Iha Jullu 2019, Testemuña ba Jeová loke muzeu Bíblia nian foun iha sukursál Eskandinávia, neʼebé iha sidade Holbæk iha rai-Dinamarka. Fatin neʼe maizumenus kilómetru 65 husi sidade Copenhagen. Muzeu neʼe nia tema mak “Bíblia no Maromak nia naran iha Eskandinávia”.

Muzeu nia kolesaun inklui Bíblia antigu barak neʼebé importante no susar atu hetan iha lian Dinamarkés, Faroense, Groenlandés, Izlandés, Noruegés, Sami no Sueku. Kolesaun neʼe iha Bíblia hamutuk 50 liu.

Bíblia ida neʼebé importante tebes mak Bíblia Gustav Vasa edisaun primeiru neʼebé fó sai iha tinan 1541. Neʼe mak Bíblia primeiru neʼebé kompletu husi língua hotu iha área Eskandinávia. Lian Sueku nia gramátika no vokabuláriu bazeia ba Bíblia Gustav Vasa. Ba tinan 300 depois neʼe, tradusaun Bíblia seluk iha lian Sueku mós bazeia ba Bíblia Gustav Vasa.

Bíblia Kristaun III neʼebé fó sai iha tinan 1550 mak Bíblia antigu ida seluk neʼebé susar atu hetan, maibé bele haree iha muzeu neʼe. Bíblia Kristaun III sai nuʼudar ezemplu diʼak ba gramátika iha lian Dinamarkés, no mós fó impaktu boot ba área barak iha Europa Norte.

Erik Jørgensen husi sukursál Eskandinávia hatete: “Muzeu Bíblia nian foun hatudu katak ba tinan atus ba atus ema iha Eskandinávia hatudu respeitu kleʼan ba Maromak nia Liafuan no mós Maromak nia naran kmanek, Jeová.”