Ema halo violénsia iha fatin oioin tanba buat polítiku nian, no neʼe halo ema iha mundu tomak sente laran-taridu.

•   Iha Méxiku, durante tempu eleisaun 2023-2024 ema oho kandidatu polítiku naʼin-39, no neʼe barak liu fali tinan sira antes neʼe. No mós akontese violénsia sira seluk tanba polítiku iha rai neʼe.

•   Iha Europa, foin lalais akontese violénsia barak tanba buat polítiku nian, neʼe inklui ema koko atu oho primeiru ministru Eslovákia iha loron 15 Maiu 2024.

•   Iha Estadus Unidus, ema hakfodak tanba ema koko atu oho eis-prezidente Donald Trump iha loron 13 Jullu 2024.

 Tanbasá iha violénsia barak neʼebé liga ho buat polítiku? Problema neʼe sei para ka lae? Saida mak Bíblia dehan?

 Bíblia fó sai nanis ona kona-ba ita-nia tempu hodi temi nuʼudar “loron ikus sira”, ema barak sei iha hahalok neʼebé book sira halo violénsia no diskute malu.

•   “Iha loron ikus sira sei iha problema barak neʼebé susar atu tahan. Tanba ema sei . . . la hatene fó agradese, la hatudu laran-metin, . . . la rona malu, . . . siʼak, . . . traidór, ulun-toos, foti an.”—2 Timóteo 3:1-4.

 Bíblia mós fó-hatene nanis katak ema sei kontra hasoru governu no konflitu polítiku nian sei akontese durante tempu neʼe. (Lucas 21:9, nota) Maibé violénsia no haketak malu tanba situasaun polítiku sei la kontinua ba nafatin.

 Bíblia esplika katak Maromak sei troka ema nia governu hotu ho ninia governu neʼebé iha lalehan.

•   ‘Maromak iha lalehan sei harii ukun ida neʼebé . . . sei harahun no halakon liurai sira seluk hotu nia ukun, no ukun neʼe mesak mak sei hamriik ba nafatin.’—Daniel 2:44.

 Maromak nia Ukun sei halo ema hotu iha unidade no lori dame ba mundu tomak.

•   Jesus Kristu nuʼudar Ukun-naʼin, neʼebé mós Bíblia temi nuʼudar “Ulun-Naʼin Dame nian” sei lori dame neʼebé “la iha rohan”.—Isaias 9:6, 7.

•   Agora daudaun ema neʼebé iha Ukun neʼe nia okos aprende oinsá atu moris iha dame. Rezultadu mak Bíblia hatete: “Sira sei tuku sira-nia surik sai xarrua no tuku sira-nia diman sai sabit. Nasaun sei la foti tan surik hasoru nasaun seluk, no sira mós sei la aprende tan funu.”—Isaias 2:3, 4.

 Atu aprende liután, lee informasaun “Saida mak Maromak nia Reinu sei halo?” no haree vídeo Saida mak Maromak nia Ukun?