planeta mundu sei sai fatin neʼebé ema labele hela tan.

 Lae. Maromak kria planeta mundu nuʼudar fatin neʼebé ema sei hela ba nafatin, no nia sei la husik ema atu estraga mundu. (Salmo 115:16; Eclesiastes 1:4) Tuir loloos, Maromak promete nanis ona atu “halakon sira neʼebé estraga daudaun mundu”.—Apokalipse 11:18.

 Bíblia hatudu katak Maromak bele no sei proteje duni planeta mundu husi dezastre naturais.

•   “[Maromak] halo anin-fuik hakmatek; tasi nia laloran sira mós sai kalma.” (Salmo 107:29) Maromak iha kbiit atu kontrola forsa natureza. Maromak iha kapasidade atu hadiʼa problema ambiente oioin neʼebé hamosu daudaun klima neʼebé aat tebes no halo ema terus.

•   “Ita tau matan ba rai, halo rai fó rezultadu barak no riku tebes.” (Salmo 65:9) Maromak sei haraik bensaun ba mundu no mundu sei sai paraízu neʼebé furak.

 Atu aprende liután Bíblia nia promesa kona-ba planeta mundu nia ambiente sei sai diʼak, haree informasaun “Sé mak sei salva planeta mundu?”