Iha 12 Agostu 2022, irmaun-irmán sira halo kompletu faze primeiru husi gravasaun vídeo Liafuan Diʼak husi Jesus Episode 1. Lakleur tan, faze segundu nian sei komesa, no sira planu atu remata ida-neʼe iha Outubru 2022.

Hanesan ami fó sai ona, irmaun-irmán sira hahú grava vídeo Liafuan Diʼak husi Jesus iha 20 Maiu 2022, liuliu iha estúdiu laran. Iha tempu neʼebá, edifísiu atu apoia gravasaun no área istóriku seidauk hetan aprova husi autoridade. Ikusmai iha 15 Jullu 2022, irmaun sira hetan aprova, no Departamentu Konstrusaun iha Sukursál Australásia bele entrega fatin neʼe tomak ba Grupu Grava Vídeo (RVT). Agora irmaun-irmán sira bele uza fasilidade neʼe tomak ba projetu gravasaun.

Iha projetu konstrusaun, irmaun-irmán voluntáriu naʼin-500 liu husi Austrália no Novazelándia mak hola parte atu halo área istóriku atu uza ba gravasaun, neʼebé luan metru kuadradu 7.000 liu. Kona-ba projetu neʼe, irmaun Russell Grygorcewicz neʼebé serbí nuʼudar koordenadór ba Komisaun Konstrusaun dehan: “Maski ami hasoru dezafiu barak, maibé ami haree ho klaru Jeová nia ajuda hodi bele manán hasoru dezafiu sira-neʼe. Ami la iha dúvida katak ami-nia serbisu hotu bele susesu tanba Jeová nia espíritu.”

Irmaun Ronald Curzan, ajuda-naʼin ba Komisaun Hanorin nian, serbisu hamutuk iha parte barak husi gravasaun. Nia dehan: “Haʼu admira tebes kuandu haree família Betel no voluntáriu sira neʼebé hola parte iha projetu konstrusaun apoia malu no hatudu domin ba malu. Haʼu kontente hodi haree katak liutiha tinan balu husi tempu neʼebé ami komesa planu no halo konstrusaun, ikusmai fatin neʼe sai prontu ba gravasaun. Irmaun-irmán sira iha Australásia tomak apoia tebes projetu neʼe. Ami fiar duni katak vídeo kona-ba Jesus nia moris neʼebé fahe ba episode 18 sei book ema nia laran iha mundu tomak.”

Irmaun Kenneth Cook husi Grupu Administradór mós tuir parte ikus husi gravasaun faze primeiru ba Episode 1. Nia dehan: “Klaru katak Jeová mak apoia projetu neʼe. Ami agradese ba Jeová no irmaun-irmán hotu neʼebé hola parte iha konstrusaun no gravasaun, tanba sira halo sakrifísiu barak no serbisu ho domin. Ami harohan katak série vídeo espesiál neʼe sei ajuda ema barak atu laʼo tuir Jesus nia ain-fatin no hakbesik liután ba Jeová.”