Testemuña ba Jeová no ema seluk iha rai oioin sente triste tebes tanba iha 9 Marsu 2023 ema tiru ita-nia irmaun-irmán sira iha Reuniaun-Fatin iha Hamburg, Alemaña. Irmaun Mark Sanderson, membru husi Grupu Administradór husi Testemuña ba Jeová, irmaun Gajus Glockentin, ajuda-naʼin ba Komisaun Editora nian, no membru balu husi Komisaun Sukursál Europa Sentrál halo viajen ba Hamburg atu fó kmaan husi Bíblia ba ita-nia irmaun-irmán sira. Iha 25 Marsu, halaʼo funerál ba vítima sira iha estádiu ida iha sidade laran. Sira neʼebé asiste funerál neʼe bele haree ho klaru katak Bíblia iha duni kbiit atu fó kmaan no apoia sira neʼebé triste. Irmaun neʼebé hasoru trajédia neʼe hatete: “Ohin, ita bele sente duni Jeová nia domin neʼebé laran-diʼak, neʼe hanesan nia hakoʼak hela ita.” Ema barak mós sente hanesan ho buat neʼebé irmaun neʼe hatete.

Ema neʼebé asiste iha estádiu hamutuk naʼin-3.300 liu. No naʼin-90.000 liu haree husi live stream.

Laʼós deʼit irmaun-irmán sira mak asiste maibé iha mós ema husi governu, polísia, doutór, enfermeira no bombeirus mós asiste funerál neʼe. Neʼe inklui autoridade lokál iha Hamburg, Prezidente Parlamentu sidade Hamburg, Konsuladu Jerál Estadus Unidus iha Hamburg, Xefe ba Polísia Hamburg no ninia vise no mós ema seluk husi governu.

Programa funerál komesa ho knananuk reuniaun neʼebé irmaun-irmán sira mak toka orkestra. Irmaun Joachim Szewczyk, membru husi Komisaun ba Sukursál Europa Sentrál mak sai ulun-naʼin ba programa neʼe. Nia konvida irmaun Dirk Ciupek, neʼebé mós membru ba Komisaun Sukursál nian atu hatoʼo diskursu funerál. Tuirmai, irmaun Ciupek konvida irmaun Sanderson hodi hatoʼo diskursu badak husi Bíblia. Depois, irmaun Ciupek mak hatoʼo fali parte ikus husi diskursu funerál. Reuniaun neʼe remata ho knananuk no irmaun Glockentin mak taka ho orasaun furak.

Durante diskursu, irmaun Sanderson esplika ba rona-naʼin sira katak laʼós Maromak mak hamosu trajédia neʼe. Maibé neʼe mak buat neʼebé livru Eclesiastes temi kona-ba “situasaun neʼebé mosu derrepente deʼit”. (Eclesiastes 9:11) Irmaun Sanderson hatete: “Trajédia ka violénsia neʼebé akontese laʼós Maromak nia planu ka hakarak, tan neʼe ita labele buka razaun tanbasá mak ida-neʼe akontese . . . Ita-nia esperansa, ita-nia fiar no ita-nia domin sei nunka lakon maski hasoru trajédia. Hahalok sira-neʼe ajuda ita atu tahan hasoru ódiu no violénsia.” Nia mós hatoʼo obrigadu ba polísia sira, bombeirus, doutór no enfermeira neʼebé ajuda ita-nia irmaun-irmán sira.

Iha ninia diskursu funerál neʼebé furak tebes, irmaun Ciupek hatete: “Ataka neʼebé akontese iha 9 Marsu neʼe laʼós ataka ba ema balu deʼit. Neʼe hanesan ataka ita hotu. Ohin, ita hotu hamutuk iha fatin neʼe tanba ita hakarak hatudu saida mak ita halo bainhira hasoru ódiu no violénsia. Ita hakarak hatudu domin, laran-sadiʼa no hanoin ema, no mós hatudu esperansa no fiar. ‘Keta husik buat aat manán imi,’ neʼe mak buat neʼebé ita lee iha Bíblia Sagrada, ‘maibé kontinua halo buat diʼak hodi bele manán buat neʼebé aat.’ Neʼe mak buat neʼebé ita hakarak halo. Tan neʼe mak ita mai iha fatin neʼe ohin.”—Roma 12:21.

Neʼe kona tebes rona-naʼin sira-nia laran bainhira irmaun Ciupek temi vítima ida-idak nia naran, hodi dehan: “Ita mós mai iha neʼe ohin atu hanoin-hetan no fó adeus ba Stephan, Sebastian, James no Marie, Stephanie, Dan, no ba bebé Romy (neʼebé seidauk moris mai no mate iha kabun laran).” Depois, irmaun Ciupek koʼalia ba irmaun-irmán sira neʼebé hasoru trajédia neʼe no vítima sira-nia família, hodi dehan: “Ami mós hakarak apoia no fó kmaan ba imi, família doben sira.”

Kuandu irmaun Ciupek atu remata ninia diskursu furak neʼe, nia temi hahalok espesífiku husi vítima ida-idak neʼebé irmaun-irmán sira iha Kongregasaun Hamburg sei hanoin-hetan ba nafatin. Temi tiha Apokalipse 21:4, 5, irmaun Ciupek dehan: “Sin, ita saudades sira neʼebé mate ona. Ita tanis ba sira neʼebé mate ona. Sira sei nafatin sai parte ida ho ita. Tempu sei toʼo mai bainhira ita-nia Maromak sei halakon ba nafatin kanek neʼebé ita sente agora, tanba nia sei hapara ida-neʼe . . . Mate sei la iha tan. Neʼe mak mensajen boot neʼebé Jesus no ninia apóstolu sira fó sai. Neʼe mak ita-nia esperansa. Ita bele manán hasoru mate. Mate laʼós rohan ba buat hotu. Maromak mak kbiit boot liu fali mate . . . Maski Stephan, Sebastian, James no Marie, Stephanie, Dan, no mós bebé Romy mate ona, maibé neʼe laʼós rohan ba sira.”

Depois funerál remata, ema balu husi governu hatoʼo lia-menon ba ema hotu neʼebé asiste. Autoridade lokál iha Hamburg, Dr. Peter Tschentscher, no Prezidente Parlamentu sidade Hamburg, Sra. Carola Veit fó sai sira-nia sentidu kondolénsias ba vítima sira-nia kolega no família. Dr. Tschentscher hatete katak sira neʼebé liu trajédia neʼe “tahan sira-nia laran-triste no laran-kanek ho aten-brani” tanba “sira-nia fiar neʼebé metin”. Nia mós lee karta neʼebé Prezidente Federál Alemaña, Sr. Frank-Walter Steinmeier mak hakerek atu fó konsola.

Média barak mak mai no halo reportajen iha funerál neʼe. Membru husi televizaun ida hatete: “Haʼu admira tebes ho laran-diʼak neʼebé ema hotu iha neʼe hatudu ba malu.” Nia hatete: “Ami ba asiste ona eventu barak, maibé ami nunka haree eventu ka rona diskursu furak hanesan neʼe.”

Kaben-naʼin ida neʼebé liu trajédia neʼe hatete: “Kapás tebes atu medita kona-ba ita-nia esperansa no hasoru laran-triste neʼe hamutuk ho irmaun-irmán sira.”

Irmaun ida husi kongregasaun seluk neʼebé uza Reuniaun-Fatin hanesan iha Hamburg, hatete: “Ba tempu barak ona ami laran triste no neʼe halo haʼu lakon forsa. Maibé reuniaun neʼe halaʼo ho respeitu no furak tebes . . . Bele sente duni domin no laran-diʼak neʼebé irmaun no reprezentante husi governu hatudu liuhusi liafuan sira neʼebé sira hatoʼo.”

Reuniaun funerál hatudu sai momoos Jeová nia domin no interese mai ita. Ita hatene katak “Aman neʼebé laran-sadiʼa no Maromak neʼebé fó kmaan ba ema iha situasaun hotu” sei kontinua apoia sira neʼebé hetan impaktu husi ataka iha Hamburg.—2 Korinto 1:3.