Bainhira koʼalia kona-ba ema neʼebé sente laran-susar, a karik Ita imajina ema ida neʼebé sente taʼuk toʼo labele halo buat ruma, labele hadeer husi ninia kama iha dadeer, ka ema neʼebé koʼalia beibeik kona-ba ninia susar sira.

 Ema balu neʼebé sente laran-susar halo duni buat sira-neʼe. Maibé matenek-naʼin sira deskobre katak ema balu, liuliu mane sira halo buat seluk bainhira sira sente laran-susar. Relatóriu ida hatete katak “bainhira sente laran-susar, baibain mane sira sei hemu tua ka uza droga atu bele tahan. Tan neʼe mane balu neʼebé hemu tua beibeik, karik iha problema ho laran-susar. Mane neʼebé laran-susar mós karik lalais atu hirus”.

 Klaru katak laʼós mane hotu halo nuneʼe bainhira sente laran-susar. Ema ida-idak nia dalan atu tahan hasoru laran-susar la hanesan. Maibé ohin loron, iha ema barak liután neʼebé sente laran-susar durante ‘loron ikus sira neʼebé susar atu tahan’. (2 Timóteo 3:1) Se agora daudaun, Ita sente laran-susar, oinsá Bíblia bele ajuda Ita?

 Bíblia iha matadalan barak tebes neʼebé bele ajuda ita atu tahan hasoru laran-susar. Haree toʼok ezemplu tolu tuirmai.

1.  1. “Keta hanoin resin kona-ba loron aban, tanba loron aban iha ninia susar rasik. Loron ida-idak iha ninia problema rasik.”—Mateus 6:34.

    Signifikadu: Diʼak se ita hakaʼas an atu la hanoin resin kona-ba buat neʼebé karik sei akontese iha futuru. Dala barak, buat neʼebé ita hanoin, la akontese. Dala ruma, situasaun bele troka sai diʼak liu.

    Koko toʼok: Hanoin fila fali tempu neʼebé uluk Ita hanoin resin kona-ba buat ruma neʼebé ikusmai la akontese. Tuirmai hanoin toʼok, agora daudaun Ita hanoin resin kona-ba saida. Tetu ho didiʼak, tuir loloos porsentu hira husi buat neʼebé Ita hanoin mak sei akontese duni?

2.  2. “Besi kadi ho besi bele sai kroʼat, nuneʼe mós ema ida bele halo kroʼat ninia belun.”—Provérbios 27:17.

    Signifikadu: Ema seluk bele ajuda ita atu manán hasoru laran-susar, se ita husu ajuda ba sira. Karik sira mós hasoru ona esperiénsia neʼebé hanesan no bele fó sujestaun ba ita. Ka sira bele ajuda ita atu hanoin iha dalan neʼebé foun kona-ba ita-nia problema.

    Koko toʼok: Hanoin toʼok kona-ba ema ruma neʼebé karik mós hasoru problema neʼebé hanesan. Karik nia bele fó sujestaun neʼebé bele duni ajuda Ita. Husu nia kona-ba oinsá nia bele hasoru situasaun susar neʼe ho susesu.

3.  3. “Entrega imi-nia laran-susar hotu ba nia, tanba nia hanoin imi.”—1 Pedro 5:7.

    Signifikadu: Maromak hanoin tebes ema neʼebé hasoru daudaun susar no terus. Nia konvida ita atu halo orasaun ba nia no fó sai ita-nia laran-susar ba nia.

    Koko toʼok: Hakerek toʼok lista kona-ba buat sira neʼebé halo Ita laran-susar. Tuirmai, hatoʼo buat sira-neʼe iha Ita-nia orasaun ba Maromak. Esplika Ita-nia problema ida-idak no husu ba Maromak atu ajuda Ita tahan hasoru susar sira-neʼe.

 Bíblia laʼós deʼit nakonu ho matadalan sira neʼebé bele ajuda ita atu tahan hasoru laran-susar. Maibé Bíblia mós temi esperansa sira katak iha futuru, laran-taridu neʼebé ema barak sente ohin loron sei lakon mohu. Oinsá ida-neʼe bele akontese?

 Maromak nia Ukun sei halakon buat hotu neʼebé hamosu laran-susar. (Apokalipse 21:4) Tuir loloos, kuandu ita moris iha Maromak nia Ukun okos, ita-nia memória kona-ba buat sira neʼebé uluk halo ita laran-susar no estrese sei la halo ita sente triste.—Isaias 65:17.

 “Maromak neʼebé fó dame” hakarak ita atu hetan futuru furak neʼe. (Roma 16:20) Maromak hatete: “Haʼu hatene didiʼak buat neʼebé haʼu hakarak ba imi, haʼu hakarak fó imi dame, laʼós fó-terus, no haʼu hakarak fó imi futuru kapás no esperansa.”—Jeremias 29:11.