Iha 26 Abríl 2023, governu España aprova mudansa importante ida ba nasaun nia lei kona-ba taxa. Desizaun neʼe afeta Testemuña ba Jeová iha España iha dalan pozitivu balu.

Governu fó sai desizaun katak ita-nia organizasaun iha España la presiza selu taxa ba fatin sira neʼebé ita uza atu halaʼo adorasaun iha rai neʼe. Irmaun-irmán sira mós la presiza selu taxa ba osan neʼebé sira fó nuʼudar kontribuisaun atu apoia atividade neʼebé Testemuña ba Jeová halaʼo. No mós, mudansa neʼe hatudu katak Tribunál Europeu ba Direitus Umanus rekoñese Testemuña ba Jeová mak “relijiaun neʼebé koñesidu”.

Maski governu España rekoñese Testemuña ba Jeová nuʼudar relijiaun neʼebé legál iha Juñu 2006, maibé Testemuña la hetan direitu hanesan relijiaun sira seluk, sira tenke kontinua selu taxa. Irmaun-irmán sira kontinua husu atu iha direitu hanesan ho relijiaun sira seluk. Derrepente iha 24 Abríl 2023, Ministériu Prezidensiál konvida reprezentante husi Testemuña ba Jeová iha España atu tuir enkontru ida. Iha enkontru neʼe, irmaun sira rona katak lei sei troka kona-ba taxa ba organizasaun neʼebé la buka lukru, neʼe sei aplika mós ba Testemuña ba Jeová. Loron rua tuirmai, iha 26 Abríl 2023, deputadu sira neʼebé halaʼo kongresu aprova mudansa ba lei neʼe. Mudansa neʼe sei komesa iha Juñu 2023.

Ita kontente tebetebes ho desizaun importante neʼe tanba Testemuña ba Jeová iha España hetan liberdade liután nuʼudar relijiaun ida.—Filipe 1:7.