Kuandu ita haree notísias neʼebé fó sai katak ema barak mate tanba ataka husi terrorista, karik ita husu ba ita-nia an: ‘Maromak hanoin ita ka lae? Tanbasá mak buat neʼe akontese? Loron ida terrorizmu a sei lakon ba nafatin ka lae? Oinsá mak haʼu bele kontrola haʼu-nia sentimentu taʼuk?’ Bíblia fó resposta ba pergunta sira-neʼe.

 Maromak odi violénsia no terrorizmu. (Salmo 11:5; Provérbios 6:16,17) No Jesus neʼebé haleno Maromak nia hanoin mós hapara kedas ninia dixípulu sira bainhira sira uza violénsia. (Mateus 26:50-52) Maski ema balu halo violénsia hodi dehan katak sira kumpre Maromak nia hakarak, maibé Maromak nunka fó lisensa ba sira atu halo nuneʼe. Tuir loloos, Maromak la rona sira-nia orasaun.—Isaias 1:15.

 Maromak hanoin ema neʼebé iha susar laran, inklui mós ema neʼebé hetan terus husi terrorizmu. (Salmo 31:7; 1 Pedro 5:7) Bíblia mós fó sai katak Maromak sei halakon violénsia.—Isaias 60:18.

 Kona-ba razaun tanbasá mak terrorizmu akontese, Bíblia dehan: “Ema mak domina ema seluk, no neʼe lori deʼit susar.” (Eclesiastes 8:9) Husi tempu uluk toʼo agora, ema neʼebé iha kbiit dala barak domina no hanehan ema seluk. No rezultadu mak ema balu kontra sira liuhusi terrorizmu.—Eclesiastes 7:7.

 Maromak promete atu halakon violénsia no halo mundu neʼe nakonu ho dame, hodi ema bele sai livre husi sentimentu taʼuk. (Isaias 32:18; Miqueias 3:4) Maromak sei:

•   Halakon terrorizmu nia hun. Maromak nia governu sei troka ema nia governu iha mundu tomak. Ukun-naʼin ba Maromak nia governu mak Jesus Kristu, nia sei trata ema hotu ho justisa, no nia sei halakon violénsia no ema neʼebé hanehan ema seluk. (Salmo 72:2, 14) Iha tempu neʼebá, la iha tan ema neʼebé halo terrorizmu. Ema hotu “sei hetan ksolok boot ho dame neʼebé barak”.—Salmo 37:10, 11.

•   Hadiʼa fali rezultadu aat hotu husi terrorizmu. Maromak sei kura ema neʼebé sai vítima husi terrorizmu iha dalan fíziku no emosaun. (Isaias 65:17; Apokalipse 21:3, 4) Maromak mós promete atu fó moris hiʼas ba ema neʼebé mate ona, atu sira bele moris iha mundu neʼebé nakonu ho dame.—João 5:28, 29.

 Bíblia fó sai razaun diʼak barak atu ita bele fiar katak lakleur tan Maromak sei hadiʼa mundu. Maibé karik ita hanoin, ‘Tanbasá Maromak la halakon terrorizmu toʼo agora?’ Atu hetan resposta, haree vídeo Tanbasá mak Maromak husik terus akontese?