Iha loron 22 Abríl 2023, fatin memoriál ba kampu-konsentrasaun Flossenbürg iha Bavaria, Alemaña, fó sai plaka ida atu hanoin-hetan Testemuña ba Jeová neʼebé mate durante iha komarka laran. Iha ona kampu-konsentrasaun ualu seluk neʼebé rekoñese Testemuña ba Jeová hodi halo plaka memoriál.

Uluk, Testemuña ba Jeová naʼin-100 liu mak tama kampu-konsentrasaun Flossenbürg no kampu sira seluk neʼebé besik. Família balu husi ema sira neʼebé tama komarka asiste serimónia neʼe. Irmaun ida neʼebé tuir hatete: “Sente triste tebes atu mai iha fatin memoriál neʼebé uluk iha buat aat barak akontese. Maibé, programa laʼo ho dignidade no kontente tanba ami hanoin fali ita-nia irmaun sira-nia laran-metin.”

Profesór Jörg Skriebeleit, diretór ba fatin memoriál ba kampu-konsentrasaun Flossenbürg hatete: “Testemuña ba Jeová mak relijiaun primeiru neʼebé governu bandu depois [Nazi] mak ukun nasaun neʼe iha Marsu 1933.” Iha ninia lia-menon badak, nia hatete: “Fiar fó [Testemuña sira] kbiit no forsa bainhira iha kampu-konsentrasaun . . . laʼós deʼit atu sira rasik bele tahan maibé mós atu fó forsa ba ema seluk neʼebé iha fiar la hanesan ho sira.”

Irmaun Wolfram Slupina, lia-naʼin ba Testemuña ba Jeová iha Alemaña mós hatoʼo lia-menon ba rona-naʼin. Nia hatete: “Importante ba ita hotu atu hanoin-hetan nafatin istória kona-ba Testemuña ba Jeová nuʼudar vítima iha kampu-konsentrasaun, istória kona-ba ema sira neʼebé prontu halo tuir sira-nia konxiénsia durante tempu neʼebé aat tebes iha Alemaña.”

Ita-nia irmaun-irmán sira laran-metin maski hetan terus no mate iha kampu-konsentrasaun. Ita fiar katak Maromak sei hanoin-hetan sira tanba sira-nia naran hakerek ona iha ninia livru.—Malaquias 3:16.