Husi Marsu 2020, ita para atu halaʼo reuniaun boot hamutuk iha fatin ida tanba pandemia COVID-19. Tinan neʼe, sei iha reuniaun boot ho tema “Hatudu Pasiénsia”! hamutuk 6.000 liu, no sei halaʼo iha mundu tomak iha língua 500 liu. Reuniaun boot primeiru neʼebé halaʼo oin ba oin hahú ona husi loron 12 toʼo 14 Maiu 2023.

Ema naʼin-1.800 liu mak asiste reuniaun boot neʼe iha Salaun ba Asembleia husi Testemuña ba Jeová iha Newburgh, Novaiorke, Estadus Unidus Amérika. No irmán ida naran Khrystine Torres mós asiste reuniaun boot neʼe. Nia hatete: “Bainhira oradór dehan: ‘Benvindu’, ema hotu iha salaun laran basa liman. Ema hotu kontente tebetebes tanba ikusmai bele halibur hamutuk.” Irmaun Duane Smith neʼebé mós asiste reuniaun boot neʼe hatete: “Ema hotu haksolok tebetebes no neʼe furak loos. Ita bele haree irmaun-irmán sira sente kontente tanba bele halibur hamutuk.”

Irmán Jessica Dolcemascolo, neʼebé hetan batizmu durante pandemia, nunka asiste reuniaun boot neʼebé halaʼo oin ba oin. Nia konta: “Sentimentu haksolok, domin no kontente iha reuniaun boot neʼe hanesan sentimentu bainhira ita hasoru fali belun diʼak ida neʼebé ita la hasoru ba tempu kleur ona.” Irmán Noemi Tinajero ho tinan 18 neʼebé hetan batizmu iha tinan neʼe, hatete: “Ita haree família sira kontente, kolega sira kontente. . . . Neʼe sente hanesan ita iha mundu foun.”

Ema barak hafolin tebetebes tema ba programa iha reuniaun boot neʼe. Irmaun Sam Huh hatete: “Pasiénsia mak hahalok neʼebé susar ba ema barak atu hatudu. Entaun neʼe mak informasaun iha tempu neʼebé loos atu banati-tuir Jeová nia ezemplu furak kona-ba hatudu pasiénsia.” Irmán Frenchie Smith hatete: “Reuniaun boot neʼe hanorin haʼu oinsá pasiénsia kona situasaun hotu iha haʼu-nia moris. Informasaun hotu iha reuniaun boot neʼe diʼak ba ita-nia moris loroloron nian.”

Ema hotu hetan laran-manas bainhira asiste reuniaun boot primeiru iha Newburgh, Novaiorke. Ita hamutuk ho ema millaun ba millaun iha mundu tomak hein namanas atu simu benefísiu husi hahán espirituál neʼebé prepara ona.—Salmo 122:1.