Tuir reportajen husi Nasoins Unidas:

•   Husi 7 Outubru toʼo 23 Outubru 2023, konflitu neʼebé akontese daudauk iha Gaza no Izraél halo ema naʼin-6.400 mate no naʼin-15.200 hetan kanek, maioria husi sira mak ema baibain. Liután neʼe, ema rihun ba rihun husik ona sira-nia hela-fatin.

•   Toʼo 24 Setembru 2023, funu entre Rúsia ho Ukránia halo ema naʼin-9.701 mate no naʼin-17.748 hetan kanek iha Ukránia.

 Bíblia fó esperansa saida ba ema neʼebé hetan susar tanba funu?

 Bíblia fó sai katak Maromak sei “hapara funu sira iha mundu tomak”. (Salmo 46:9) Nia sei uza governu ida, ka ukun ida iha lalehan atu troka ema nia governu hotu. (Daniel 2:44) Neʼe mak Maromak nia Ukun, no ida-neʼe sei lori kmaan ba ema hotu iha mundu.

 Haree toʼok saida mak Jesus Kristu sei halo nuʼudar Liurai ba Maromak nia Ukun:

•   “Nia sei salva ema kiak neʼebé halerik atu husu ajuda, no nia sei salva ema kiʼik no mós sira hotu neʼebé la iha ema atu ajuda sira. Nia sei hanoin ema kiʼik no ema kiak, no nia sei salva ema kiak nia moris. Nia sei salva sira husi ema neʼebé hanehan sira no husi violénsia.”—Salmo 72:12-14.

 Liuhusi Ukun neʼe, Maromak sei halakon ema nia susar no terus hotu neʼebé mosu tanba funu no violénsia.

•   “Nia sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona.”—Apokalipse 21:4.

 Lakleur tan Maromak sei lori mudansa boot ba situasaun iha mundu. Bíblia fó-hatene nanis kona-ba tempu neʼebé ema sei “rona kona-ba funu iha fatin oioin”. (Mateus 24:6) Buat sira-neʼe no akontesimentu seluk tan hatudu katak Ita moris daudaun iha “loron ikus sira” husi ema nia ukun.—2 Timóteo 3:1.