Problema boot ida neʼebé akontese iha mundu tomak mak korrupsaun husi ema neʼebé serbisu iha governu. a Porezemplu, durante pandemia COVID-19, funsionáriu barak iha nasaun oioin hetan akuzasaun katak sira sai riku ho osan neʼebé loloos planu atu ajuda ema neʼebé hetan susar husi pandemia. Rezultadu mak povu barak hasoru susar no mate.

 Korrupsaun sira-neʼe fó influénsia ba nasaun barak. David Cameron neʼebé uluk primeiru ministru iha rai-Bretaña dehan: “Korrupsaun mak hanesan labadain nia knuuk neʼebé belit metin ba nasaun hotu.”

 Maski nuneʼe, ita bele fiar metin katak lakleur tan governu nia korrupsaun hotu sei lakon ba nafatin. Tanbasá? Haree toʼok saida mak Bíblia hatete kona-ba buat neʼebé Maromak sei halo.

 Bíblia hatoʼo Maromak nia liafuan neʼebé dehan: “Haʼu, Jeová, hadomi justisa; Haʼu odi naʼok no hahalok la loos.” b (Isaias 61:8) Maromak hatene kuandu ema ida hetan susar husi korrupsaun. (Provérbios 14:31) Nia promete: “Haʼu sei hamriik tanba ema hanehan sira neʼebé iha terus laran.”—Salmo 12:5.

 Saida mak Maromak sei halo? Duké hadiʼa governu ohin loron, nia sei troka governu sira hotu ho ninia governu rasik iha lalehan, neʼebé Bíblia temi nuʼudar “Maromak nia Ukun”. (Marcos 1:14, 15; Mateus 6:10) Bíblia dehan: “Maromak iha lalehan sei harii ukun ida . . . Ukun neʼe sei harahun no halakon liurai sira-neʼe hotu nia ukun, no ukun neʼe mesak mak sei hamriik ba nafatin.” (Daniel 2:44) Hodi uza dalan hanesan neʼe, Maromak sei halakon korrupsaun neʼebé akontese ohin loron.

 Oinsá mak ita bele hatene katak Maromak nia governu sei nunka halo korrupsaun? Haree toʼok buat tuirmai.

1.  1. Kbiit. Governu neʼe simu kbiit husi Maromak neʼebé Kbiit Boot Liu Hotu.—Apokalipse 11:15.

    Tanbasá importante: Ema nia governu sadere ba osan husi povu hodi halaʼo sira-nia serbisu. Dala barak ida-neʼe loke oportunidade ba ema atu halo korrupsaun oioin hanesan simu osan iha kotuk, naʼok, no aproveita situasaun. Maibé, Maromak nia governu bele fó buat hotu neʼebé povu presiza tanba governu neʼe simu kbiit husi Maromak neʼebé Kbiit Boot Liu Hotu.—Salmo 145:16.

2.  2. Ukun-naʼin. Maromak hili ona Jesus Kristu nuʼudar Ukun-Naʼin ba Maromak nia Ukun, ka governu.—Daniel 7:13, 14.

    Tanbasá importante: Ukun-naʼin neʼebé diʼak liu mós bele hetan influénsia la diʼak husi ema seluk. (Eclesiastes 7:20) Jesus la hanesan neʼe. Nia nunka halo korrupsaun hodi simu buat diʼak ruma ba ninia an. (Mateus 4:8-11) Laʼós neʼe deʼit, nia hadomi tebes ninia povu no hakarak duni atu tau matan no ajuda sira.—Salmo 72:12-14.

3.  3. Lei sira. Maromak nia Ukun iha lei neʼebé perfeitu no lei sira-neʼe lori haksolok ba ema neʼebé halo tuir.—Salmo 19:7, 8.

    Tanbasá importante: Ema nia governu halo lei barak neʼebé komplikadu, hatodan povu, ladún implementa didiʼak, no loke oportunidade ba ema atu halo korrupsaun. Maibé lei husi Maromak sempre diʼak no lori benefísiu. (Isaias 48:17, 18) Laʼós neʼe deʼit, lei sira-neʼe laʼós temi deʼit kona-ba ema nia hahalok, maibé mós kona-ba ema nia motivu. (Mateus 22:37, 39) Maromak bele haree ema ida-idak nia laran no aplika lei sira-neʼe hodi hanoin sira-nia situasaun.—Jeremias 17:10.

 Ami konvida Ita atu aprende liután Bíblia nia promesa kona-ba futuru neʼebé la iha tan korrupsaun.

•   Lee informasaun “Maromak nia Ukun—Governu ida neʼebé la iha korrupsaun” atu aprende razaun tolu tan tanbasá Maromak nia Ukun sei nunka halo korrupsaun.

•   Haree vídeo Saida mak Maromak nia Ukun? atu aprende liután kona-ba Maromak nia governu no saida mak governu neʼe sei halo ba mundu.

•   Koko toʼok ami-nia kursu Bíblia interativu neʼebé gratuitu atu hatene oinsá Ita bele hetan benefísiu husi Bíblia nia promesa.